¿Ne gare mäi?

¿Ñobätä Esteban nämäne jäme nitre ja mikaka rüere ye ngwärekri?

NITRE judío 71 kukwe ükatekä töi käme krubäte abokän kädeka nämäne Sanedrín ye ngwärekri Esteban nämäne. Nitre ye abokän mika nämäne ütiäte jai. Caifás, sacerdote bäri kri käkwe nitre ye ükaninkrö kukwe ükatekäre, Caifás ye ara käkwe kukwe ükaninte Jesús murie ketakäre (Mat. 26:57, 59; Hech. 6:8-12). Nitre kwati kukwe ngwarbe niekä namani Esteban kite ngise. Nitre Sanedrín käkwe Esteban mikani ñärärä ye ngwane, niara ngwäre namani tuin ángel erere ietre yebätä töi namani ñan krütare (Hech. 6:13-15).

¿Dre käkwe Esteban dimikani ja töi mike jäme nitre töi käme ye ngwärekri? Nitre Sanedrín ngwärekri niara jänrikadre ja dibiti ye känenkri, üai deme Ngöbökwe ye köböire töi nämäne kwatibe sribi nämäne kisete konkrekasionte yebätä (Hech. 6:3-7). Kukwe ükaninte ben ye näire, üai deme Ngöbökwe yekwe dimikani aune töi mikani jäme (Juan 14:16). Ñodre, Hechos kapitulo 7 yekänti mikata gare, niarakwe ñaka kä jürä ngwani jabätä blitakäre nitre kukwe ükatekä ben ye näire, üai deme Ngöbökwe käkwe dimikani texto keta gre näre Escrituras Hebreas yebätä ye ngwenta törö jai (Juan 14:26). Akwa, Jesús nämäne nünaninkä Ngöbö küde ruinkri jutuabare Esteban ie ye ngwane, namani tödeke bäri (Hech. 7:54-56, 59, 60).

Ni rä öta raba aune ja mika raba ni rüere arato (Juan 15:20). Käre nita ñäke Kukwe Ngöbökwe yebätä aune ni töita kwatibe kukwe driebätä ngwane, nikwe ja tuainmetre jie ngwandre üai deme Jehovakwe ie. Arato, ni dimikai kwe ja tuin nitre ja mikaka ni rüere yebe aune ja töi mike jäme (1 Ped. 4:12-14).