Nitre tä kukwe ngwentari

Kri kukwe kwin aune kukwe käme mikakäre gare jai ye ngokwä Evakwe kwetadre aune ñaka krütai niebare Satanakwe ye ngwane, ¿nita krüte üai tä niken nüne kä madakänti mikata täte nengwane yebätä Satanakwe blitabare kena?

Ñakare raba ruin nie. Kri ngokwä ñäkäibare Ngöbökwe ye Evakwe kwetai ngwane niara krütai akwa üai näin nüne kä madakänti ye ñan ai niebare Diablukwe Eva ie. Ñakare aune icha o tibi yebiti Satanakwe mikani gare Eva ie niara ñaka krütai jire. Yebiti mikani gare kwe, Evakwe nünain bäri kwin kä tibienbätä kärekäre aune ñaka Ngöbö ribedi kwe jai nünankäre (Gén. 2:17; 3:3-5).

Ni üai ñan krüte jire drieta kä nengwane ye ñan ai driebare kena Edén, ¿se ñongwane drie jatani? Ñan gare metre ta akwa kukwe ngwarbe mika nämäne täte ye ganinte jökrä Ñü Kri Noé näire yete yebrä gare nie. Noé aune mräkä kwe nämäne Ngöbö mike täte aune niaratre aibe namaninte nire Ñü Kri ye bitikäre. Aisete kukwe ngwarbe mika nämäne täte ye ñaka namanina.

Aisete ni nire tä krüte üaita niken nüne kä madakänti nieta ye drie jatani Ñü Kri nikani ta ye bitikäre. ¿Ñokänti mikata täte kä jökräbiti tibien? Kira blita nämäne kukwe keteitibebiti akwa juta Babel yete Jehovakwe nitre kukwei kwitani jene jene ye ngwane nitre nikani nüne kä kia kia te kä ngrabare. Töbika nämäne ni nire tä krüte üai tä niken nüne kä madakänti ye nitre ye ara nikani ngwena käbiti tibien (Gén. 11:8, 9). Kukwe ngwarbe mikata täte kä nengwane ye ñongwane drie jatani ye ñaka gare metre ta. Akwa Satana ye “abrä ni ni ngökaka rün” aisete niara ara köböite kukwe ye drie jatani. Aune kukwe ngwarbe mika jatani era jai kä jökräbiti tibien ye käi namani jutobätä yebrä gare metre nie (Juan 8:44).