“Munkwe nüna Ngöbö tarekäre jankunu”
1. ¿Tärä “Manténganse en el amor de Dios” käkwe ni töi mikai dre nuainne?
1 Bämän 23 febrero yebätä ja känenkäre nikwe ja tötikai tärä “Manténganse en el amor de Dios” yebätä Ja tötika Bibliabätä Konkrekasionte yete. ¿Kä jutobiti nita köbö ye ngübare, ñan ererea? Nitre Umbre Braibe sribi Ngöbökwe ngübabitikä käkwe tärä tikani nitre Jehová tarekä ie, abokän kätä kukwe krörö niere tärä mrä yebätä: “Tärä ne käkwe ni jökrä töi mikadre kukwe metre nuainne bätä ‘Ngöbö tarere jankunu[...] ni tädre ja nire käre ye ngübare ngwane’, ye ie nun tö (Judas 21)”.
2. ¿Tärä mrä käkwe ni dimikai kukwe medenbätä?
2 Drebätä ni dimikai. Ja keta, jadaka, gobran mikadre ütiäte, ni töi jene jene, ja mika gure, blita o nita dre nuainne yebätä ¿nikwe kukwe nieta Bibliabätä ye nuaindi ño? Ja tötikai tärä nebätä käkwe ni dimikai ja töi kwite kukwe metre ükaninte Ngöbökwe Bibliabätä ye ererebätä (Sal. 19:7, 8). Ngöbö töi rükai gare bäri kwin nie angwane, nikwe mikai täte kukwe jökrä nuaindi nikwe yebiti, ni tö kä mikai jutobätä yebätä (Pro. 27:11; 1 Juan 5:3).
3. ¿Ñobätä nikwe ja di ngwandre kukwe niere ja tötikata bämän kratire kratire yete?
3 Ja töi mikadre kukwe niere. Mäkwe ja töi mika kwatibe Ngöbö käikitekä juta Kwe kätä ja ükökrö ye ngätäite (Heb. 13:15). Konkrekasion jökrä käkwe ja tötikai gwairebe tärä mrä nebätä. Kukwe dianinkä braibe ja tötikakäre ye medenbätä ni rabai ja tötike kwin bätä kä jürä ñaka rabai nibätä kukwe nüke gare nie ye niekäre. Ne madakäre, kukwe kwin niedi jötrö ngwarbe nikwe, ye käkwe nitre mada dimikai ja tarere kwärikwäri bätä kukwe kwin nuainne, ye köböire ja tötika ye rabai bare kwin bätä ni dimikai kwe (Heb. 10:24). Bätä kukwe nüke gare nie ye nikwe mikai gare angwane, kä rabai nemen juto nibätä.
4. ¿Ñobätä ütiäte kukwe Jehovakwe ye mikadre täte?
4 Köbö mrä deu te Jesús nämene Kä tibienbätä ye ngwane, Jehová kukwei mikadre täte aune taredre jankunu, ye abokän kukwe ja erebe niebare kwe (Juan 15:10). Tärä mrä “Amor de Dios” ye käkwe ni dimikai, ja töi mike kwatibe ja ngwen kukwe ükaninte Bibliabätä ye ererebätä mantre jetebe aune ‘nüne Ngöbö tarekäre jankunu’ (Jud. 21).