Texto Bibliabätä ngwan raba törö ño jai

¿Texto meden tuin kwin mäi? Texto kabre tuin kwin mäi raba ruin nunye. Keteiti abokän tä mä töi mike jäme, mä dimike ñan töbikakäre kukwe blo yebätä, o meden tuin kwin mäi mä töta nemen kädriei ni madabe (Sal. 119:​11, 111). Akwa tä medente o dre nieta yete ye ñaka tä nemen törö mäi. Kukwe ruäre ne raba mä dimike.

• Etiqueta tä JW Library^® yete mäkwe kukwe tika. Mäta ñäke Bibliabätä JW Library yebätä ngwane texto keteiti tä kwen mäi aune mä tö ngwain törö jai yebätä mäkwe etiqueta ketaka aune etiqueta ye kädeka “texto tuin kwin tie” ye erere.

• Medente texto ye raba kwen bäri jötrö mäi yete mäkwe mika. Ja mräkätre ruäre tä texto ye kwrere tike jai täräkwatabätä aune ketekä ñuai ye ken, jukwebätä o nevera yebätä. Mada abokän tä üai denkä celularte o computadorate aune tä üai ye mike pantallate jai.

• Texto tike tarjeta chi te ngwankäre törö jai. Texto meden tuin kwin mäi ye tike tarjeta chi yebätä biti kwäräkri dre nieta kwe ye mä tika. Abiti texto tä dre niere ye niere ja töibiti.