¿Tikwe carro ngwandre neen jankunu ye kwin?

¿Kukwe ne erere tärä nemen bare mäbätä? Ye erere ngwane, ¿mäkwe carro mikadi nen jankunu o ño ye dre raba mä dimike mike gare jai?

Juta ruäre känti nitre carro ngwanka ye niena umbre ngwane, jämi licencia denkäta jai ye känenkri rabadre niken ja trä tuin doctorbe nekwe tä kwin o kätä tuin kwin ie mikakäre gare jai. juta ne kanti nitre kristiano tä kukwe ükaninte gobrankwe ye mike täte aune mike ütiäte jai (Rom. 13:1). Juta ne erere känti mä ñan nüne ngwane o kukwe ükaninte mikare täte ne kwrere ñakare ngwane, mäkwe carro ngwandre neen jankunu ye raba kwin o ñakare yebätä mäkwe töbika.

MÄTA CARRO MIKE NEEN NGWANE DRE TÄ NEMEN BARE MÄBÄTÄ YEBÄTÄ TÖBIKE

Instituto Nacional sobre el Envejecimiento de Estados Unidos tä niere, nikwe kukwe ne kwrere ngwandretari jai:

• ¿Tita carro mike neen ngwane tärä okwä tä mikaninkä ji ngrabare yebätä ñan tä nemen nuäre ti kräke ñäkäkäre o kä ñan niena tuin deu tie?

• ¿Nuäre ti kräke dokwä kwitatekäre o nikrakäre espejo retrovisore tä carro dokwäte yete aune carro ñan tuin espejote yete ye mikakäre ñärärä (punto ciego)?

• ¿Kukwe ruäre ñan nuäre nuainkäre dötrö ti kräke nodre ti ngoto tadre acelerador yete ye kwitakäre dreke freno yete?

• ¿Tita carro ngwen bätäre krubäte ye köböite carro mada mada tä näin ti jiebiti ye tä näin bätäre?

• ¿Bä kabre tä nemen chi ti kräke matakäre jondron ruäre te?

• ¿Policía blitabarera tibe tita carro ngwen neen ño yebätä?

• ¿Tita carro ngwen ngwane tita kubienkä jabiti?

• ¿Tita kräkä ñain köböite ñan tä nemen nuäre ti kräke carro ngwankäre neen kwin?

• ¿Ti täbe carro mike neen yebätä ti mräkätre aune ja ketamuko tikwe tä ti töibikaire?

Kukwe ngwinintari nete nebätä mäkwe jän nini kukwe keteiti o ketebubätä ngwane, mä rabadre kukwe ruäre ukete jai yebätä töbike. Ñodre, deu mä ñan carro ngwandre krubäte. Aune, ruare ngwane mäkwe töbikatari mä raba carro ngwen neen jankunu o ño yebätä. Arato mä raba ngwentari mä mräkä o ja ketamuko mäkwe ie, mä raba carro ngwen neen ño bäri kwin, mä raba ja kite mada batita carro ngwandre ño kwin yebätä. Kukwe ngwinintari nete nebätä bäsi jökrä bätä mäkwe jän nini ngwane, mä ñan rabare carro ngwen neen jankunu ye bäri kwin.a

BIBLIA RABA MÄ DIMIKE ÑO KUKWE KWIN DEN JAI

Mä ñan niena carro ngwen kwin yebätä mä ñan mikadre neen jankunu ye mä ñan gain jabätä akwa niedre mäi ngwane, ñan rabai nuäre mä kräke ka ngäbitikäre. Kukwe ketebu ja jie ngwankäre ne raba mä dimike ja trä tuin kwin ye köböire mäkwe ja ngwain töbätä kukwe diankäre nuaindre jai.

Ni ñan raba kukwe jökrä nuainne ye mikadre nüke gare jai (Prov. 11:2). Ni jökrä kite umbre ye ngwane, kä kite tuin bukere nie, kukwe ñan kite ruin kwin nie, ni kwata tä kite nakwainkä ni di tä kite nekä aune ñan tä nemen nuäre ni kräke ja ngwankäre ngrenkä dötro. Nitre ruäre tä jadenkä jadaka ruärebätä, akwa kätä niken ta ngwane, jadaka ye raba nuainne tare tä nüke gare ie yebätä tä tuenmetre. Ye erere tä nemen bare ni carro ngwanka neen yebätä: kä rükai ngwane ñan rabai nuäre carro mikakäre neen ye raba nemen gare jabätä nie aune ni ñan tö ja nuain tare yebätä nikwe tuadremetre (Prov. 22:3). Ni mada kätä ni töibikaire niedre kwe nie ye ngwane, bäri kwin nikwe ja töi mikadre bobre aune kukwe jökrä ñan raba nemen bare nie ngwandre törö jai aune ni ye kukwe nuadre (2 Samuel 21:​15-17 mikadre ñärärä).

Ni ñan tö ja mikai ngite nitre mada murie ketabätä (Deut. 22:8). Ñan carro mikadre neen kwin ye ngwane, ni raba ja mike kukwe kri te. Nitre umbre ye kräke ñan niena nuäre carro mikakäre nen, akwa yebiti ta täbe nuainne ye ngwane, ja nire kwe aune nitre madakwe raba nemen kukwe tare te. Raba ja mike ngite krubäte ni mada murie ketabätä ñan ja mikabätä täte.

Mäkwe ñan carro mikadi neen jankunu ngwane, nitrekwe mä mikadi kötaikrä jai ye ñaka nütü. Jehovakwe mä tare krubäte mätä ja töi mike kwin yebätä ñodre, kukwe jökrä ñan nemen bare mäi ye mäta kain ngäbiti, mäta ja töi mike bobre aune mä ñan tö nitre mada nuain tare yebätä. Jehovakwe mä dimikadi aune mä töi mikadi jäme ye tä käbämike (Is. 46:4). Jehová ñaka mä mikaite kaibe. Mäkwe carro mikadi nen jankunu o ñakare yebätä mä tä töbikaitari ngwane, mäkwe kukwe kwin diandi nuaindre jai aune mäkwe ñaka kukwe ja jie ngwankäre Bibliabätä ye käi kwitadrekä jabiti ye mäkwe ribe ie orasionte.