¿Ñobätä nitre testiko Jehovakwe ñaka kruso ngwen jabätä?

Nitre kwati kräke kruso ye abokän tä mike gare ni iti abokän kristiano. Nitre testiko Jehovakwe ye kristiano akwa ñaka kruso ngwen jabätä aune ñaka mike Ngöböre jai. ¿Ñobätä?

Kena, Jesús krütani krusobätä ye Biblia ñaka mike gare jie, ñakare aune krütani kri kratibebätä. Arato tä kukwe niere metre ta ni kristiano ie: “ngöbö ngwarbe [...] ye ngäniene mun gitia”. Aune ja ükakröta yekänti kruso tädre ngwane jondron ngwarbe mikata ngöböre jai (1 Corintios 10:14; 1 Juan 5:21).

Ne madakäre, ni kristiano metre ye dre köböire rabai gare ye niarakwe mikani gare kukwe kwe nebiti: “Munkwe ja taredre kwärikwäri [...] ne ngwane, mun abko ja töitikaka tibe ye rabadi gare ni jökräye” (Juan 13:34, 35). Ye medenbätä, ni kristiano metre tä nemen gare, ñan kruso o jondron üai mikata ngöböre jai yebiti, ñakare aune tä ja tarere metre ye köböire.