Yobu Aliri Nde?

Haliri mulume muguma walilamire omu chihugo chaliyirikirwe Uzi, waliri aharamya Yehova. Ezino lyage aliri Yobu. Aliri muchire bwenene n’abantu b’omulala gwage baliri banene. Aliri muntu mwinja, aliri arhabala abakene, abakazi bafisize b’eba, n’abana bafisize abazere babo. Aliko si, bulala Yobu aliri ajira ebintu binja, k’okuderha okw’arhakachipatire ebibazo chiro?

Yobu arhaliyinji oku Shetani ali amukanira. Yehova abwira Shetani ntya: ‘Wabwene si omukozi wani Yobu? Nta muntu oli oku gulu oli kuguma naye. Ananyunviriza n’okujira ebintu binja.’ Shetani ashubiza ntya: ‘Nechi kweri Yobu anakukenga. Onamulanga n’okumugisha. Wamuhere eshwa n’ebirhungano. Omunyage ebyola byoshi, naye aleka kukuharamya.’ Yehova amubwira ntya: ‘Wakageregeza Yobu. Aliko ntaguhere oruhusa l’okumuyirha.’ Bulagurhe Yehova alekaga Shetani ageregeze Yobu? Alimenyere bwinja bwinja oku Yobu arhakaleka kumukenga chiro.

Shetani arhondera kugeregeza Yobu na bigeregezo binene. Ech’oburhanzi, Shetani arhuma abantu bayirikwa Basabeya bayibe enka n’epunda zage. Echakabiri, omuliro gwasingonyola entama zoshi za Yobu. Echakasharhu, echindi chigusho ch’abantu bayirikwa Bakaldayo bayiba engamiya zage zoshi. Abakozi baliri balagira ebyola birhungano byoshi bayirhwa. Naho haja hayinja echinjira chakane chibihire bwenene. Abana ba Yobu boshi bafa amango enju baliri bajirira mw’efete ebagwirako. Yobu avunika omurhima bwenene, aliko arhalekaga kuharamya Yehova.

Shetani alonza kushuba kulibuza Yobu bwenene, amulwaza ebimerera (ebivimba) oku mubiri gwage goshi. Yobu aliherhe malumwa manene bwenene. Arhalimenyere bulagurhe ebyola byoshi byaliri byamuhikira. Aliko, Yobu agenderera kuharamya Yehova. Mungu abona ebyola byoshi, asima Yobu bwenene.

Naho, Shetani arhuma balume basharhu bageregeze Yobu. Bamubwira ntya: ‘Okwanene kuba eyi wajirire echaha wanalonza kuchibisha. Mungu aly’akuhana.’ Yobu aderha ntya: ‘Nta chintu chibi najirire.’ Enyuma w’aho, ahwanza kuwaza oku Yehova yeli wamulerhera ebyola bibazo byoshi n’okuderha oku nkabaga hali echi Mungu aly’amulonzako n’obola nta gosa aherhe.

Musole muguma waliyirikirwe Elihu aliri ayunviriza bwisirire eyola nganiro. Naho, aj’aderha ntya: ‘Byoshi mwaderhere birhali by’okuli. Yehova ali mukulu bwenene kulusha nk’okurhumenyere. Arhakajira chiro echintu chibi. Anabona buli chintu n’okurhabala abali omu bibazo.’

Naho Yehova abwira Yobu ntya: ‘Ngahe waliri amango ndema embingu n’egulu? Bulagurhe oli waderha oku hali echintu ndi nakulonzako? Oli waderha, aliko orhamenyere bulagurhe ebila bintu bili byarhengerera.’ Yobu ayemera egosa lyage n’okuderha ntya: ‘Nachirhebekere. Nayunvirhe baderha oku bikulolere, aliko lero namaja nakumenya. Nta chintu chakakugamba chiro. Ombabalire oku binaderhere.’

Amango ebigeregezo bihwa, Yehova afumya Yobu n’okumuha bintu binene bwenene kulusha eby’aligwerhe burhanzi. Yobu alama myaka minene ey’anagwerhe busime bunene omu kalamo. Yehova agisha Yobu bulala alimuyunvirize chiro n’amango byalimukomerere kujira ntyo. Wayiganya Yobu si n’okugenderera kuharamya Yehova chiro ebintu byaba gurhe?