Musa Achishoga Kuharamya Yehova

Amango abantu b’omulala gwa Yakobo balilamire omu Misiri, bahwanza kuyirikwa Baizraeli. Enyuma w’olufu lwa Yakobo na Yosefu, owindi Farao muhyahya arhondera kurhegeka. Aliyubahire okw’Abaizraeli bagwarha emisi bwenene kulusha Abamisiri. Na ntyo, oyola Farao ajira Abaizraeli babe baja. Abaseza bayinje babumba amadofali n’okukola bwenene omu mashwa. Aliko okw’Abamisiri baliri babaseza bakole akasi kakomere bwenene, ku n’Abaizraeli baliri baluga bwenene. Bulala oyola Farao arhalisimire okuntu Abaizraeli baliri baluga, ahana erhegeko okw’abana boshi b’oburhabana b’Abaizraeli baburhwa bayirhwe. Wakaba nka wawaza kangana gurhe Abaisraeli balikwanene kuyubaha bwenene?

Mukazi muguma w’Omuizraeli waliyirikirwe Yokebedi, aligwerhe omwana w’oburhabana okwirire w’alichili njolyana (kabonjo). Y’alanga oyola mwana wage, amuheba omu chigapo n’okuja kuchibisha omu masheke omu Lwinji lwa Nile. Mwali-wabo oyola mwana w’oburhabana, yekala Miriamu, abera hofi-hofi y’alola gurhe ebintu byaba.

Mwali wa Farao abona echola chigapo amango ayinja kuyoga m’olola lwinji. Abona enjolyana eli yalira mw’echola chigapo, ayiyunvira obonjo. Miriamu amubaza ntya: ‘Nakaja kukulonzeza omukazi wakakuyonseza oyula mwana?’ Mwali wa Farao ayemera, na Miriamu aja kulerha nyina Yokebedi. Mwali wa Farao amubwira ntya: ‘Orhole eyila njolyana, ogende oyiyonsye, nji nakulipa.’

Amango oyola mwana akula, Yokebedi amuhekera mwali wa Farao, naye amuyirika Musa, n’okumulemba nka mwana wage yewe yenyine. Musa akula nka murhwali analiri apata buli chintu choshi alonzeze. Aliko Musa arhayibagiraga chiro Yehova. Alimenyere oku kweri ali Muizraeli s’arhali Mumisiri. Achishoga kukolera Yehova.

Abere ayeneza myaka 40, Musa achishoga kurhabala Abaizraeli. Amango abona Omumisiri ali ashurha muja muguma w’omu Baizraeli, amushurha bwenene n’okumuyirha. Naho, Musa amubisha omu muchanga. Farao ayunvirhe ntyo alonza kuyirha Musa. Aliko Musa alibirhira omu chihugo che Midiani. Yehova agenderera kumushishikala eyola munda.