Yoshua n’Abagibeoni

Emyazi okubilolere evile ye Yeriko, yamenyikana oku mandi mashanja m’omu Kanaani. Abami babo bachigusha haguma yibalwisa Abaizraeli. Aliko Abagibeoni bowe barhola omupango gurhali kuguma n’omupango gw’abola bami. Bayambala emyambaro eshajire, baja emunda Yoshua ali n’okumubwira ntya: ‘Rhwarhenga omu chihugo cha hale. Rhwayunvirhe emyazi okubilolere Yehova na byoshi abajirire omu Misiri n’omu Moabu. Orhulaganye k’orharhulwisa, nerhu rhwaba bakozi bawe.’

Yoshua ayemera ebi bamubwirire anaderha okw’arhabalwisa. Enyuma wa siku esharhu, amenya oku barharhengaga omu chihugo cha hale. Baliri b’omu chihugo che Kanaani. Yoshua abaza abola Bagibeoni ntya: ‘Bichi byarhumaga mwarhurhebeka?’ Bamushubiza ntya: ‘Rhwaliyubahire! Rhumenyere oku Yehova Mungu wenyu ali abalwira. Mwe mukalamamwe murharhuyirhaga.’ Yoshua ayeneza echilagane chage anabaleka bagenderere kulama.

Enyuma wa siku zigeke, bami barhano be Kanaani n’abasoda babo balwisa Abagibeoni. Yoshua n’abasoda bage balambagira obudufu boshi yi baja kubarhabala. Esezisezi olusiku lwakulikiragaho evita lyahwanza. Abakanaani barhondera kulibirha buli muguma oku lunda lwage. Buli hoshi balibirhiraga Yehova abasheshera k’olubula lw’amabale mazibu-zibu. Naho Yoshua ahema Yehova ayimanze ezuba. Bulagurhe ahemaga Yehova ajire ntyo n’obola nta mango ezuba lyachigerere kuyimanga embere w’ahola? Bulala Yoshua alilangalire Yehova. Ezuba lirhazikaga olola lusiku loshi kugera amango Abaizraeli bahimaga Abami be Kanaani n’abasoda babo.