Omurhegesi Muhyahya na Bakazi Babiri Bagwerhe Obushiru

Enyuma y’okuyerekeza abantu ba Yehova mu myaka minene, Yoshua afa ey’agwerhe myaka 110. Amango Yoshua alichiliho, Abaizraeli baliri baharamya Yehova. Aliko, Yoshua amalire kufa, Abaizraeli barhondera kuharamya esanamu, kuguma n’Abakanaani. Bulala Abaizraeli barhagendereraga kukenga Yehova, aleka mwami we Kanaani waliyirikirwe Yabini, ajira okuntu akalamo kabakomerere bwenene. Abantu barhondera kulakirira Yehova abarhabale. Nantyo Yehova abaha omurhegesi muhyahya, yekala Baraka. Akarhabere abantu bagalukire Yehova.

Mulebi-kazi muguma waliyirikirwe Debora, arhumwa emunda Baraka ali. Aligwerhe oburhumwa burhengere emwa Yehova. Amubwira ntya: ‘Orhole balume 10 000 oje buganana n’abasoda ba Yabini oku lwinji lwe Kishoni. Eyola munda, wahima Sisera, mukulu w’abasoda ba Yabini.’ Baraka abwira Debora ntya: ‘Nagenda aliko akaba nawe wankulikira.’ Amubwira ntya: ‘Nagenda nawe. Aliko omenye okw’arhali woyo wewayinja kuyirha Sisera. Yehova aderhere oku mukazi wamuyirha.’

Debora agenda na Baraka haguma n’abasoda bage oku musozi gwe Tabori, yibachirheganya kw’elyola vita. Sisera anayunvirhe ntyo, agusha emitugari yage y’evita n’abasoda bage omu lubanda. Debora abwira Baraka ntya: ‘Zene, Yehova akurhabala ohime elila vita.’ Baraka na balume bage 10 000 bayandagala oku musozi yibabuganana n’abasoda ba Sisera bagwerhe misi minene.

Yehova ajira okuntu amenji mayunjule omu lubanda lwe Kishoni. Emitugari y’evita ya Sisera yahwanza kuzika omu bishoho. Sisera arhenga omu mutugari gwage ahwanza kulibirha. Baraka n’abasoda bage bahima abasoda ba Sisera, aliko Sisera yewe afuma! Alibirha n’okuja kuchibisha omu hema lya mukazi muguma waliyirikirwe Yaeli. Amuha amarha, anywa naho amushukulira obulingirhi. Oyolo musoda wabaga achokere, aj’ero. Naho Yaeli agenda kubuyabuya ah’alilyalimire, arhola omusumari gw’ehema gulehere n’ehama, amutotolezago omu rhwe, afa.

Baraka ayinja kulonza Sisera. Yaeli ayumanga oku mulyango gw’ehema lyage n’okuderha ntya: ‘Yingira. Nakuyereka omulume oli walonza.’ Baraka ajiremo, abona Sisera alambukire ahashi ey’anafire. Baraka na Debora basingiza Yehova omu lwimpo, bulala arhabere Abaizraeli bahime abashombanyi babo. Abaizraeli balama omu murhula mu myaka 40 yakulikiragaho.