Ebibazo By’abanasoma Ebitabu Byerhu

Amango Daudi ayandikaga ebinwa bili omu Zaburi 61:8 aliderhere oku akuuza ezino lya Mungu “esiku n’amango.” K’okuderha oku aliri awaza oku arhakafa si?

Nanga. Ebi Daudi ayandikaga byaliri by’okuli.

Waza oku by’ayandikaga m’ogola mustari n’omuyindi eli nk’eyola: “Nayimpa olwimpo l’okusingiza ezino lyawe esiku namango oku n’andi nayeneza ebilapo byani lusiku oku lwindi.” “Nakukuuza, Yehova wee, Mungu wani, n’omurhima gwani goshi, nakuuza ezino lyawe esiku n’amango.” “Nakuuza ezino lyawe esiku n’amango n’amango moshi.”​—Zb. 61:8; 86:12; 145:1, 2.

Amango Daudi ayandika ebila binwa arhaliri awaza oku arhakafa chiro. Alimenyere oku Yehova aliderhere oku echaha ch’abantu chakalerhere olufu, na Daudi aliyemerere oku ali munya-byaha. (Mwa. 3:3, 17-19; Zb. 51:4, 5) Alimenyere oku chiro n’abantu Mungu aliyemerere nka Abrahamu, Isaka, na Yakobo, bafire. Kandi Daudi alimenyere oku hakahikire amango afa. (Zb. 37:25; 39:4) Aliko ebinwa byage bili omu Zaburi 61:8 biyerekene enyorha yage n’okuhigirira kwage okukuuza Mungu esiku n’amango, k’okuderha, amango moshi Daudi alilamire.​—2 Sa. 7:12.

Mango maguma Daudi aliyandikire oku bilolere byageragamo omu kalamo kage, nk’oku ebinwa by’omurhondero bye Zaburi ya 18, 51, ne ya 52 biyerekene. Omu Zaburi ya 23, Daudi ayerekene oku Yehova ali nka mungeri oli wayerekeza, oli walisa, n’okulanga entama zage. Daudi aliri nk’oyola mungeri. Analilonzeze kukolera Mungu ‘esiku zoshi z’akalamo kage.’​—Zb. 23:6.

Kandi oyibuke oku Yehova yewafuheraga Daudi byoshi ayandikaga. Omu by’ayandikaga muli amalebi maliderhere oku bilolere ebyakarhengerere buzinda. Omufano, omu Zaburi 110, Daudi alishambere oku bilolere akasanzi Waliha wage “akayikere ekulyo kwa [Mungu]” omu mbingu n’okuhabwa oburhwali. Ajire bichi? Akandagire Abanzi ba Mungu ‘n’okuchira olubanja amashanja’ oku gulu. Daudi ali muguma omu bashokuliza ba Masiya, wakarhegekere anali embingu wakanabere “mudahwa esiku n’amango.” (Zb. 110:1-6) Yesu aliderhere obulebi omu Zaburi 110 bwaliderhere oku bimulolere n’oku bwakashubire kuyenera omu mango mayinjire.—Mt. 22:41-45.

Nechi, Yehova aliyerekeze Daudi ayandike oku bilolere amango mage n’amango mayinjire amango akafuukire n’okukuuza Yehova esiku n’amango. Bobola Zaburi 37:10, 11, 29 ederhere oku bilolere amango yayandikwaga n’oku bilolere amango mayinjire. Obola bulebi buli mw’eyola mistari bwaliyenere omu mango ma mira omu chihugo che Izraeli na nji bwashuba kuyenera omu mango mayinjire amango Mungu ayeneza ebilagane byage.—Olole echifungo cha 8 ch’omwazi “Nji Waba Haguma Nani omu Paradizo,” guli mw’enola gazeti.

Bobola Zaburi 61:8 n’eyindi mistari eli nk’eyola eyerekene oku Daudi alilonzeze kukuuza Mungu omu Izraeli ya mira kuhika amango akafire. Kandi eyerekene ebi Daudi akagalire kujira amango mayinjire amango Yehova amufuula.