Yakobo Amahabwa Akashambala

Isaka aligwerhe myaka 40 amango ashaba Rebeka. Alimusimire bwenene. Enyuma wa mango malebe, baburha bana babiri b’oburhabana b’amahasha.

Chikuru bamuyirika Esau, na chidorho bamuyirika Yakobo. Esau asimaga kushiba omu lubala, analiyinji kuhiga bwinja enyama. Aliko Yakobo yewe agendaga asima kushiba ahambuga.

Mw’ezola siku, efula yakazaga kuhabwa shwa linene na furanga zinene amango eshe amafa. Ebyola byoshi baliri bamuha byaliyirikirwe kashambala. Omu mulala gwa Isaka, owakahabirwe akola kashambala yi Yehova akakoleseze omu kuyeneza echilagane ahaga Abrahamu. Esau arhalilagire chiro kw’ebyola bilagane, aliko Yakobo yewe alimenyere oku bili by’akamaro bwenene.

Lusiku luguma Esau arhenga kuhiga ey’aluhire (achokere) bwenene. Ayunva empumulo y’ebilyo bilokere bwenene Yakobo aliri avuya n’okuderha ntya: ‘Indi bufa n’enzara muza! Impa kw’elyola supu ly’omuduku oli wavuya!’ Yakobo amubwira ntya: ‘Naguha, aliko orhange oyemere oku wampa akashambala kawe.’ Esau aderha ntya: ‘Intalagire oku kashambala kani, okarhole, ochimpere ebi nalya!’ Owazize okw’echola chaliri chintu chinja Esau ajiraga si? Nanga chiro. Esau ahana echintu ch’akamaro bwenene oku bakuli ly’esupu lyonyine.

Amango Isaka ashaja bwenene, alonza kuhereza efula yage emigisho. Aliko Rebeka arhabala Yakobo, k’okuderha, omugala mudorho, ahabwe eyola migisho. Amango Esau amenya oku ntyo ku bili, agaya bwenene anahigirira kuyirha mwene-wabo. Isaka na Rebeka balonza balange Yakobo, naho bamubwira ntya: ‘Ogende obere emwa muyomba wawe Labani, kugera amango Esau arhulera.’ Yakobo ayunviriza ehano ly’abazere bage alibirhira eyo munda y’ayokola akalamo kage.