Yonatani Mulume w’Obushiru n’Obwimana

Omwana w’efula w’Omwami Sauli, k’okuderha Yonatani, agendaga alwa evita n’obushiru bwenene. Daudi aliderhere oku Yonatani aliri alibirha bwenene kulusha echihobera, analigwerhe misi minene kulusha esimba. Lusiku luguma Yonatani abona basoda 20 b’Abafilistini bayimangire oku musozi. Abwira ntya omusoda onaheka entwaro zage: ‘Yehova akarhuyereka echimanyiso rhwanabalwisa. Abafilistini bakarhuhamagala emunda bali, ahola rhwanamenya oku bihemere rhubalwise.’ Abafilistini bahamagala ntya n’omulenge: ‘Muyinje rhulwe!’ Naho abola balume bombi bazamuka oku musozi balwisa abola basoda n’okubahima.

Yonatani yi walikwanene kuba mwami wakulikiraho, bulala ye waliri fula ya Sauli. Aliko Yonatani alimenyere ku Yehova abaga achishogere Daudi abe mwami we Izraeli wakulikiraho. Chiro akaba ntyo, arhamuyunviraga obongwa. Yonatani na Daudi baba bera bwenene. Bahanana echilagane oku buli muguma alanga owabo n’okumulwira. Yonatani aha Daudi egoti lyage, omupanga, entwaro eli nka muguli, n’omukaba, y’amuyereka oku kweri ali mwira wage.

Amango aliri alibirha Sauli, Yonatani aja kumulola n’okumubwira ntya: ‘Ogwarhe emisi, onagwarhe obushiru. Yehova achishogere woyo obe mwami. Chiro na darha amenyere ntyo.’ Wakasima ogwarhe omwira oli kuguma na Yonatani si?

Turu zinene, Yonatani alihebere akalamo kage omu buhanya y’arhabala mwira wage. Alimenyere oku Mwami Sauli alilonzeze ayirhe Daudi, na ntyo abwira eshe ntya: ‘Inta chintu chibi Daudi ajirire; okamuyirha waba eyi wamajira echaha.’ Sauli ayunvira Yonatani burhe bunene. Hagerere myaka milebe, Sauli na Yonatani bafira chaligumira oku vita.

Enyuma w’olufu lwa Yonatani, Daudi alonza Mefibosheti, mugala wa Yonatani. Abere abona Mefibosheti, Daudi amubwira ntya: ‘Bulala yisho aliri mwira-wani w’oku murhima, nakurhabala omu kalamo kawe koshi. Walama ahamwani, kandi wayinja walira oku meza mani.’ Daudi arhayibagiraga mwira-wage Yonatani haba n’akatyu.