Yesu Amafuula Lazaro

Yesu aligwerhe bera basharhu. Lazaro na bali babo babiri, Mariya na Marta. Lusiku luguma, amango Yesu aliri oku lwindi lunda l’Olwinji Yordani, Mariya na Marta bamurhumira oburhumwa akwanene kushubizako juba-juba buderhere ntya: ‘Lazaro alwere bwenene. Wekalamawe oyinje juba-juba!’ Aliko Yesu arhajagayo aho han’aho. Alilingire hagere siku ebiri, naho abwira abanafunzi bage ntya: ‘Rhuje e Betaniya. Lazaro alyamire, najayo kumuchula.’ Entumwa zamushubiza ntya: ‘Akaba Lazaro alyamire, echola chamurhabala afume.’ Naho Yesu ababwira bwinja-bwinja ntya: ‘Lazaro afire.’

Amango Yesu agera e Betaniya, Lazaro abaga amamala siku 4 omu shinda. N’abantu banene baliri bayinja kurhuliriza Marta na Mariya. Amango Marta ayunva oku Yesu ahikire, agenda juba-juba kumukaribisa. Marta amubwira ntya: “Waliha, nka waliri hanola, musheja-werhu arhakafire.” Yesu amubwira ntya: ‘Musheja-wenyu afuuka. Marta, oyemerere echola si?’ Amushubiza ntya: ‘Inyemerere oku nj’afuuka amango m’obufuke.’ Yesu amushubiza ntya: “Nyono n’ebufuuke n’akalamo.”

Naho Marta aja emunda Mariya ali n’okumubwira ntya: ‘Yesu agerereho.’ Mariya ajakukaribisa Yesu n’abantu banene bamukulikira. Ahikire hofi na Yesu, afukama embere zage n’okuhwanza kulira bwenene. Abwira Yesu ntya: ‘Waliha, nkawaliri hano, musheja-werhu arhakafire!’ Amango Yesu abona Mariya agwerhe mugayo gunene, naye ava arhondera kulira. Abantu babwene Yesu ashesha emiziga, baderha ntya: ‘Yesu alizigire Lazaro bwenene.’ Aliko abandi baderha ntya: ‘Bulagurhe arhalifumize mwira wage y’arhafa?’ Gurhe Yesu alijirire?

Yesu aja oku shinda, bulala haliri olubale luzibu-zibu oku mulyango gw’eshinda. Aderha ntya: ‘Mukule elyola bale.’ Marta amubwira: ‘Aliko hamagera siku 4 eyafire! Kugera buno omubiri gwage gukwanene kuba eyigukala guli gwabaya.’ Aliko bakula elyola bale na Yesu asalira omu kuderha ntya: ‘Darha, koko okunyunviriza. Imenyere bwinja okw’amango moshi onanyunva, aliko kandi namaderha n’omulenge y’abala bantu boshi bali hanola bayemera oku woyo wewantumaga.’ Naho ahamagala ntya n’omulenge gunene: “Lazaro, huluka!” Naho harhengerera echintu chisomeze: Lazaro arhenga omu shinda. Bulala alichirhubirwe mw’ebiraka, Yesu aderha ntya: “Mumukule kw’ebyola biraka, mumuleke agende.”

Bantu banene bachiboneraga echola bagwarha obwemere mu Yesu. Aliko abandi bagenda kubwira Abafarisayo. Kurhenga agola mango, Abafarisayo bahwanza kulonza gurhe bakayirha Yesu na Lazaro. Muguma mu zila ntumwa 12, Yuda Eskariyote, agenda bwibisho kubuganana n’Abafarisayo n’okubabaza ntya: ‘Zinga mwandipa yimbayereka ngahe Yesu ali?’ Bayunvikana naye oku bamuha bichira 30 bye arja, naho Yuda ahwanza kulonza orozo gurhe akaheba Yesu omu fune z’Abafarisayo.