SOMO LYA 51
Gurhe Wakasimisa Yehova omu Luderho Lwawe?
Amango Yehova arhulema arhuha oluhembo lukwirire bwenene—oluhembo l’okuderha. Analaga n’okuntu rhunakolesa olola luhembo si? Nechi buzira ngangane! (Osome Yakobo 1:26.) Nka gurhe rhwakakolesa obola buhashe bwerhu b’okuderha omu kuntu kwakasimisa Yehova?
1. Gurhe rhwakakolesa bwinja oluhembo lwerhu l’okuderha?
Ebiblia erhubwirire oku “rhugenderere kuhirana omurhima n’okuyumbakana buli muguma n’owindi.” (1 Watesalonike 5:11) Hali abantu owazize, bakenere owabahira omurhima si? Gurhe wakarhabala bachiyunve bwinja? Obayereke k’obalagireko. Nkabaga wakababwira bichi obasimira. Ka wakawaza oku lwandiko lwakahira omurhima muntu mulebe omenyere? HaIi mandiko manene wakachishoga mw’amawakolesa. Oyibuke kandi k’obulyo oli waderha ebinwa, konyine kwakahira omurhima bwenene kulusha n’ebiwaderhere. Chechirhumire amango moshi ogende wachihangana kuganira bwinja n’obwirhonzi.—Mezali 15:1.
2. Binwa bya buko buchi rhurhakwanene kuderha?
Ebiblia ederhere: “Echinwa chibolere chirharhengaga omu bunu bwenyu.” (Osome Waefeso 4:29.) K’okuderha oku rhurhakwanene kukolesa ebinwa bibi, by’obukali, by’okurhonganya omuntu yachiyunva kubi. Kandi rhukwanene kuchiyasya okuveba abandi n’okubakomera.—Osome Mezali 16:28.
3. Bichi byakarhurhabala rhuderhe omu njira yokuyumbaka abandi?
Ahanene ebirhunaganira n’abandi binayerekana ebi rhuwazize n’okuntu yirhwachiyunva. (Luka 6:45) Che chirhumire bihemere rhuchikomeze kuseza obwenge oku bintu binja—k’okuderha ebintu by’okuli, bichere, byakasimwa, byakanasingizwa. (Wafilipi 4:8) Bihemere rhwanayengeha omu kuchishoga ebintu rhwachisimisa nabyo n’abera rhwakomerana nabo. (Mezali 13:20) Echindi chakarhurhabala kuli kurhanga kuwaza embere rhuderhe. Owaze gurhe ebyoli waderha byarhuma abandi bachiyunva. Ebiblia ederhere: “Ebinwa biderhwa buzira kuwaza binayinja byakerera nka ngorho, aliko olulimi lw’abengehe lunabuka.”—Mezali 12:18.
HUMBA BWENENE
Yiga nka gurhe wakaderha omu bulyo bwakasimisa Yehova n’okuhira abandi omurhima.
4. Ololereze eby’onaderha mangochi onabiderha na gurhe onabiderha
Mango maguma-maguma, rhweshi hali ebi rhunaderha buzinda ndeke rhwanachiganya. (Yakobo 3:2) Osome Wagalatia 5:22, 23, muje mwaganira kw’ebila bibazo:
Ngeso zihe mw’ezila wakahema omu sala zakakurhabala kulolereza bwinja oluderho lwawe? Gurhe ezola ngeso zakakurhabala?
Osome 1 Wakorinto 15:33, muje mwaganira kw’echila chibazo:
Kangana gurhe bera-bawe n’ebyonachisimisa nabyo byakahindamula oluderho lwawe?
Bichi byakarhuma wagwarha oluderho lubi ao lwinja?
Osome Muhubiri 3:1, 7, muje mwaganira kw’echila chibazo:
Mangochi bwakaba bwengehe okusira changwa okulindira akasanzi kenja k’okuderha chintu chilebe?
5. Oderhe abandi bwinja
Gurhe rhwakaleka kudukanga abandi changwa okubaderha kubi? Ziha EVIDEO, muje mwaganira kw’ebila bibazo.
Mw’eyila video, charhumaga oyu mwene-werhu abona oku ahindamule obulyo bwage b’okuganira n’abandi?
Bichi alijirire y’ahindamuka?
Osome Muhubiri 7:16, muje mwaganira kw’echila chibazo:
Bichi rhukwanene kuyibuka amango rhukala derha omuntu kubi?
Osome Muhubiri 7:21, 22, muje mwaganira kw’echila chibazo:
Gurhe amala mandiko makakurhabala orhakalihaga amango omuntu amakuderha kubi?
6. Oganire bwinja n’abantu b’omulala gwawe
Yehova alonzeze rhuganire n’abantu b’omulala gwerhu bwinja n’obuzigire. Ziha EVIDEO, muje mwaganira kw’echila chibazo.
Bichi byakakurhabala ogale kuganira bwinja omu mulala gwawe?
Osome Waefeso 4:31, 32, muje mwaganira kw’echila chibazo:
Binwa bya buko buhe byakayumbaka omulala?
Yehova aliyerekene gurhe aliri achiyunva oku bilolere omugala, Yesu. Osome Matayo 17:5, muje mwaganira kw’echila chibazo:
Nka gurhe wakayiga Yehova omu kuntu onaganira n’abantu b’omulala gwawe n’ebyonababwira?
Olonze mango mahe awo orozo l’okusingiza abandi
HALI ABANTU BANADERHA: “Inanderha ebyanangwire omu bwenge. Akaba abandi barhasimire ebi naderhere ebyola birhachindolere.”
Nawe oyemerere ntyo si? Akaba nechi, bulagurhe, akaba nanga bulagurhe?
OKU BUGEKE
Ebi rhuli rhwaderha, byakarhabala changwa bibabaze abandi. Bihemere rhuwaze bwinja oku birhwaderha, mangochi rhwakabiderha, na nka gurhe rhwakabiderha.
Rhuchiyibusye
Njira zihe ziguma wakakolesa mw’ebinwa byawe omu kurhabala abandi?
Luderho nyabachi rhukwanene kulekana nalo?
Bichi byakarhurhabala amango moshi enganiro yerhu ebe nyinja enahebere omurhima?
EYINDI MYAZI
Bichi byakarhurhabala rhuderhe ebinwa bihirire abandi omurhima?
Yiga ebyakakurhabala orhagwarhaga oluderho lubihire.
Aliko Si Okudukangana Kuvire Kwabiha?” (Mwazi guli oku jw.org)
Lola gurhe wakayaka okurhogera omu murhego g’okuvebana.
Lola gurhe Yehova arhabalaga mulume muguma waliri walwisa aleke kudukangana.