Orhabale Abandi Balembere omu Mango m’Ebibazo

1. Gurhe Yehova anazigana kushubiza amasala m’abakozi bage?

KA WALIMENYERE oku Yehova akakukolesa y’ashubiza oku masala m’okulakirira ma muntu mulebe? Wakahaana oburhabale chiro akaba oli mushamuka, mugwasi w’akasi, painiya, changwa onali muhubiri omu chibaga. Kandi wakanahaana oburhabale chiro wakaba oli musole, changwa mushaja, obe oli mwene-werhu changwa mwali-werhu. Amango muntu mulebe ozigiire Yehova amahema oburhabale, Mungu werhu anazigana kukolesa abashamuka changwa abandi bakozi bage bemana yibaba “shoko y’echirhulirizo chinene.” (Kol. 4:11) Rhusiimire bwenene kukolera bene-berhu mw’eyola njira! Rhwakagala kurhabala bene-berhu amango obulwala b’okuyahukira bwamarhengerera, ebinjira, changwa obupinzani.

ORHABALE ABANDI AMANGO OBULWALA B’OKUYAHUKIRA BWAMARHENGERERA

2. Bulagurhe byakaba bikomeere kurhabala abandi amango obulwala b’okuyahukira bwamarhengerera?

² Amango obulwala b’okuyahukira bwamarhengerera, bwakarhuma byarhukomerera kurhabalana buli muguma n’owindi. Rhwakaba rhulonzeze kulambagirira bene-berhu, aliko okujira ntyo kwakarhuheba omu buhanya. Hali n’amango rhwakaba rhulonzeze kuhamagala aha mwerhu balala bali omu bulagirire bw’efuranga bayinje rhusangire akalyo, aliko ebyola nabyo, birhakagalikana. Hali amango rhwakalonza rhurhabale abandi, aliko ebyola byakarhukomerera amango hali abantu omu milala yerhu bali bahurana ebibazo. Chiro akaba ntyo, rhulonzeze rhurhabale bene-berhu, na Yehova anasiima amango rhuli rhwajira ebi rhugalire yi rhubarhabala. (Mez. 3:27; 19:17) Bichi rhwakajira?

3. Bichi omufano gw’abashamuka b’omu chibaga cha Desi gwakarhuyigiriza? (Yeremia 23:4)

³ Eby’abashamuka bakajira. Akaba oli mushamuka, ochihangane omenye entama bwinja. (Osome Yeremia 23:4.) Mwali-werhu Desi rhwaderhagako omu mwazi guhwere aderhere ntya: “Abashamuka b’omu chigusho chani ch’amahubiri haguma n’abandi, rhwaliri rhwageza ebisanzi haguma omu mahubiri n’omu kuchisimisa.”b Obushiru bw’abola bashamuka bwalirhumire byabayorohera kurhabala Desi amango obula bulwala b’okuyahukira bw’Ekorona burhengerera, n’okuyirha bantu baguma b’omu mulala gwage.

4. Gurhe abashamuka bagalaga kurhabala Desi, na bichi birhuyigirize?

⁴ Desi afasiriye ntya: “Bulala nalikola menyere oku abashamuka bali bera bani, byalinyorohere kubabwira okuntu ndi nachiyunva n’eby’aliri byandaza.” Esomo oku bashamuka. Murhangule aba mukwanene kushishikala embere ebinjira birhengerere. Mube bera babo. Akaba hali obulwala b’okuyahukira bwakubuzize kurhangula bene-berhu na bali-berhu, ojire ntyo omu yindi njira. Desi aderhere ntya: “Mango maguma bashamuka banene balengene baliri bampamagala changwa kuntumira emesaje omu lusiku lon’olola. Amandiko me Biblia rhwasomaga haguma malimpumire oku murhima bwenene, chiro akaba oku nalimayinji bwinja.”

5. Nka gurhe abashamuka bakamenya bichi bene-berhu na bali-berhu bakenere, n’okubarhabala?

⁵ Njira nguma wakakolesa y’omenya ebi bene-benyu na bali-benyu bakenere, kuli kubabaza ebibazo birhakabakoza eshonyi. (Mez. 20:5) Ka bagwerhe ebilyo bitosheze, amafumu changwa ebindi bintu bakenere? Ka bali omu hali yakarhuma baheza akasi kabo changwa enju zabo? Ka bakenere rhubarhabale okuntu bakagwarha oburhabale bw’eguvernema akaba buliho? Bene-berhu na bali-berhu balihere Desi ebintu by’omubiri alikenere. Aliko obuzigire abashamuka bamuyerekaga n’echirhulirizo chirhengere omu Biblia bamuhaaga, by’ebyamurhabalaga bwenene. Aderhere ntya: “Abashamuka basalira haguma nani. Chiro akaba oku ntakachiyibuka bwinja byoshi baderhaga, nchiyibukire okuntu naliri nachiyunva. Aliri nka Yehova yi waliri aderha ntya, ‘Orhali wenyine.’”​—Isa. 41:10, 13.

6. Bichi banene bakajira omu chibaga yi barhabala abandi? (Olole efoto.)

⁶ Eby’abandi bakajira. Rhumenyere oku abashamuka banashishikala bene-berhu na bali-berhu omu chibaga. Aliko Yehova arhuhemere rhweshi rhuhebe abandi omurhima rhunabarhabale. (Gal. 6:10) Chiro akaba rhwakajira chijiro chigeke bwenene ch’obuzigire ch’okuheba omurhima abalwere, echola chakabarhabala bwenene. Omwana akarhumira mwene-werhu olwere amaruba omu kumuheba omurhima. Omusole akajiira mwali-werhu omu soko changwa kumujirira amandi makasi. Abandi omu chibaga bakavuyira omuntu olwere akalyo n’okumuhekerako emwage. Kweri, amango obulwala bwamayenera hoshi, buli muntu omu chibaga akeneere kuhebwa omurhima. Nkabaga wakabera kageke enyuma w’embuganano oli washambala na bene-benyu na bali-benyu changwa kushambala nabo kugerera e videokonferanse. N’abashamuka nabo bakenere kuhebwa omurhima. Bahamirizi banene barhumire amaruba m’okuderha koko oku bashamuka bazigana kukolera bene-babo na bali-babo bwenene amango obulwala b’okuyahukira bwamarhengerera. Kuli kwinja amango rhwamajira echigabi cherhu omu “kugenderera kuhebana omurhima n’okuyumbakana buli muguma n’owindi”!​—1 Te. 5:11.

ORHABALE ABANDI BALI BAHURANA EBINJIRA

7. Bichi byakarhengerera enyuma w’echinjira?

⁷ Echinjira chakavuruga akalamo k’omuntu omu kuzibya n’okuzibula. Abahikiirwe n’ebinjira bakaheza ebintu byabo amaju mabo changwa n’abazigirwa babo. Ebyola bintu bibi byakahikira bene-berhu na bali-berhu. Bichi rhwakajira yirhubarhabala?

8. Bichi abashamuka n’amarhwe m’emilala bakajira embere echinjira chirhengerere?

⁸ Eby’abashamuka bakajira. Bashamuka, murhabale bene-benyu na bali-benyu kuchirheganya embere echinjira chirhengerere. Okwanene omenye akaba boshi omu chibaga bamenyere bichi bakajira yibayorha omu bulanzi banali baganira n’abashamuka. Margaret rhwaderhagako omu mwazi gugerere, aderhere ntya: “Abashamuka berhu baderha omu chigabi obulagirire bw’echibaga, ok’omuliro gwakarhengerera omu eneo yerhu. Barhubwira oku, abarhegesi bakarhubwira oku rhuyake amaju merhu juba-juba, changwa oku ehali yamabiha, rhukwanene rhuyake han’ahola.” Bene-berhu barhuha emyazi omu kasanzi kakwanene bulala ehali yalikala kubiha, oluhira lwarhengerera enyuma wa maboso marhano. Amango m’obuharamye b’omulala, amarhwe m’emilala bakagalukira amahano malolere bichi buli muguma omu mulala akwanene kujira. Akaba woyo n’abana bawe muchirheganyize, byakagalikana bwenene muyorhe murhulerere amango echinjira chamarhengerera.

9. Nka gurhe abashamuka banachirheganya embere n’enyuma w’echinjira?

⁹ Akaba oli mwimangizi w’echigusho ch’amahubiri, ochizere ok’ogwerhe enimero z’etelefone n’eadrese zoshi z’abahubiri boshi bali omu chigusho chawe ch’amahubiri. Onajire ntyo, embere echinjira chirhengerere. Oyandike eliste y’abahubiri b’omu chigusho chawe, onalole buli mango akaba ezola adrese zili zabuno. Naho nji wagala kushambala na buli muhubiri n’okulola akaba hali eby’akenere amango ebinjira byamarhengerera. Orhumire buzira kulegama omwimangizi w’ebaraza ly’abashamuka eyola myazi, naye anaj’aganira n’omwimangizi w’omuzunguluko. Amango abola bene-berhu bamakola haguma, bakahaana oburhabale omu njira nyinja nk’oku bakanagala. Enyuma y’olola luhira, omwimangizi w’omuzunguluko wabo Margaret amalaga hofi siku ebiri buzira kuj’ero, aliri akola bwenene omu kuyumangira akasi abashamuka baliri bajira, amango baliri bachihangana kuganira n’okushishikala bene-berhu na bali-berhu hofi 450 balikwanene kurhenga omu maju mabo. Okujira ntyo, kwalirhumire byabayorohera kuhaana oburhabale. (2 Ko. 11:27) Bobola, buli muntu walikeneere ah’akabera, ahapata.

10. Bula gurhe abashamuka banabona k’okurhangula bene-babo na bali-babo yi babahira omurhima, kuli kw’akamaro? (Yohana 21:15)

¹⁰ Abashamuka bagwerhe akasi k’okukolesa Ebiblia omu kuheba bene-babo na bali-babo omurhima, n’okurhabala balala bali bachiyunva balagire. (1 Pe. 5:2) Amango echinjira chamarhengerera, ech’oburhanzi, abashamuka bakwanene bachizere oku buli mwene-werhu na mwali-werhu ali omu bulanzi, agwerhe ebilyo, emyambaro n’ah’okubera. Aliko, nkabaga n’enyuma wa myezi minene, bene-berhu na bali-berhu bachiba bakenere kuhebwa omurhima kugerera Ebiblia. (Osome Yohana 21:15.) Harold waliri akola omu Komite y’Omurhabi wabuganene na bene-berhu na bali-berhu banene bahurene n’ebinjira, aderhere ntya: “Binahema akasanzi y’omuntu ashuba kuchiyunva bwinja. Bakashuba kuhwanza kulama akalamo kahyahya, aliko bakagenderera kuyibuka abazigirwa babo bafire, ebintu by’akachiro bahezeze, changwa obuhanya bageragamo. Okola kurhali kubula obwemere s’aliko abantu banazigana kuchiyunva ntyo.”

11. Bichi emilala yakagenderera kulagirira? (Olole efoto.)

¹¹ Abashamuka banakulikira linola hano liderhere mpu: “Mulire haguma n’abali balira.” (Ro. 12:15) Abashamuka bakwanene kurhabala abola bahurene n’ebinjira bachizere oku Yehova na bene-babo na bali-babo bagenderere kubazigira. Abashamuka basiima kurhabala emilala egenderere kukola ebintu bili nk’ebila, okusalira, kuyiga, okuja oku mbuganano, n’okuja omu kasi k’amahubiri. Kandi abashamuka bakaheba omurhima abazere barhabale abana babo kuseza obwenge oku bintu ebinjira birhakaharabisa. Bazere wee, muyibuse abana benyu oku Yehova agenderera kuba Mwira wabo n’oku abarhabala amango moshi. Kandi obabwire oku buli mango baba omu mulala gwa bene-berhu na bali-berhu bali tayari kubarhabala.​—1 Pe. 2:17.

12. Bichi abandi bakajira yi bagala kuhaana oburhabale omu mango m’echinjira?

¹² Eby’abandi bakajira. Akaba echinjira chamarhengerera hofi n’ah’olamire, oheme abashamuka bakubwire gurhe wakarhabala. Nkabaga wakarhabala balala barhengere omu nju zabo balame aha mwawe, changwa nkabaga wakarhabala balala bali bahaana oburhabale oku bahurene n’echinjira bayinje balame aha mwawe. Wakachihangana kuhekera abahubiri bali omu bulagirire eby’okulya changwa ebindi bintu bakeneere. Na chiro echinjira chamarhengerera hale n’ah’oli, wakanachigala kuhaana oburhabale. Nka gurhe? Omu kuderha omu sala abola bahurene n’echinjira. (2 Ko. 1:8-11) Wakarhabala oku kasi k’okuhaana oburhabale omu kuhaana enshololo oku kasi k’omu gulu lyoshi. (2 Ko. 8:2-5) Akaba oli tayari kubalamira ah’echinjira charhengerere, obaze abashamuka bakubwire nka gurhe wakarhabala. Akaba wahamagerwe y’oja kuhaana oburhabale, warhanga koomezwa, na ntyo y’ogala kurhabala omu njira ekwanene.

ORHABALE BENE-BERHU NA BALI-BERHU BALEMBERE OBUPINZANI

13. Bibazo bihe bene-berhu na bali-berhu bali bahurana omu bihugo akasi kerhu kalahizwemo?

¹³ Omu bihugo akasi kerhu kalahizwemo, obupinzani bunarhuma akalamo kakomerera bwenene bene-berhu na bali-berhu. Bene-berhu na bali-berhu ba mw’ebyola bihugo bali bahurana echibazo ch’okubula efuranga, amalwala, n’okufisa abazigirwa babo. Aliko bulala akasi kerhu kalahizwe, byakakomerera abashamuka kulambagirira changwa kuganira na balala bakeneere kuhebwa omurhima. Ebyola byalihikiire Andrei rhwaganirako omu mwazi gugerere. Mwali-werhu muguma w’omu chigusho chage ch’amahubiri aliri ahurana echibazo ch’okubula efuranga. Mw’amola mango, ajira eaksida y’omutugari. Byalimuhemere aberwe kanene arhakanachigalire kukola. Chiro akaba akasi kerhu kalahizwe, haliri n’obula bulwala b’okuyahukira, bene-berhu bajirire nk’oku bakanagala na Yehova alimenyere ebyaliri byajirika.

14. Nka gurhe abashamuka bakayerekana omufano omu kulangalira Yehova?

¹⁴ Eby’abashamuka bakajira. Andrei asalira anajira eby’aligalire kujira. Nka gurhe Yehova alimushubize? Yehova akolesa bene-berhu banene omu chibaga bakagalire kujira binene yi barhabala oyola mwali-werhu. Baguma baliri baheka oyola mwali-werhu oku bitaro amango byalimuhemere abonane na munganga. Abandi baliri bamuha olufuranga l’okumurhabala. Yehova aliri ajira okuntu bajire koshi bakagala yi bamurhabala, anagisha obuguma bwabo n’obushiru baliri bayerekana omu kujira ntyo. (Ebr. 13:16) Amango makasi merhu maguma mamalahizwa, mubwire abandi barhabale. (Yer. 36:5, 6) Ech’akamaro bwenene, mulangalire Yehova. Akabarhabala mushishikale bene-berhu na bali-berhu.

15. Nka gurhe rhwakagendereza obuguma na bene-berhu na bali-berhu amango rhuli rhwapingwa?

¹⁵ Eby’abandi bakajira. Amango akasi kerhu kalahizwe, rhwakayinja rhwabuganana omu rhugusho rhutyu-rhutyu. Bobola, kuli kw’akamaro bwenene kulusha mira okuba n’omurhula aha garhi kerhu. Olwise Shetani s’orhalwisaga bene-benyu na bali-benyu. Orhasezaga obwenge bwawe obuzamba bwa mwene-wenyu changwa mwali-wenyu, changwa omenye walinga kasanzi kanene kagera murhanaza kumala echibazo mugwerhe. (Mez. 19:11; Efe. 4:26) Mube tayari kurhabalana buli muguma n’owindi. (Tit. 3:14) Oburhabale abandi bahaaga oyola mwali-werhu, bwalilerheere enyungu echigusho choshi ch’amahubiri. Bayegerana bwenene nka bantu ba mulala muguma.​—Zb. 133:1.

16. Nk’oku olwandiko lwa Wakolosai 4:3, 18 luderhere, nka gurhe rhwakarhabala bene-berhu na bali-berhu bali balibuzwa?

¹⁶ Ebihumbi bya bene-berhu na bali-berhu bali bakolera Yehova chiro akaba oku amarhegesi mali malahiza akasi kerhu. Baguma mu bo bashwekerwe omu pirizo eju y’obwemere bwabo. Rhwakabaderha omu masala merhu, emilala yabo, na balala bali bayerekana obushiru omu kushigikira bene-berhu na bali-berhu bashwekerwe, chiro akaba nabo bali omu buhanya oku bakashwekwa. Rhwakaheba omurhima abola bene-berhu bagenderere kulangalira Yehova n’oku abaha byoshi bakakenera n’okubaderhera oku tribinale.c (Osome Wakolosai 4:3, 18.) Omenye wayibagira chiro oku amasala mawe makarhabala abola bene-berhu boshi!​—2 Tes. 3:1, 2; 1 Ti. 2:1, 2.

17. Nka gurhe wakachirheganya zene oku bilolere amalibuko?

¹⁷ Woyo n’omulala gwawe mwakahwanza kuchirheganya kurhenga zene oku malibuko. (Mdo. 14:22) Omenye wawaza oku bintu byoshi bibi byakarhengerera. S’ahubwe, okomeze obwira bwawe haguma na Yehova onarhabale abana bawe nabo bajire ntyo. Akaba mango maguma onayunva olagire, obwire Yehova byoshi bi kuli oku murhima. (Zb. 62:7, 8) Mweshi nka mulala, muganire oku mpanvu zoshi zakarhuma mwamunihira.d Nka kulala binarhabala abana bawe amango oli wabarheganya oku binjira, wakashuba kubarhabala amango oli wabarheganya oku malibuko. Bagwarha obushiru n’okurhulera bulala wabayigirize kulangalira Yehova.

18. Bichi byarhuhikira omu mango mayinjire?

¹⁸ Omurhula gwa Mungu gunarhuma rhwachiyunva omu bulanzi. (Flp. 4:6, 7) Kugerera ogola murhula, Yehova anarhuleza omurhima gwerhu chiro akaba rhuli rhwahurana obulwala b’okuyahukira, ebinjira n’amalibuko, bili byarhuhumako zene. Ali akolesa abashamuka bali bakola bwenene omu kurhushishikala. Arhuhere rhweshi orozo l’okurhabalana buli muguma n’owindi. Akala kasanzi k’omurhula rhugwerhe zene, rhwakachirheganya oku bibazo byayinjire chiro n’oku “malibuko makulu.” (Mt. 24:21) Mu amola mango nji byarhuhema rhugenderere kulanga omurhula gwerhu, n’okurhabala abandi bajire ntyo. Aliko enyuma w’ebyola byoshi, rhurhakachihurana n’ebintu byakarhulerhera emilago. Lero, nji rhwaja rhwagwarha echintu Yehova ab’arhushulire buli mango, k’okuderha, omurhula g’okuli gunagenderere.​—Isa. 26:3, 4.