Orhabale Abanafunzi Bawe Bachishoge Kukolera Yehova

1-2. a) Bichi birhuma banafunzi baguma be Bibliya bagwarha engangane z’okuchishoga kukolera Yehova? b) Bichi rhwaganirako mu gunola mwazi?

WALIRI wagangana kuba Muhamirizi wa Yehova si? Nkabaga waliyubahire okw’abenyu banafunzi, bera bawe, changwa abantu b’omulala gwawe bakugaya bwenene bulala wabere Muhamirizi. Changwa nkabaga waliri wachiyunva nk’orhakafa wagalire kulama omu kukulikiza amakanuni ma Mungu. Akaba ntyo ku bili, wakayunva bwinja abanafunzi bawe bali bagangana kuchishoga kukolera Yehova.

² Yesu alimenyere k’obuba buli nk’obola bwakabuza omuntu kujira amajambere m’ekiroho. (Mt. 13:20-22) Aliko arhalivire alekera aho kurhabala balala baliri bagangana kuba banafunzi bage. S’ahubwe, aliyerekere abanafunzi bage gurhe bakarhabala abantu bali nk’abola 1) barhegere ebibazo bili byababuza kujira amajambere, 2) bakomeze obuzigire bwabo ku Yehova, 3) bahebe Yehova oku fasi y’oburhanzi omu kalamo kabo, 4) bagale kuhima ebibazo byabo. Nka gurhe rhwakakulikiza ebi Yesu abwiraga abanafunzi bage amango rhuli rhwakolesa echitabu Siimira Akalamo Esiku n’Amango! omu kurhabala abanafunzi berhu be Bibliya bachishoge kukolera Yehova?

ORHABALE ABANAFUNZI BAWE BARHEGERE EBIBAZO BILI BYABABUZA KUJIRA AMAJAMBERE

3. Nkabaga bichi byabuzaga Nikodemu kuba mwanafunzi wa Yesu?

³ Nikodemu, muntu muguma walimenyikene omu Bayahudi, alihurene echibazo chaliri chamubuza kuba mwanafunzi wa Yesu. Hagerere nka myezi ndarhu ntya kurhenga Yesu arhondere akasi k’amahubiri, Nikodemu arhegera oku Yesu ali murhumwa wa Mungu. (Yoh. 3:1, 2) Aliko, Nikodemu achishoga kuja kubuganana na Yesu bwibisho eju “y’okuyubaha Abayahudi.” (Yoh. 7:13; 12:42) Nkabaga aliri awaza okw’aheza binene akaba mwanafunzi wa Yesu.a

4. Gurhe Yesu alirhabere Nikodemu ayunve abi Mungu alonzeze ajirage?

⁴ Nikodemu aliyinji e Sheriya, aliko alikenere owamurhabala ayunve bwinja bichi Yehova alonzeze ajire. Gurhe Yesu alimurhabere? Yesu akolesa ebisanzi byage n’omurhima goshi, ayemera chiro abuganana na Nikodemu ebudufu. Yesu ayereka Nikodemu bwinja-bwinja eby’akwanene kujira y’aba mwanafunzi wage. K’okuderha ahungame ebyaha byage, abatizwe omu menji, anagwarhe obwemere mu Mugala wa Mungu.​—Yoh. 3:5, 14-21.

5. Gurhe rhwakarhabala omwanafunzi we Bibliya arhegere ebili byamubuza kujira amajambere?

⁵ Chiro n’omwanafunzi we Bibliya oherhe obumenyi bwe Bibliya , akaba ey’akenere owamurhabala kurhegera ebili byamubuza kujira amajambere. Akasi anakola, changwa obupinzani omu mulala, byakamuhugisa anafunda kurhola emihigo y’ekiroho. Bobola ochihe ebisanzi by’okurhabala omwanafunzi wawe. Wakamuhamagala mulye haguma akalyo, muchilambagize haguma, na mw’ebyola bisanzi akakubwira binene oku bilolere akalamo kage nantyo wanarhegera ebibazo akaba aherhe. Orhabale omwanafunzi wawe ahindamule ebintu akwanene kuhindamula, arhali mpu y’akusimisa, si y’ayerekana okw’azigire Yehova.

6. Nka gurhe wakarhabala omwanafunzi wawe apate obushiru b’okuchishoga kukolera Yehova? (1 Wakorinto 16:13)

⁶ Amango omwanafunzi we Bibliya amachizera oku Yehova akamurhabala kulama omu kukulikiza amakanuni me Bibliya , byakamuha obushiru b’okukolesa eby’ali ayiga. (Osome 1 Wakorinto 16:13.) Omwalimu we Bibliya ali kuguma n’omwalimu w’oku masomo. Ba nka wawaza amango waliri oku masomo, mwalimu oli gurhe wagendaga wasima bwenene? Nkabaga omwalimu wagendaga wakurhabala kubuyabuya-kubuyabuya ogale kurhegera oku gasi wakagala kujira eby’okwanene kujira. Intyo kon’oko, omwalimu mwinja we Bibliya arhafa chakuyigiriza ebi Mungu alonzeze rhujirage, s’aliko kandi anarhabala omwanafunzi achizere oku Yehova akamurhabala agale kuhindamula eby’akwanene kuhindamula omu kalamo. Gurhe wakaba mwalimu mwinja nk’oyo?

ORHABALE OMWANAFUNZI WAWE AKUZE OBUZIGIRE KU YEHOVA

7. Nka gurhe Yesu alirhabere abaliri bamuyunviriza bakuze obuzigire bwabo ku Yehova?

⁷ Yesu alimenyere ok’obuzigire ku Mungu, bwakashunika abanafunzi bage bakolese ebi bayigire. Aliri azigana kubayigiriza ebintu by’okubarhabala bakuze obuzigire kw’Eshe w’embingu Yehova. Omufano, alishushanyize Yehova n’eshe w’abana onahahira abana bage bwinja. (Mt. 7:9-11) Nkabaga, baguma omu baliri bayunviriza Yesu barhaligwerhe b’eshe babazigire. Ba nka wawaza gurhe bakachiyunvirhe amango bayunva Yesu ahana omufano gw’eshe wabana ogwerhe akababaro washubaga kukaribisa omugala wabaga ajirire bintu binenene bibihire. Bakabwene akababaro ka Yehova oku bana bage b’oku gulu.​—Lu. 15:20-24.

8. Nka gurhe wakarhabala omwanafunzi we Bibliya akuze obuzigire bwage ku Yehova?

⁸ Nawe wakarhabala omwanafunzi wawe we Bibliya akuze obuzigire ku Yehova omu kukaziza engeso za Mungu amango oli wamuyigiriza. Buli kuyiga naye omurhabale ayunve nka gurhe ebyali ayiga biyerekene oku Yehova arhuzigire. Amango muli mwaganira oku bilolere enchungu, orhabale omwanafunzi wawe ayunve oku Yehova arhahanaga omugala okwenge azigire abantu boshi konyine, si kandi bulala amuzigire yewe bwage-bwage. (Ro. 5:8; 1 Yo. 4:10) Hali ok’omwanafunzi akachiyunva ashunikirwe kuzigira Yehova, amango amawaza gurhe Yehova amuyerekere obuzigire yewe bwage-bwage.​—Gal. 2:20.

9. Bichi byarhabalaga omulume oyirikirwe Michael ahindamule akalamo kage?

⁹ Waza oku mufano gwa Michael w’omu Indonesie. Akulaga ey’ayinji okuli, aliko arhabatizwaga. Ayeneze myaka 18, abalamira omu chindi chihugo arhondera kutembeza akamiyo. Buzinda ashaba, aliko aleka omulala gwage y’aja kugendereza akasi kage omu chindi chihugo. Mw’ezola siku, mukage n’omwali barhondera kuyiga e Bibliya bajira n’amajambere. Nyina wa Michael abere afa, Michael achishoga okw’agaluka omu chihugo chage y’ashishikala eshe n’okugendereza efunzo lyage lye Bibliya . Amango ayiga engingo “Humba Bwenene” y’omu somo lya 27 ly’echitabu Siimira Akalamo Esiku n’Amango!, Michael ayunva bimuhumire oku murhima bwenene. Abere awaza okuntu Yehova akaba ey’aliri achiyunva okubona Omugala yalibuka, Michael ashesha emiziga. Agwarha shukrani nene oku bilolere enchungu, ayunva ashunikirwe ahindamule akalamo kage y’ajira amajambere n’okubatizwa.

ORHABALE OMWANAFUNZI WAWE AHEBE YEHOVA OKU FASI Y’OBURHANZI

10. Nka gurhe Yesu arhabalaga abanafunzi bage ba burhanzi bahindamule ebintu yi bagala kukolera Yehova bwenene? (Luka 5:5-11) (Olole n’efoto.)

¹⁰ Abanafunzi ba burhanzi barhalilegamire kurhegera oku Yesu ye Masiya walilaganyizwe, aliko balichikenere oburhabale yi bagala kuheba akasi k’okuhubiri oku fasi y’oburhanzi. Petro na Andreya babaga eyi babere banafunzi ba Yesu amango Yesu ababwira oku barhondere kukola naye amango moshi. (Mt. 4:18, 19) Barhulaga eyi banakola omu kasi k’okurhega efi kaliri kayololoka bwenene. Bishushire oku baliri bakola haguma na Yakobo na Yowane. (Mk. 1:16-20) Amango Petro na Andreya “baleka emilaga yabo,” byakashobokana oku babaga barholere emipango y’okubarhabala bagenderere kuhahira emilala yabo eyi banali bakulikira Yesu. Bichi byabarhabalaga bahire akasi k’okuhubiri oku fasi y’oburhanzi? Engani eli omu Luka erhubwirire oku Yesu alijirire echisomerene chakomezaga obwizere bwabo oku Yehova agwerhe obuhashe b’okubarhabala bapate ebi bakenere nka bamuhebere oku fasi y’oburhanzi.​—Osome Luka 5:5-11.

11. Gurhe wakakolesa ebi wagereremo omu kukomeza obwemere b’omwanafunzi wawe?

¹¹ Rhurhakagala kujira ebisomerene nk’oku Yesu ajiraga, aliko rhwakabalira abanafunzi berhu oku birhwagereremo biyerekene gurhe Yehova anarhabala balala banamuheba oku fasi y’oburhanzi omu kalamo kabo. Omufano, ochiyibukire okuntu Yehova akurhabalaga amango orhondera kuja oku mbuganano? Nkabaga byalikuhemere oheme omukulu wawe w’akasi oruhusa, omufasiriye bulagurhe orhagenda wakola enyuma w’esa z’akasi yi birhakubuza kuja oku mbuganano. Ok’onali wamubalira ebi wagereremo, ofasiriye omwanafunzi wawe gurhe obwemere bwawe bwakomeraga omu kubona gurhe Yehova yakurhabala amango ochishoga kumuheba oku fasi y’oburhanzi omu kalamo kawe.

12. a) Bulagurhe rhukwanene kugenda n’abahubiri ba buli lubero oku funzo lyerhu lye Bibliya? b) Nka gurhe rhwakakolesa amavideo bwinja omu kuyigiriza omwanafunzi werhu? Lerha omufano.

¹² Kuli kwinja abandi bene-berhu na bali-berhu babwire omwanafunzi wawe okuntu bahindamulaga akalamo kabo yi baheba Yehova oku fasi y’oburhanzi. Che chirhumire oyinje wagenda n’abantu ba buli lubero amango wamaja kuongoza efunzo lye Bibliya. Obaheme bafasiriye omwanafunzi wawe, gurhe bajaga omu kuli, na gurhe balijirire yi baheba akasi ka Yehova oku fasi y’oburhanzi omu kalamo kabo. N’echindi orhole akasanzi k’okulola amavideo haguma n’omwanafunzi wawe m’omu ngingo “Humba Bwenene” n’engingo “Eyindi Myazi” omu chitabu Siimira Akalamo Esiku n’Amango!. Omufano, amango muli mwayiga esomo lya 37, wakakaziza amakanuni marhengerere omu video Yehova Arhuha Ebirhukeneere.

ORHABALE OMWANAFUNZI WAWE AHIME EBIBAZO

13. Gurhe Yesu alibere arheganya abanafunzi bage oku bupinzani?

¹³ Yesu aliderhere turu zinene okw’abanafunzi bage bakahurene obupinzani burhengerere oku bandi bantu, chiro n’abantu b’omulala gwabo. (Mt. 5:11; 10:22, 36) Siku zigeke embere Yesu afe, abwira abanafunzi bage oku bakagerere n’ahabayirhwa okwenge tu bali baharamya Yehova. (Mt. 24:9; Yoh. 15:20; 16:2) Abaha omukonge oku babe merangwe amango bali omu mahubiri. Abahanula oku barhalwisaga abapinzani babo, s’aliko babe masu yi bagala kugenderera kuhubiri.

14. Gurhe rhwakarhabala omwanafunzi abe achirheganya oku bupinzani? (2 Timoteo 3:12)

¹⁴ Rhwakarhabala omwanafunzi achirheganye oku bupinzani omu kumufasiriya ebi akayunva oku babo bakozi, ku bera bage n’abantu b’omulala gwage. (Osome 2 Timoteo 3:12.) Baguma omu b’anakola nabo, bakaba eyi bali basimiswa n’okubona gurhe ahindamwire akalamo kage omu kukulikiza amakanuni me Bibliya. Abandi, chiro n’abantu b’omulala ba hofi-hofi, bakarhondera kumuderha kubi eju y’obwemere bwage buyumangire oku Bibliya. Oku rhwarheganya juba-juba abanafunzi berhu kulwisa obupinzani, ku banaba eyi bali tayari kubulwisa amango bwamahika.

15. Bichi byakarhabala omwanafunzi we Bibliya agale kulwisa obupinzani b’omulala?

¹⁵ Akaba omwanafunzi wawe yahurana obupinzani b’omulala, omuhebe omurhima awaze bichi byakaba byagayisize abola bachi bage. Bakaba eyi bali bawaza oku bamurhebekere, changwa eyi kwenge barhasima Abahamirizi ba Yehova konyine. Chiro na bantu baguma b’omu mulala gwa Yesu baliwazize okw’asirehere. (Mk. 3:21; Yoh. 7:5) Oyigirize omwanafunzi wawe kuba muntu onalindira n’okumenya kuganira bwinja n’abandi bantu, baheberwe mu n’abantu b’omulala gwage.

16. Gurhe rhwakarhabala omwanafunzi werhu we Bibliya abwire abandi oku bilolere obwemere bwage omu njira y’obukenge n’olugero?

¹⁶ Chiro abantu b’omulala bashusha nka basimisizwe, omwanafunzi akwanene kukolesa obwengehe omu kurhalonza kubafasiriya byoshi oku liguma. Nk’ajirire ntyo, byakalemerera abantu b’omulala gwage, n’echola chanarhuma barhachilonza kuganira naye oku bilolere obwemere bwage. Che chirhumire ohebe omwanafunzi wawe omurhima aganire n’abantu b’omulala gwage oku bilolere obwemere bwage omu njira yakarhuma nji bamuyunviriza agandi mango. (Kol. 4:6) Nkabaga akabahema baje oku site yerhu ye enternete jw.org. Echola chakarhuma bagala kuyiga binene oku bilolere Abahamirizi ba Yehova amango banalonzeze.

17. Gurhe wakakomeza omwanafunzi wawe kushubiza oku bibazo abantu bakabaza oku bilolere Abahamirizi ba Yehova? (Olole n’efoto.)

¹⁷ Wakakolesa emyazi y’enkulikirane “Ebibazo Abantu Bazigana Kubaza oku Bilolere Abahamirizi ba Yehova” eba oku jw.org omu kurhabala omwanafunzi wawe arheganye ebishubizo biyanguhire akashubiza oku bibazo abantu b’omulala gwage changwa ab’anakola nabo bakamubaza. (2 Ti. 2:24, 25) Oku buzinda bwa buli somo oganire haguma n’omwanafunzi wawe, oku ngingo “Hali Abantu Banaderha” y’omu chitabu Siimira Akalamo Esiku n’Amango!. Ohebe omwanafunzi wawe omurhima arheganye ebishubizo akaderha omu byage-byage binwa. Orhasitaga kuyereka omwanafunzi wawe enjira nyinja akafasiriya m’obwemere bwage. Ebisanzi by’okuchikomeza bili nk’ebyola byakamurhabala agale kuderhera obwemere bwage n’obwizere.

18. Gurhe wakaheba omwanafunzi wawe omurhima arhondere kuhubiri haguma n’echibaga? (Matayo 10:27)

¹⁸ Yesu alihere abanafunzi bage erhegeko oku bahubiri emyazi minja oku bantu boshi. (Osome Matayo 10:27.) Amango omwanafunzi wawe amarhondera kubwira abandi oku bilolere obwemere bwage buzira kulegama, kw’arhanalegama kuyiga kulangalira Yehova. Gurhe wakamurhabala ahikire ogola muhigo? Amango bamatangaza oku haba akampanye k’okuhubiri omu chibaga chenyu, ohire omwanafunzi wawe omurhima awaze gurhe akajira y’ayeneza ebihemerweho yi naye aba muhubiri. Omufasiriye bulagurhe banene babwene oku biba biyorohere okurhondera kuhubiri amango m’akampanye. Kandi akayunguka kugerera ebipindi by’okuchikomeza kuderha embere z’abantu binajirwa oku mbuganano z’ahakagarhi k’eboso. Amango amachihangana kuyeneza ebihemerweho y’arhondera kugeza ebipindi, ayiga gurhe akafasiriya obwemere bwage bwinja.

OYEREKE OMWANAFUNZI WAWE OK’OMUNIHIRE

19. Nka gurhe Yesu aliyerekene okw’alangalire abanafunzi bage, na gurhe nerhu rhwakamuyiganya?

¹⁹ Embere Yesu aje embingu alibwirire abanafunzi bage oku hali amango nji bashuba kuba haguma. Barhaliyunvirhe bwinja oku Yesu aliri aderha oku bilolere amango nji baja embingu. Chiro akaba okw’abanafunzi ba Yesu barhaliri bayunva bwinja byoshi aliri aderha, Yesu aliyerekene okw’achizerere okw’abanafunzi bage balonzeze kusimisa Yehova. (Yoh. 14:1-5, 8) Yesu alimenyere okw’abanafunzi bage bakenere ebisanzi yi bagala kuyunva bintu biguma-biguma, omufano, nk’obulangalire b’okulama embingu. (Yoh. 16:12) Kuguma na Yesu rhwakayereka abanafunzi berhu oku rhumenyere oku balonzeze kusimisa Yehova.

20. Gurhe mwali-werhu muguma w’omu chihugo che Malawi aliyerekene okw’achizerere omwanafunzi wage?

²⁰ Ochizere ok’omwanafunzi wawe alonzeze kukola ebintu binja. Rhurhole omufano gwa mwali-werhu oyirikirwe Chifundo w’omu chihugo che Malawi. Alirhondereseze efunzo lye Bibliya omu chitabu Siimira Akalamo Esiku n’Amango! n’omunyere muguma w’omukatolika oyirikirwe Alinafe. Amango bamala kuyiga esomo lye 14, Chifundo abaza omwanafunzi wage bichi awazize oku bilolere okukolesa esanamu omu buharamye. Alinafe ayunva oburhe amushubiza ntya: “Nakakolesa esanamu nka ndonzeze!” Enyuma waho Chifundo awaza oku nkabaga Alinafe akala kuleka kuyiga. Aliko Chifundo ayerekana engeso y’okulindira, anagenderera kuyiga na Alinafe ey’ananihire oku hali amango Alinafe nj’ayunva bwinja oku birhakwirire okukolesa esanamu omu buharamye. Hagerere myezi migeke, Chifundo amubaza echila chibazo chili omu somo lya 34: “Gurhe efunzo lyawe lye Bibliya n’okumenya Mungu w’okuli Yehova byakulerhere enyungu kugera bunola?” Chifundo aderhere ntya oku bilolere okuntu Alinafe amushubizaga: “Alinafe aliderhere bintu binene bisimisize. Chiguma omu byaderhaga aliyerekene okw’Abahamirizi ba Yehova barhajira echintu choshi-choshi e Bibliya ederhere oku chili chibi.” Harhalegamaga, Alinafe aleka kukolesa esanamu anava abatizwa.

21. Gurhe rhwakarhabala omwanafunzi werhu arhole esimikiro y’okukolera Yehova?

²¹ Chiro akaba oku Yehova “yenakuza,” rhugwerhe akasi k’okurhabala omwanafunzi ajire amajambere. (1 Ko. 3:7) Rhunajira binene kulusha okumuyereka konyine ebi Yehova alonzeze ajirage. Rhunamurhabala akuze obuzigire bwage ku Yehova. Kandi rhunamuheba omurhima ayerekane obuzigire bwage omu kuheba Yehova oku fasi y’oburhanzi omu kalamo kage. Rhunamuyigiriza okuntu akachizera oku Yehova amurhabala amango amahurana ebibazo. Amango rhwamayereka omwanafunzi werhu we Bibliya oku rhuchizerere okw’alonzeze kukola ebi Yehova asima, rhunaba eyi rhuli rhwamurhabala agwarhe obushiru b’okuchishoga kukolera Yehova.