SOMO LYE 15
Yesu ye Nde?
Yesu ali muguma omu bantu bamenyikene bwenene omu ngani yoshi. Bantu banene bayinji ezino lyage, aliko eyi barhamenyere binene oku bimulolere. N’abandi banene baherhe amawazo marhali kuguma oku bilolere Yesu ali nde kanuni. Bichi Ebiblia emuderhereko?
1. Yesu ye nde?
Yesu ali chilemwa ch’eroho oherhe emisi olamire embingu. Yehova Mungu yi wamulemaga embere w’ebindi byoshi. Echola chirhumire ayirikwa “ifula y’obulemi boshi.” (Wakolosai 1:15) Ebiblia eyirikire Yesu “Mwana muguma w’echinege” wa Mungu, bulala Mungu yenyine wamulemaga n’efune zage. (Yohana 3:16) Yesu aj’akola haguma n’Eshe, Yehova, omu kumugwasa kulema ebindi byoshi. (Osome Mezali 8:30.) Yesu agenderere kusiimira obwira bwa hofi-hofi haguma na Yehova. Anakola oku bwimana nka luderho lwa Mungu, k’okuderha “Kanwa,” omu kuhisa abandi k’oburhumwa n’amahano ma Mungu.—Yohana 1:14.
2. Charhumaga Yesu ayinja oku gulu?
Hamagera myaka 2 000 ntya kurhenga Yehova akolere echisomerene kugerera eroho lyage lichesibwa, arhuma akalamo ka Yesu kurhenga omu mbingu, akahira omu nda y’omunyere w’omubikira mpu ye Mariya. Nantyo, Yesu aburhwa nka muntu. (Osome Luka 1:34, 35.) Yesu ayinjaga oku gulu y’aba Masiya changwa Kristu walaganywaga, n’okuchungula abantu boshi.a Byoshi byalileberwe omu Biblia oku bilolere Masiya byamuyenererako, n’echola charhuma abantu bagala kurhegeera oku Yesu ye “Kristu, Mugala wa Mungu olamire.”—Matayo 16:16.
3. Ngahe Yesu akala aba?
Yesu amalire kufa nka muntu, Mungu amufula, aba malayika n’okugaluka embingu. Okw’anali eyo munda, “Mungu amushimika oku cheo ch’enyanya bwenene.” (Wafilipi 2:9) Bunola, Yesu aherhe echeo ch’oburhwali bunene loshi; yekulikire Yehova omu bukulu.
HUMBA BWENENE
Jaga walola ebindi biyerekene Yesu ye nde kanuni, na bulagurhe bili by’engenzi okuyiga oku bimulolere.
4. Yesu arhali ye Mungu Ogala-byoshi
Ebiblia ederhere oku chiro akaba Yesu ali chilemwa ch’eroho chiherhe emisi omu mbingu, anachirhohya embere za Mungu wage, Eshe Yehova. Chirhumire rhwaderha ntyo? Ziha EVIDEO olole bulagurhe Ebiblia eyigirize oku Yesu arhali yena Mungu ogala byoshi.
Amala mandiko marhurhabala rhuyunve Yesu ali muchi wa Yehova. Musome buli lwandiko muje mwaganira oku bibazo bikulikireho.
Osome Luka 1:30-32.
Gurhe malayika alifasiriye obuko buli ahakagarhi ka Yesu na Yehova Mungu, “oli Enyanya bwenene”?
Osome Matayo 3:16, 17.
Amango Yesu abatizwa, bichi omulenge gwarhengaga embingu gwaderhaga?
Owazize ku gwali mulenge gwande ogola?
Osome Yohana 14:28.
Inde oba mukulu onaherhe oburhwali oku wabo; omwana changwa eshe?
Yesu aliyirikire Yehova okw’ali eshe; bichi echola chirhuyigirize?
Osome Yohana 12:49.
Yesu aliwazize oku yewe yenyine yen’Eshe si? Gurhe owazize?
5. Bichi byayerekanaga oku Yesu ye Masiya?
Ebiblia eli mu malebi manene makarhabere abantu barhegeere Masiya; k’okuderha eyi Mungu achishogere achungule abantu boshi. Ziha EVIDEO olole malebi maguma Yesu aliyeneze amango ayinjaga oku gulu.
Musome amala malebi me Biblia muje mwaganira oku bibazo bikulikireho:
Osome Mika 5:2 y’omenya ngahe Masiya alikwanene aburhwe.b
Okuburhwa kwa Yesu kwaliyeneze obula bulebi si?—Matayo 2:1.
Osome Zaburi 34:20 na Zekaria 12:10 y’obona ebye Biblia yalibere yaderha oku bilolere olufu lwa Masiya.
Amola malebi maliyenere si?—Yohana 19:33-37.
Owazize oku Yesu yenyine wachijirisaga y’ayeneze obula bulebi si?
Bichi echola chikuyigirize oku bilolere Yesu?
6. Okuyiga oku bilolere Yesu kurhuherhere enyungu
Ebiblia eyerekene akachiro k’okuyiga oku bilolere Yesu, n’akasi agwerhe omu mupango gwa Mungu. Osome Yohana 14:6 ne 17:3, muje mwaganira kw’echila chibazo:
Bulagurhe bili bya ngombwa okuyiga oku bilolere Yesu?
Yesu afungwire enjira y’okuba mwira wa Mungu. Aliyigirize obukweri oku bilolere Yehova; na kugerera yewe, rhwakagwarha akalamo k’esiku n’amango
HALI ABANTU BANADERHA: “Abahamirizi ba Yehova barhaba bayemerere Yesu.”
Gurhe wakashubiza okubwirire ntyo?
OKU BUGEKE
Yesu ali chilemwa ch’eroho chiherhe emisi, Mugala wa Mungu, yena Masiya
Rhuchiyibusye
Bulagurhe Yesu ayirikirwe “ifula y’ebilemwa byoshi”?
Bichi Yesu aliri akola embere ayinje kunola gulu?
Gurhe rhumenyere oku Yesu ye Masiya?
EYINDI MYAZI
Yiga binene omu birhuyemezeze oku Yesu ye Masiya.
“Amalebi Malolere Masiya, Mayemezeze oku Yesu yena Yewe Si?” (Mwazi guli oku jw.org)
Lola akaba Ebiblia eyigirize oku Yehova y’eshe wa Yesu kuguma n’okw’abantu nabo banaba b’eshe w’abana.
“Bulagurhe Yesu Ayirikwa Mugala wa Mungu?” (Mwazi guli oku jw.org)
Lola bulagurhe obusharhu zirhali nyigirizo ze Biblia.
“Yesu Yena Mungu Si?” (Omunara g’Omulanzi, Lusiku 1 Mwezi gwa 4, 2009)
Osome oyunve gurhe akalamo ka mukazi muguma kahindamukaga amango ayiga bwenene ebye Biblia ederhere oku bilolere Yesu.
a Esomo lya 26 na 27 nji zayerekana bulagurhe rhwalikenere okuchungulwa, na nka gurhe Yesu arhuchungwire.
b Olole Amahugulo ma 2 y’obona obulebi bwalibere bwaderha bwinja-bwinja amango Yesu akayinjire oku gulu.