Obukulu Abashamuka Bagwerhe omu Chibaga

1. Panvu ehe erhumire omulala gwa Yehova gwagwarha obuguma?

RHUGWERHE busime bunene okubona oku rhuli omu mulala gwa Yehova. Bulagurhe omulala gwerhu gugwerhe omurhula n’obuguma bukomere ntyo? Mpavu nguma erhumire byaba ntyo, kuli kubona oku rhweshi rhunachihangana kukenga balala Yehova ahere bukulu bulebe. N’oku rhuli rhwagenderera kumenya bichi byarhumaga Yehova ajira ntyo, ku n’obuguma bwerhu bwagenderera kukomera.

2. Bibazo bihe rhwashubizako mu gunola mwazi?

² Mu gunola mwazi, rhwabona bande bagwerhe obukulu omu chibaga. Kandi rhwashubiza kw’ebila bibazo: Kasi kachi bali-berhu bagwerhe? Kweri si buli mwene-werhu ali rhwe lya buli mwali-werhu? K’obukulu abashamuka bagwerhe ku bene-berhu na bali-berhu buli kuguma n’obukulu erhwe ly’omulala agwerhe ku mukage n’abana? Rhurhange rhulole nka gurhe rhukwanene kubona bali-berhu.

NKA GURHE RHUKWANENE KUBONA BALI-BERHU?

3. Bichi byakarhurhabala rhubone oku akasi bali-berhu bali bakola kali k’akamaro bwenene?

³ Rhusimisizwe bwenene na bali-berhu bali bakola bwenene yi bashishikala emilala yabo, yi bahubiri emyazi minja, n’okurhabala abandi omu chibaga. Rhwakabona oku bali b’akamaro bwenene omu kumenya okuntu Yehova na Yesu banababona. Rhwashuba kumenya okuntu rhwakakolera abakazi, omu kulola okuntu entumwa Paulo aliri abakolera.

4. Nka gurhe Ebiblia eyerekene oku Yehova anabona abakazi oku bali b’akamaro kuguma n’abalume?

⁴ Ebiblia eyerekene oku Yehova anabona abakazi oku bali b’akamaro kuguma n’abalume. Omufano, Ebiblia eyerekene oku omu mango m’entumwa, Yehova alihere abalume n’abakazi eroho lichesibwa n’obuhashe b’okukola ebisomerene nk’okuderha ndimi zinene. (Mdo. 2:1-4, 15-18) Oyibuke oku boshi balishigirwe amavurha n’eroho lichesibwa n’oku boshi nji bajirhegeka haguma na Yesu. (Gal. 3:26-29) Abakazi n’abalume boshi nji bapata oluhembo l’okulama esiku n’amango oku gulu. (Ufu. 7:9, 10, 13-15) Na boshi bahabirwe akasi k’okuhubiri n’okuyigiriza emyazi minja. (Mt. 28:19, 20) Omufano, echitabu cha Matendo chiganirire eju ya mwali-werhu waliyikirwe Prisila, yewe n’eba Akila baliri bafasiriya bwinja-bwinja okuli kw’Ebiblia omulume waliyirikirwe Apolo, walisomere bwenene.​—Mdo. 18:24-26.

5. Nka gurhe olwandiko lwa Luka 10:38, 39, 42 luyerekene oku Yesu aliri akenga abakazi?

⁵ Yesu alihere abakazi olukengo. Arhaliri akulikira emigenzo y’Abafarisayo baliri basuzagura abakazi barhakanashambere nabo embere z’abantu, n’ahanene barhakashambere nabo oku bilolere amandiko. Aliko Yesu yewe, alichangire abalume n’abakazi omu nganiro aligwerhe haguma n’abandi banafunzi bage elolere amandiko.b (Osome Luka 10:38, 39, 42.) Anali yemerere abakazi babalame naye omu kasi k’okuhubiri. (Lu. 8:1-3) Kandi Yesu alibahere olukengo l’okumenyesa entumwa zage oku afukire.​—Yoh. 20:16-18.

6. Nka gurhe Paulo aliyerekene oku akengere abakazi?

⁶ Entumwa Paulo alibwirire Timoteo oku akenge abakazi. Paulo amubwira oku ayinje abona “abakazi bakulire nka banyina” n’okubona “abakazi bachili misole nka bali-babo.” (1 Ti. 5:1, 2) Paulo alirhabere bwenene yi Timoteo aba Mukristu okomere ekiroho, aliko alimenyere oku nyina wa Timoteo na nakulu, babamuyigirizaga ob’oburhanzi “amandiko machesibwa.” (2 Ti. 1:5; 3:14, 15) Paulo arhaderhega konyine akasi bali-berhu baliri bakola, aliko aliyerekene oku agwerhe eshukrani nene ku byoshi abola bakazi baliri bakola.​—Ro. 16:1-4, 6, 12; Flp. 4:3.

7. Bibazo bihe rhukola kuganirako?

⁷ Nk’oku ebifungo birhangire biyerekene, nta lwandiko n’oluguma luyerekene oku bali-berhu barhagwerhe akamaro kuguma na bene-berhu. Bali-berhu banagwerhe obuzigire banarhabala echibaga bwenene, n’abashamuka nachizera oburhabale bwabo b’okulerha omurhula n’obuguma omu chibaga. Aliko rhuchikenere ebishubizo kw’ebila bibazo. Omufano: Bulagurhe Yehova ahemere mwali-werhu afunike erhwe mu bisanzi biguma? Bulala bene-berhu bonyine bakwanene kuba bashamuka na bagwasi b’akasi, ka kuli kuderha oku buli mwene-werhu ali rhwe lya buli mwali-werhu omu chibaga?

KA BULI MWENE-WERHU ALI RHWE LYA BULI MWALI-WERHU?

8. Nk’oku olwandiko lwa Waefeso 5:23 luyerekene, ka buli mwene-werhu ali rhwe lya buli mwali-werhu? Ofasiriye.

⁸ Echishubizo ali nanga! Mwene-werhu arhali rhwe lya bali-berhu boshi bali omu chibaga; Kristu y’erhwe lyabo. (Osome Waefeso 5:23.) Omu mulala, omulume ye yimangire mukage. Omurhabana obatizwe arhali rhwe lya nyina. (Efe. 6:1, 2) N’omu chibaga, obukulu abashamuka bagwerhe ku bene-berhu na bali-berhu bugwerhe emipaka. (1 Te. 5:12; Ebr. 13:17) Omunyere ochili mulamba orhachilamire haguma n’abazere bage, anagenderera kubakenga n’okukenga abashamuka. Aliko, kuguma n’abalume omu chibaga, boshi bagwerhe muntu muguma obayimangire, Yesu.

9. Bulagurhe bihemere bali-berhu bafunike erhwe mu bisanzi biguma?

⁹ Aliko okuderha okuli, Yehova ahere abalume akasi k’okuyigiriza n’okuyimangira obuharamye omu chibaga, arhahagana abakazi akola kasi. (1 Ti. 2:12) Bulagurhe? Empanvu enali kuguma n’eyarhumaga Yesu ashimikwa nka rhwe ly’omulume, k’okuderha oku y’ebintu bigenda oku mustari omu mulala gwa Yehova. Nka hali ehali zirhumire mwali-werhu akola akasi kakwanene kukolwa na mwene-werhu, ahola Yehova amuhemere afunike erhwe lyage.c (1 Ko. 11:4-7) Yehova arhabwirire bali-berhu bajire ntyo mpu bulala ababonerere, aliko abahere enjira bakayerekamo oku bakengere akanuni k’obukulu ahibireho. Lero rhukala kuja rhwashubiza ku chinola chibazo: Bukulu buli gurhe amarhwe m’emilala n’abashamuka bagwerhe?

OBUKULU AMARHWE M’EMILALA N’ABASHAMUKA BAGWERHE

10. Bichi byakarhuma omushamuka awaza oku akaheba amarhegeko omu chibaga?

¹⁰ Abashamuka banazigira Kristu, banazigira ‘n’entama’ Yehova na Yesu babahere bashishikale. (Yoh. 21:15-17) Bulala omushamuka alagire oku chibaga, hali oku akawaza oku ali nk’eshe wabalala balimo. Akawaza oku bulala erhwe ly’omulala anahereza abantu b’omulala gwage amarhegeko, omushamuka naye akaheba h’amarhegeko abwene oku makalanga entama za Mungu. Hali na bene-berhu na bali-berhu baguma bayinja bahiba abashamuka omurhima baleme bakola nka marhwe mabo m’ekiroho omu kubabwira baleme bababwira echi bajira. Aliko si abashamuka omu chibaga n’amarhwe m’emilala bagwerhe obukulu buli kuguma?

11. Nka gurhe obukulu bw’amarhwe m’emilala n’obw’abashamuka bihuzenye?

¹¹ Entumwa Paulo aliyerekene oku hali ah’akasi k’erhwe ly’omulala n’ak’omushamuka bihuzenye. (1 Ti. 3:4, 5) Omufano, Yehova asimire abantu b’omulala bakenge erhwe ly’omulala. (Kol. 3:20) Analonzeze abantu bali omu chibaga bakenge abashamuka. Yehova asimire amarhwe m’emilala n’abashamuka bashishikale ehali y’ekiroho ya balala bayimangire. Kandi boshi bakwanene kurhabala balala bayimangire bachiyunve bwinja. Na kuguma n’amarhwe minja m’emilala, abashamuka bakwenene kuchizera oku balala bayimangire bali bapata oburhabale omu mango m’ebibazo. (Yak. 2:15-17) Oku bwindi, Yehova abwirire abashamuka n’amarhwe m’emilala barhabale abandi bakenge amarhegeko mage, aliko kandi abahanwire bamenye “bachubuka ebi yandikirwe” omu Biblia.​—1 Ko. 4:6.

12-13. Nk’oku olwandiko lwa Waroma 7:2 luyerekene, ngahe obukulu bw’amarhwe m’emilala n’obw’abashamuka bulekene?

¹² Aliko, hali ah’obukulu bw’abashamuka n’obw’amarhwe m’emilala bulekene bwenene. Omufano, Yehova ahere abashamuka akasi k’okucha emanja omu chibaga, anabaha akasi oku babakwanene kuheba embuga y’echibaga abanya-byaha barhahungamire.​—1 Ko. 5:11-13.

¹³ Aliko kandi, Yehova ahere amarhwe m’emilala kasi kabele arhahaga abashamuka. Omufano, Yehova ahere erhwe ly’omulala oruhusa l’okuheba amarhegeko omu mulala gwage, n’okulola akaba abantu b’omulala gwage bali bamakenga. (Osome Waroma 7:2.) Omufano, erhwe ly’omulala akaderha sa zinga abana bakwanene kuhika ahambuga obudufu. Anagwerhe oruhusa l’okuhana abana bage nka bamagambwa kukenga elyola rhegeko. (Efe. 6:1) Kweri, erhwe ly’omulala ogwerhe obuzigire, anarhanga kuganira na mukage embere ahebe amarhegeko omu nju bulala bombi bali “mubiri muguma.”d​—Mt. 19:6.

OKENGE KRISTU BULALA ALI RHWE LY’ECHIBAGA

14. a) Nk’oku ebinwa bya Marko 10:45 biderhere, bulagurhe Yehova abonaga oku Yesu ye kwanene kuba rhwe ly’echibaga? b) Kasi kachi Ebaraza Lirhambwire ligwerhe? (Olole echisanduku “Akasi k’Ebaraza Lirhambwire.”)

¹⁴ Kugerera enchungu, Yehova agulire akalamo ka buli muntu oli mu chibaga n’aka buli muntu yeshi wakayerekana obwemere mu Yesu. (Osome Marko 10:45; Mdo. 20:28; 1 Ko. 15:21, 22) Che charhumaga ashimika Yesu ye bage rhwe ly’echibaga bulala ye wahanaga akalamo kage nka nchungu. Che chirhumire, Yesu agwerhe oruhusa l’okuheba amarhegeko abantu bakwanene kukulikira omu milala n’omu chibaga choshi. Anakwanene kulola akaba rhuli rhwakenga bwinja-bwinja amola marhegeko. (Gal. 6:2) Aliko Yesu arhaheba h’amarhegeko konyine. Anashishikala bwinja n’okuzigira buli muguma werhu.​—Efe. 5:29.

15-16. Bichi ebinwa bya mwali-werhu oyirikirwe Marley n’ebya mwene-werhu Benjamin bikuyigirize?

¹⁵ Bali-berhu banayerekana oku bakengere Kristu, omu kukulikira obwerekezi banapata kurhenga oku balume bashimikirwe bashishikale. Mwali-werhu oyirikirirwe Marley, olamire omu Etats-Unis, aderhere ebinwa bili mw’amawazo bali-berhu banene bajira. Aderhere ntya: “Kweri inambona oku akasi njira nyono nka mukazi na Mukristu omu chibaga, kaba k’akamaro. Nkwanene kuchihangana bwenene yi ngenderera kukenga obukulu Yehova ahere bani n’abashamuka. Aliko bani na bene-berhu b’omu chibaga banarhabala yi binyorohera okujira ntyo bulala bankengere n’okuyerekana kangana gurhe basimisizwe n’akasi ndinakola.”

¹⁶ Bene-berhu banayerekana oku bakengere omupango g’obukulu omu kuyereka bali-berhu olukengo. Mwene-werhu muguma oyirikirwe Benjamin, olamire omu Angleterre, aderhere ntya: “Nayigire binene kugerera ebishubizo bali-berhu bahana oku mbuganano, n’amawazo banahana oku bilolere okuntu rhwakayiga, okuhubiri n’okuyigiriza bwinja. Nambona oku akasi banakola kali k’akamaro bwenene.”

17. Bulagurhe rhukwanene kukenga omupango gwa Yehova g’okuha bantu baguma obukulu?

¹⁷ Amango buli muntu omu chibaga, abe mulume, mukazi, erhwe ly’omulala changwa mushamuka, amamenya n’okukenga akanuni k’obukulu, echibaga chanagwarha omurhula. N’echakamaro bwenene, rhwaha Darha w’obuzigire w’embingu Yehova, obukuze.​—Zb. 150:6.