Bichi Echitabu cha Ufunuo Chiderhere oku Mango Mawe Mayinjire?

1. Muhigo guhe gw’akamaro buli yeshi akwanene arhole?

ZENE abantu bagwerhe esimikiro y’akamaro bakarhola. Ka bashigikira Yehova Mungu oli Murhegesi w’amahanga moshi, changwa baja oku lunda l’omwanzi wage Shetani Ibilisi? Buli muguma werhu akwanene achishoge lunda luhe ajako bulala ntaye wakabera ahagarhi-garhi changwa ntaye nji waderha oku nta lunda aliko. Ebi bachishoga byayerekana akaba nji bagwarha akalamo k’esiku n’amango changwa nanga. (Mt. 25:31-33, 46) Amango “m’amalibuko makulu,” nji bahirwa kw’echimenyeso ch’okuyokoka changwa ch’okulimbulwa.—Ufu. 7:14; 14:9-11; Eze. 9:4, 6.

2. a) Bichi olwandiko lwa Waebrania 10:35-39 lurhubwirire rhujire? b) Nka gurhe echitabu cha Ufunuo chakarhurhabala?

² Osome Waebrania 10:35-39. Akaba wachishogere kushigikira oburhegesi bwa Yehova, wachishogere echintu ch’akamaro. Zene, okala ogwerhe enyorha y’okurhabala abandi nabo barhole omuhigo gwinja. Y’ogala kujira ntyo, wakakolesa emyazi eli omuchitabu cha Ufunuo omu kubarhabala. Echola chitabu chisimisize chiyerekene ebintu nji byahikira balala banapinga Yehova, aliko kandi chiyerekene okuntu nj’agisha balala bashigikire oburhegesi bwage oku bwimana. Rhukwanene rhuyibuke obula bukweri bw’akamaro. Okujira ntyo kwakomeza omuhigo gwerhu g’okugenderera kukolera Yehova. Oku bwindi, rhwakakolesa ebi rhwayigire omu kurhabala abandi bachishoge kukolera Yehova banagenderere kujira ntyo.

3. Bichi rhwaganirako mu gunola mwazi?

³ Mu gunola mwazi, rhwaganira ku binola bibazo bisharhu: Bichi nji byahikira balala bashigikire oburhegesi bwa Mungu? Oku lwindi lunda, bichi nji byahikira balala bali okulunda lw’echinyalubala ch’omuduku chiganirirwe omu chitabu cha Ufunuo?

BICHI NJI BYAHIKIRA BALALA BALI BIMANA KU YEHOVA

4. Chigusho chihe entumwa Yowane alibwene chili haguma na Yesu omu nbingu?

⁴ Omu chibonekezi chiguma, entumwa Yowane alibwene bigusho bibiri bishigikire oburhegesi bwa Yehova nji byanahabwa emigisho y’esiku n’amango. Echigusho ch’oburhanzi bali bantu 144 000. (Ufu. 7:4) Bachishogerwe oku gulu yi baja kurhegeka haguma na Yesu omu Bwami bwage bw’embingu. Nji barhegeka egulu haguma naye. (Ufu. 5:9, 10; 14:3, 4) Yowane alibabwene omu chibonekezi eyi bayimangire haguma na Yesu oku musozi Sayuni, k’okuderha omu mbingu.​—Ufu. 14:1.

5. Bichi byahikira hanola hofi abashigwa bachili oku gulu bali mu balala 144 000?

⁵ Kurhangira omu siku z’entumwa kuhika zene, banene bachishogerwe yibayeneza oluganjo lwa bantu 144 000. (Lu. 12:32; Ro. 8:17) Aliko bamabwira Yowane oku bantu bageke bonyine mubo banji baba bachiyorhere hanola oku gulu omu siku z’obuzinda. Abola “bayorhere” nji bahebwa “kw’akashe” kabo k’obuzinda kayerekene oku bayemererwe na Yehova embere amalibuko makulu mayinje. (Ufu. 7:2, 3; 12:17) Enyuma w’ahola omu kasanzi kalebe, omu mango m’amalibuko, abola bashigwa bayorhere nji bahekwa embingu n’okubugana ababo babaga bafire banali bimana bali omu luganjo lwa 144 000. N’eyola munda, nji barhegeka haguma na Yesu omu Bwami bwa Mungu.​—Mt. 24:31; Ufu. 5:9, 10.

6-7. a) Chindi chigusho chihe Yowane abonaga, na bichi rhwayiga oku bichilolere? b) Bulagurhe abashigwa bayorhere na balala b’omu “chigusho chinene” bakwanene kusimiswa n’ebiderherwe omu chitabu cha Ufunuo sura 7?

⁶ Enyuma y’okubona echigusho chili embingu, Yowane abona “ab’omu chigusho chinene.” Tofauti n’ab’omu chigusho cha 144 000, ab’omu chigusho chinene bowe, ntaye oyinji oluganjo lwabo. (Ufu. 7:9, 10) Bichi rhumenyere ku bo? Babwira Yowane ntya: “Abala bali balala barhengere omu malibuko makulu, bameshere ebishuli byabo n’okubijira mweru omu shagama ya Mwana-buzi.” (Ufu. 7:14) Enyuma y’okufuma amalibuko makulu, “ab’omuchigusho chinene, nji balama hanola oku gulu n’okusiimira migisho minene.​—Zb. 37:9-11, 27-29; Mez. 2:21, 22; Ufu. 7:16, 17.

⁷ Rhube rhwachishogerwe kuja kulama omu mbingu changwa kubera hanola oku gulu, ka rhuyemerere oku nji rhwachibonera amango ebiderherwe omu chitabu cha Ufunuo sura 7 nji byayenera? Nechi rhukwanene kuchizera byo. Akola nji kaba kasanzi kasimisize bwenene kw’ebyola bigusho byombi by’abakozi ba Mungu! Nji rhwayunva mwishingo gunene bulala rhwachishogere okushigikira oburhegesi bwa Yehova. Bichi bindi echitabu cha Ufunuo chirhubwirire oku bilolere amalibuko makulu?​—Mt. 24:21.

BICHI NJI BYAHIKIRA BALALA BANAPINGA MUNGU

8. Nka gurhe amalibuko makulu nji mahwaza, na gurhe bantu banene nji bajira?

⁸ Nk’oku rhwalibwene omu mwazi gugerere, amarhegesi ma linola gulu nji marhera Babiloni Mukulu, k’okuderha amadini moshi m’obubeshi m’omu gulu. (Ufu. 17:16, 17) Ogola nji gwaba murhondero gw’amalibuko makulu. Echola nji charhuma bantu banene bahwanza kukolera Yehova si? Nanga. Ahali h’okujira ntyo, Ufunuo sura 6 eyerekene okw’akola kasanzi k’amalibuko, abantu barhali bakolera Yehova nji balonzeza obulanzi oku barhegesi b’epolitike n’oku bachuruzi balinola gulu bashushanyizwe n’emisozi. Bulala abo bantu nji baba barhali oku lunda l’Obwami bwa Mungu, Yehova nj’ababona oku bali bigamba.​—Lu. 11:23; Ufu. 6:15-17.

9. Nka gurhe abantu ba Mungu nji babonekana wazi oku barhali kuguma n’abandi bantu omu mango m’amalibuko makulu, na bichi nji byahikira abantu ba Yehova?

⁹ Kweri, abakozi bimana ba Yehova nji babonekana wazi oku barhali kuguma n’abandi bantu mw’agola mango m’amalibuko. Nji baba chigusho chiguma chonyine oku gulu chili chakolera Yehova Mungu chanalahire kushigikira “echinyalubala.” (Ufu. 13:14-17) Bulala bagenderere kubera bimana ku Yehova, balala bali bapinga Yehova nji bagwarha burhe bunene. N’echola nji charhuma amashanja machihebere haguma nji marhera abantu ba Mungu oku gulu lyoshi. Ebiblia echiyirikire chirhero cha Gogu wa Magogu.​—Eze. 38:14-16.

10. Nk’ok’olwandiko lwa Ufunuo 19:19-21 luderhere, gurhe Yehova nj’ajira amango abantu bage nji barherwa?

¹⁰ Gurhe Yehova nj’ajira amango abantu bage nji barherwa kubi ntyo? Arhubwirire ntya: “Oburhe bwani bukalihire nji bwakoleera.” (Eze. 38:18, 21-23) Ufunuo sura 19 erhubwirire ebi nji byakulikiraho. Yehova nj’arhuma omugala alange abantu bage n’okuhima abanzi bage. “Oburungu b’omu mbingu” buheberwe mu bamalayika bimana na balala 144 000 haguma na Yesu, nji balwisa Gogu wa Magogu. (Ufu. 17:14; 19:11-15) Nka gurhe elyola vita nji lyahwa? Abantu boshi n’ebigusho byoshi binapinga Yehova, nji byalimbulwa byoshi!​—Osome Ufunuo 19:19-21.

ENYUMA W’ENTAMBALA, HANABA OBUHYA

11. Echihe ch’akamaro bwenene chishamberwe omu chitabu cha Ufunuo che chihe?

¹¹ Jaga wawaza okuntu abimana ba Mungu bali oku gulu nji bachiyunva amango bayokoka okulimbulwa loshi kw’abanzi ba Mungu! Mu agola mango, nji bagwarha mwishingo gunene loshi! Chiro akaba oku nji haba mpundu zinene z’omwishingo omu mbingu amango Babiloni Mukulu nj’alimbulwa, hali echindi chintu nji chalerha omwishingo gunene kulusha ogola. (Ufu. 19:1-3) Che chintu ch’akamaro bwenene chishamberwe omu chitabu cha Ufunuo, k’okuderha “obuhya b’Omwana-buzi.”​—Ufu. 19:6-9.

12. Nk’oku biderherwe omu lwandiko lwa Ufunuo 21:1, 2, mangochi obuhya b’Omwana-buzi nji bwaba?

¹² Mangochi obuhya bwajirwa? Abashigwa boshi oku banali 144 000 nji baba bali omu mbingu embere evita lya Armagedoni liyinje. Aliko, arhali k’akasanzi obuhya b’Omwana-buzi nji bwaba. (Osome Ufunuo 21:1, 2.) Obuhya b’Omwana-buzi nji bwaba enyuma y’okulimbulwa kw’abanzi boshi ba Mungu oku vita lye Armagedoni.​—Zb. 45:3, 4, 13-17.

13. Bichi nji byajirika oku buhya b’Omwana-buzi?

¹³ Bichi nji byajirika oku buhya b’Omwana-buzi? Obuhya bunaheba omulume n’omukazi haguma. Konakuguma, obuhya b’Omwana-buzi nji bwaheba Yesu Kristu n’omuhya wage, k’okuderha balala 144 000 haguma. Ogola nji gwaba murhondero g’oburhegesi buhyahya nji bwarhambula egulu myaka 1 000.​—Ufu. 20:6.

EVILE Y’OBUKUUZE N’AMANGO MAWE MAYINJIRE

14-15. Bichi echitabu cha Ufunuo sura 21 ehuzenye na balala 144000? (Olole efoto eli oku chiganda.)

¹⁴ Esura ya 21 nayo y’echitabu cha Ufunuo ejire yahuzanya balala 144000 n’evile ekwirire bwenene eyirikirwe “Yerusalemu Mpyahya.” (Ufu. 21:2, 9) Eyola vile eyumbakirwe oku musinji gwa mabale 12 mayandikirwe ku “mazino 12 m’entumwa 12 z’Omwana-buzi.” Bulagurhe echola chalikwanene kusimisa Yowane? Bulala alibwene ezino lyage liyandikirwe ku liguma mw’amola mabale. Olola luli lukengo lunene!​—Ufu. 21:10-14; Efe. 2:20.

¹⁵ Eyola vile y’omufano nta yindi chiro eshushire nayo. Yaligwerhe ebarabara likulu ly’eoro echere, milango 12 y’amagerha m’akachiro, n’ebibambazi byayo byalipambirwe n’amabale m’akachiro, n’ebipimo byayo byoshi byaliri bingana-ngana. (Ufu. 21:15-21) Aliko, byalibonekene oku hali echintu chalibulireho! Echola chi Yowane arhubwirire: “Intabonaga ehekalu mw’eyola vile bulala Yehova Mungu Ogala byoshi ye hekalu yayo n’Omwana-Buzi. Eyola vile erhakeneere ezuba changwa omwezi by’okuyimolekera bulala obukuuze bwa Mungu b’obwaliri bwayimolekera n’Omwa-buzi y’ewaliri tara lyayo.” (Ufu. 21:22, 23) Balala bajirire Eyerusalemu mpyahya nji baba haguma na Yehova. (Ebr. 7:27; Ufu. 22:3, 4) Che chirhumire Yehova na Yesu bali hekalu mw’eyola vile.

16. Bichi nji byahikira abantu amango m’Oburhegesi bwa Myaka Chihumbi y’Obwami bwa Mungu?

¹⁶ Binasimisa abashigwa amango bamawaza kw’eyola vile. Aliko balala bagwerhe obulangalire b’okulama oku gulu nabo bagwerhe empanvu y’okusimiswa n’eyola vile. Amango m’Oburhegesi bwa Myaka Chihumbi b’Obwami bwa Mungu, Eyerusalemu Mpyahya nji yalerha migisho minene erhakaganjwa. Yowane alibwene eyola migisho yasuka nka “lwinji lw’amenji m’akalamo.” Oku shira zombi z’olwinji haliri emirhi eli yakula ebibabi “by’okufumya amashanja.” (Ufu. 22:1, 2) Abantu boshi nji baba balamire mw’amola mango, nji bayunguka n’ebyola bintu byoshi. Kubuyabuya, abantu boshi bakengere Mungu, nji bahikira obushinganyanya. Harhakachibaho chiro obulwala, amalumwa, n’emiziga y’akahinda.​—Ufu. 21:3-5.

17. Nk’oku Ufunuo 20:11-13 eyerekene, bande nji bayunguka n’Oburhegesi bwa Myaka Chihumbi?

¹⁷ Bande nji bayunguka n’eyola migisho? Bali balala bali omu chigusho chinene nji bafuma oku Armagedoni n’abana boshi nji bakaba baburhirwe omu gulu lihyahya. Aliko na Ufunuo sura 20 nayo elaganyize oku abafire nji bafuka. (Osome Ufunuo 20:11-13.) Abemana “b’okunali” bafaga mira haguma “n’abarhali b’okunali,” barhagwarhaga orozo l’okuyiga oku bilolere Yehova, boshi nji bafuka n’okulama hanola oku gulu. (Mdo. 24:15; Yohana 5:28, 29) K’okuderha si oku buli yeshi nj’afuka n’okulama oku gulu amango m’Oburhegesi bwa Myaka Chihumbi b’Obwami bwa Mungu? Nanga. Balala boshi balahiraga orozo l’okukolera Yehova embere bafe, nji barhafuka. Balihaabirwe orozo, aliko bayerekana ku barhakwanene akalamo oku gulu lya hindukire Paradizo.​—Mt. 25:46; 2 Te. 1:9; Ufu. 17:8; 20:15.

ECHIGEREGEZO CH’OBUZINDA

18. Gurhe ebintu nji byaba bili oku buzinda bwa myaka 1000?

¹⁸ Oku buzinda bwa myaka 1 000, balala boshi nji baba balamire oku gulu nji baba bakala bagwerhe akalamo kashinganyanya. Nta muntu yeshi nji waba alamire oku gulu nji wachigwarha engaruka ashokolaga ku Adamu. (Ro. 5:12) Omuvumo gw’echaha rhwashokolaga ku Adamu nji gwaba gwakulirweho loshi. Balala boshi nji baba bali oku gulu nji “bajirwa baguma-guma” bulala nji baba bakala bantu bashinganene oku buzinda bwa myaka 1 000.​—Ufu. 20:5.

19. Bulagurhe echigeregezo ch’obuzinda chili ch’akamaro?

¹⁹ Rhumenyere oku Yesu alihimire amashumi ma Shetani m’okumugeregeza aleke obushwekerezi bwage ku Mungu. Aliko ahima echola chigeregezo. Aliko si, abantu boshi nji babera bemana embere za Yehova amango Shetani nj’ahabwa orozo l’okubageregeza? Buli muguma werhu nj’agala kushubiza kw’echola chibazo amango Shetani nj’ashwekulwa kurhenga omu abiso oku buzinda bwa myaka 1 000. (Ufu. 20:7) Balala nji bagenderera kuba bimana amango m’echigeregezo chizinda nji bagwarha akalamo k’esiku n’amango na buzinda banasiimira obuhuru b’okuli. (Ro. 8:21) Balala bachijirire bigamba nji balimbulwa esiku n’amango haguma na shetani n’abazimu bage.​—Ufu. 20:8-10.

20. Gurhe ochiyunvirhe oku bilolere obulebi busimisize buli omu chitabu cha Ufunuo?

²⁰ Gurhe oli wachiyunva enyuma y’okumala kuganira oku bintu bigeke bili omu chitabu cha Ufunuo? K’osomezwe omu kubona ok’obula bulebi busomeze buli bwayenera? Ka birhakushunikire ohamagale abandi bachihebe haguma nerhu omu kuharamya Mungu werhu omu buharamye buchere? (Ufu. 22:17) Bulala rhwamaganira kw’ebila bintu bisimisize nji byaba omu mango mayinjire, rhugwerhe obusime rhunalonzeze kuderha nk’oku entumwa Yowane naye aderhaga: “Amen! Oyinje, Waliha Yesu.”​—Ufu. 22:20.