Ogenderere Kukomeza Obulangalire Bwawe bwe Chikristu

1. Bulangalire buchi Yehova arhuhere?

YEHOVA arhuhere obulangalire bwinja bwenene bw’akalamo k’esiku n’amango. Baguma bagwerhe obulangalire b’okulama omu mbingu nka bilemwa by’ekiroho birhakafa. (1 Ko. 15:50, 53) Aliko abandi banene bagwerhe obulangalire b’okulama oku gulu eyi banagwerhe amagala mashinganyanya n’obusime. (Ufu. 21:3, 4) Rhube rhugwerhe obulangalire b’okulama omu mbingu changwa oku gulu, obulangalire bwerhu buli bw’akachiro bwenene ku rhwabo.

2. Bichi obulangalire bwerhu buyumangireko, na bulagurhe rhwakaderha ntyo?

² Echinwa “bulangalire,” nk’oku chikolesezwe omu Biblia, chiderhere “okunihira oku ebintu binja byarhengerera.” Obulangalire bwerhu oku bilolere amango mayinjire nji bwayenera bulala burhengere emwa Yehova. (Ro. 15:13) Rhumenyere eby’arhulaganyize, kandi rhumenyere oku buli mango anayeneza ebilagane byage. (Hes. 23:19) Rhuchizerere oku Yehova agwerhe enyorha n’emisi y’okuyeneza buli chintu choshi aderhere oku ajira. Obulangalire bwerhu, burhali bilorho konyine changwa ebintu rhulonzeze oku birhengerere; s’aliko obulangalire rhugwerhe buyumangiire oku bintu rhumenyere oku bili by’okuli.

3. Bichi rhwaganirako mu gunola mwazi? (Zaburi 27:14)

³ Darha w’embingu arhuzigiire analonzeze rhumulangalire. (Osome Zaburi 27:14.) Amango obulangalire bwerhu emwa Yehova bukomere, rhwagala kulembera ebibazo bya zene, kandi rhwagwarha obushiru n’omwishingo g’okulembera ebibazo by’amango mayinjire. Rhujage rhwashambala oku kuntu obulangalire bwerhu bwakarhulanga. Rhwarhanga kushambala nka gurhe obulangalire bwerhu buhuzenywe n’enanga, n’esapo y’echuma. Rhwaja rhwashambala oku kuntu rhwakakomeza obulangalire bwerhu.

OBULANGALIRE BWERHU BULI NKA NANGA

4. Nka gurhe obulangalire buli nka nanga? (Waebrania 6:19)

⁴ Omu maruba mage ayandikiraga Abaebraniya, entumwa Paulo alishushanyize obulangalire bwerhu n’enanga. (Osome Waebrania 6:19.) Bulala Paulo alikomeere kubalama omu nyanja, alimenyere gurhe enanga yaliri yakoleswa y’echombo chimenye chahehulwa. Mango maguma aliri abalama omu chombo amango echihusi chikalihire bwenene chibashimana oku nyanja. Abona gurhe abakozi b’omu chombo baliri bakabula enanga omu nyanja y’echombo chirhahehulwa n’okuchishurha oku ntaza zakabera echombo. (Mdo. 27:29, 39-41) Nka kulala enanga enarhuma echombo chabera haguma, obulangalire bwerhu bunarhurhabala rhubere hofi na Yehova, yirhurhahehulwa amango rhuli rhwahurana ebibazo bili nka chihusi chikomere bwenene. Obulangalire bwerhu bunarhurhabala rhubere rhurhulerere amango rhuli rhwahurana ebibazo bulala rhumenyere oku ebintu byahindamuka. Oyibuke oku Yesu alirhukengusize oku nji rhwalibuzwa. (Yoh. 15:20) Bobola, okukengera oku bi Yehova arhulaganyize kwarhurhabala rhugenderere kumukolera.

5. Nka gurhe obulangalire bwalihebere Yesu emisi embere afe?

⁵ Waza okuntu obulangalire bwalirhabere Yesu abere mwimana chiro akaba alimenyere oku alibuka embere afe. Omu lusiku lwe Pentekose y’omwaka gwa 33 N.K.Y., entumwa Petro agalukira obulebi buli omu Zaburi bwaliyerekene bwinja-bwinja okuntu Yesu aligwerhe obwizere n’okurhulera: “Nalama oku bulangalire; bulala nj’orhandeka omu Shinda, changwa kuleka omwimana wawe asherere . . . Nji wanyunjuza omwishingo gunene bwenene embere zawe.” (Mdo. 2:25-28; Zb. 16:8-11) Chiro akaba oku Yesu alimenyere oku afa, aligwerhe obulangalire bukomere oku Mungu akamufulire n’oku akagwarhire omwishingo g’okushuba kuba haguma n’Eshe omu mbingu.​—Ebr. 12:2, 3.

6. Bichi mwene-werhu muguma aderhaga oku bilolere obulangalire?

⁶ Obulangalire bwerhu bw’Echikristu bwarhabere bene-berhu na bali-berhu banene balembere. Rhushambale oku mufano gwa Leonard Chinn, mwene-werhu mwimana walilamire omu Angleterre. Omu mango m’Evita lya Burhanzi lye Gulu Lyoshi, ashwekwa bulala alilahire kuja omu chisoda. Ashwekwa mwezi ebiri yoshi omu kasho, n’enyuma w’ahola bamuseza ayinje akola akasi kakomere bwenene. Buzinda, ayandika ntya: “Ebi nageragamo byalintabere menye kangana gurhe rhukenere obulangalire yirhugala kulembera. Rhugwerhe omufano gwa Yesu, entumwa, abalebi, kandi rhugwerhe bilagane binja bwenene bili omu Biblia. Ebyola byoshi binarhuha obulangalire bukomere bw’amango mayinjire n’okurhuheba emisi yirhugala kulembera.” Obulangalire bwalirhabere Leonard, bwakaba nka nanga emwerhu nerhu.

7. Nka gurhe ebibazo byerhu binakomeza obulangalire bwerhu? (Waroma 5:3-5; Yakobo 1:12)

⁷ Amango rhwamalembera ebibazo n’okuchibonera okuntu Yehova ali arhurhabala, rhwanarhegera oku Yehova arhuyemerere n’echola chanakomeza bwenene obulangalire bwerhu. (Osome Waroma 5:3-5; Yakobo 1:12.) Obwemere bwerhu bukala bukomere bwenene kulusha amango rhwayemeraga emyazi minja burhanzi. Shetani alonzeze ebibazo byerhu birhulyameko, aliko kugerera oburhabale bwa Yehova, rhwakalembera ebibazo.

OBWEMERE BWERHU BULI NKA SAPO Y’ECHUMA

8. Nka gurhe obulangalire bwerhu buli nka sapo y’echuma? (1 Watesalonike 5:8)

⁸ Ebiblia eshubire kuhuzanya obulangalire bwerhu n’esapo y’echuma. (Osome 1 Watesalonike 5:8.) Omusoda anayambala esapo y’echuma y’okulanga erhwe lyage, y’abanzi bage barhamukoromesa oku rhwe. Omu vita lyerhu ly’ekiroho, rhukwanene kulanga obwenge bwerhu oku birhero. Shetani ali akolesa bintu binene omu kushonda kuharabisa obwenge bwerhu changwa amawazo merhu. Nka kulala esapo y’echuma enalanga omusoda, obulangalire bwerhu bunalanga amawazo merhu yirhugenderera kubera bemana emwa Yehova.

9. Bichi binahikira abantu nka barhagwerhe obulangalire?

⁹ Obulangalire bwerhu b’okulama esiku n’amango bwarhurhabala rhurhole esimikiro z’obwenge. Oku lwindi lunda, nk’obulangalire bwerhu bwamazamba, n’okuhwanza kuwaza oku nyifinjo zerhu, rhwakayibagira obulangalire bwerhu b’okulama esiku n’amango. Rhushambale oku mufano gwa Bakristu baguma balilamire omu Korinto ya mira. Balihezeze obwemere omu chilagane cha mira cha Mungu, k’okuderha, obulangalire b’obufuuke. (1 Ko. 15:12) Paulo aliderhere oku balala barhayemerere obufuuke, banalama omu kulonza enyifinjo zabo zitosheke konyine. (1 Ko. 15:32) Zene, bantu barhagwerhe obulangalire omu bilagane bya Mungu, banajira okwabo koshi yibalama akalamo k’okuchisimisa konyine. Aliko rhwabo rhurhali kuguma nabo, bulala rhulangalire ebilagane bya Mungu by’omu mango mayinjire. Obulangalire bwerhu buli nka sapo y’echuma y’okulanga amawazo merhu n’okurhurhabala rhumenye rhwayinja rhwachiwazako konyine, bulala echola chakahanyagaza obwira bwerhu haguma na Yehova.​—1 Ko. 15:33, 34.

10. Nka gurhe obulangalire bwakurhabala ochilange oku nkengero zibi?

¹⁰ Obulangalire bwerhu bwakashuba kulanga amawazo merhu amango rhuli rhwawaza oku rhurhakagala kusimisa Yehova haba n’akatyu. Omufano, baguma bakawaza ntya: ‘Nji ntakaba chiro omu bantu nji bagwarha akalamo k’esiku n’amango. Nta vire naba muntu mwinja. Nta kagala haba n’akatyu kulama nk’oku amakanuni ma Mungu maderhere.’ Rhuyibuke oku Elifazi, murhulirizi w’obubeshi wa Yubu, alikoleseze amawazo mali nk’amola amango aliri aganira na Yubu. Elifazi aderha ntya: “Omuntu onafa ali nde mpu akwanene abe achere?” Av’ashuba kuderha ntya oku bilolerere Mungu: “Arhanihira abachesibwa bage, na chiro embingu zirhachere omu masu mage.” (Yob. 15:14, 15) Obola buli bubeshi bubi! Oyibuke oku Shetani ye lonzeze ogwarhe amawazo mali nk’amola. Amenyere oku okagenderera kuwaza ntyo, wahwanza kuheza obulangalire bwawe. Bobola, okabulire obola bubeshi onaseze obulangalire bwawe oku bilagane bya Yehova. Omenye wagwarha engangane oku alonzeze olame esiku n’amango n’oku akarhabala ohikire ogola muhigo.​—1 Ti. 2:3, 4.

OGENDERERE KUKOMEZA OBULANGALIRE BWAWE

11. Bulagurhe rhukwanene kulembera amango rhuli rhwalingiriza oku obulangalire bwerhu bwayenera?

¹¹ Birhaba biyorohere buli mango okugenderera kukomeza obulangalire bwerhu. Hakahika amango rhwagambwa kulindira oku Yehova ayeneza ebilagane byage. Bulala Yehova alamire esiku n’amango, ebisanzi rhwabo rhwakabona oku bilehere, yewe emwage biyufuhire. (2 Pe. 3:8, 9) Ayeneza ebilagane byage omu njira nyinja loshi, aliko nkabaga arhakajira ntyo amango rhwabo rhwalilangalire oku akola kurhurhabala. Bichi byakarhurhabala rhugenderere kukomeza obulangalire bwerhu, amango rhuli rhwalindira oku Mungu ayeneza ebilagane byage?​—Yak. 5:7, 8.

12. Nk’oku olwandiko lwa Waebrania 11:1, 6 luderhere, nka gurhe obulangalire n’obwemere bifarhene?

¹² Rhwagenderera kukomeza obulangalire bwerhu emwa Yehova bulala yenabujira bube b’okuli. Yi rhugwarha obulangalire, rhukwanene kuchizera oku Yehova abaho n’oku “anahemba balala boshi banamulonza n’omurhima goshi.” (Osome Waebrania 11:1, 6.) Akaba kweri rhuchizerere oku Yehova anabaho, rhwachizera loshi oku nj’ajira byoshi alaganyize. Leka rhulole mu njira zihe rhwakakolesa yi rhuyongera obwira bwerhu haguma na Yehova na ntyo, rhwanakomeza obulangalire bwerhu.

13. Nka gurhe rhwakayegera Mungu?

¹³ Osalire emwa Yehova, onasome Echinwa chage. Chiro akaba oku rhurhabona Yehova n’amasu, aliko, rhwakagala kumuyegera. Rhwakaganira naye kugerera esala eyi rhunachizerere oku, arhuyunviriza. (Yer. 29:11, 12) Rhwakayunviriza Yehova omu kusoma Echinwa chage n’okuchikengerako. Oku rhulirhwasoma okuntu Yehova aliri alaga ku balala baliri bemana emwage omu mango magerere, obulangalire bwerhu bwagenderera kukomera. Byoshi bili omu Chinwa cha Mungu “byayandikwaga mira yi birhuyigiriza, yi kugerera okulembera kwerhu n’echirhulirizo chirhengere omu Mandiko, rhugwarhe obulangalire.”​—Ro. 15:4.

14. Bulagurhe rhwakawaza oku bi Yehova ajirire abandi?

¹⁴ Waza bwenene oku kuntu Yehova ayenezaga ebilagane byage. Rhulole ebi Mungu ajirire Abrahamu na Sara. Balishajire bwenene oku kuntu barhakachiburhire abana. Aliko, Mungu alibalaganyize oku bakaburhire omwana. (Mwa. 18:10) Gurhe Abrahamu alijirire? Ebiblia ederhere ntya: “Aligwerhe obwemere oku akabere eshe wa mashanja manene.” (Ro. 4:18) Na chiro akaba Abrahamu arhalimenyere nka gurhe echilagane cha Mungu chakayenere, alichizerere oku Yehova akayeneze echilagane chage. Oyola mulume mwimana arhavunikaga enzoka. (Ro. 4:19-21) Ezola ngani, zirhuyigirize oku buli mango rhwakachizera oku Yehova nj’ayeneza ebilagane byage chiro n’amango rhubwene oku birhakagalikana.

15. Bulagurhe okwanene kuwaza oku bi Mungu arhujirire?

¹⁵ Waza oku bi Yehova akujirire. Waza oku nyungu wagwarhire kugerera okuyenera kw’ebilagane bya Mungu bili omu Chinwa chage. Omufano, Yesu alilaganyize oku Eshe nj’akuha eby’okenere omu kalamo. (Mt. 6:32, 33) Yesu akurhabere ochizere oku Yehova nj’akuha eroho lyage lichesibwa amango wamuhema lyo. (Lu. 11:13) Yehova ayeneza ebyola bilagane. Konakuguma wakawaza oku bindi bilagane Yehova ayeneze omu kalamo kawe. Omufano, alaganyize oku nj’akubabalira, akurhuliriza, kandi akuha byoshi okenere y’obwira bwenyu haguma naye bugenderera. (Mt. 6:14; 24:45; 2 Ko. 1:3) Amango wamakengera oku byoshi Yehova akujirire, wakomeza obulangalire bwawe oku binj’akujirira omu mango mayinjire.

RHUCHISHINGE OMU BULANGALIRE

16. Bulagurhe obulangalire luli luhembo lw’akachiro bwenene?

¹⁶ Obulangalire bwerhu bw’esiku n’amango luli luhembo lukwirire bwenene lurhengere emwa Mungu. Rhuli rhwalingiriza oku nyorha nene amango mayinjire masimisize bwenene, k’okuderha ebi rhuchizerere oku nji byayenera. Obola bulangalire buli bwakola nka nanga, bwanarhuma rhwasera, na ntyo, rhwanalembera ebigeregezo, rhwanagala kukomerera amalibuko, chiro n’amango bali hofi kurhuyirha. Eyola sapo yerhu y’echuma, enalanga amawazo merhu na ntyo, rhwanachilanga kujira ebintu bibi aliko rhwanajira ebili binja. Obula bulangalire Ebiblia erhubwirire, bunarhurhabala rhukomeze obwira bwerhu haguma naye n’okurhuyereka kangana gurhe arhuzigiire. Rhunayunguka amango rhwamagenderera kugwarha obulangalire bukomere.

17. Bulagurhe obulangalire bwerhu bunarhulerhera omwishingo?

¹⁷ “Ochishinge omu bulangalire,” ebila bili binwa bihebere omurhima Paulo ayandikiraga Abakristu be Roma. (Ro. 12:12) Paulo aliri achishiinga bulala alichizerere oku akagenderera kubera mwimana, akagwarhire akalamo k’esiku n’amango omu mbingu. Nerhu rhwakagwarha omwishingo omu bulangalire bwerhu bulala rhumenyere bwinja oku Yehova nj’ayeneza ebilagane byage. Kuguma n’oku mwandisi muguma w’ezaburi ayandikaga: “Ogwerhe obusime ali . . . olala olangalire Yehova Mungu wage . . . olala onazigana kubera mwimana.”​—Zb. 146:5, 6.