Abaizraeli ba Mira Baliri Balwa Evita, Bulagurhe Rhwabo Rhurhajira Ntyo?

MUKULU muguma w’abasoda b’Abanazi abwira ntya n’omulenge Abahamirizi ba Yehova amango m’Evita Lyakabiri ly’Egulu Lyoshi: “Buli yeshi waIahira kulwisa abasoda be France changwa be Angletere, akwanene afe!” Chiro akaba ahaburhambi bwabo haliri abasoda b’Abanazi baligwerhe amabunduki manene baliri balingiriza, ntaye n’omuguma chiro mu bene-berhu waliyemerere kujilwa evita. Abola bene-berhu baliyerekene bushiru bunene! Ogola guli mufano gwinja guyerekene okuntu Abahamirizi ba Yehova banabona evita: Rhurhachiheba omu mavita ma linola gulu. Chiro n’amango abantu bamaderha oku barhuyirha akaba rhurhalwire evita, rhurhaja kulunda lulebe omu mavita m’elila gulu.

1. ABANTU BA MUNGU BOSHI BALIRI MU SHANJA LIGUMA

Mira, Yehova alichishogere shanja liguma babe bantu bage, k’okuderha, eshanja lye Izraeli. Aliyirikire Abaizraeli “buchire bwani bw’akamaro omu mashanja moshi.” (Kut. 19:5) Kandi Mungu abahereza e eneo yabo-yabo. Bobola amango Mungu aliri abwira Abaizraeli balwise amandi mashanja, barhaliri balwisa changwa kuyirha abandi bantu banaharamya Yehova.a

Zene, abantu banaharamya Yehova barhengere mu “buli shanja na buli buko, buli lubaga na buli lulimi.” (Ufu. 7:9) Nk’abantu ba Mungu baliri balwa evita, bakayinjire balwisa na chiro kuyirha ababo banaharamya Yehova.

2. YEHOVA ALIHERE ABAIZRAELI ERHEGEKO LY’OKULWA EVITA

Mira, Yehova yewaliri aderha mangochi na bulagurhe Abaizraeli balikwanene kulwa evita. Omufano, Mungu alihere Abaizraeli erhegeko ly’okulwisa Abakaanani omu kubachira obulanja eju y’ebijiro bibi bwenene baliri bajira omu mparamyo yabo y’abazimu, obubaraga bukabize, n’okuhaana abana nka nterekero. Yehova abwira Abaizraeli balimbule abola bantu baliri bakola ebintu bibi omu Chihugo Chilaganano, yin’Abaizraeli nabo barhayinja bajira ebintu bili nk’ebyola. (Law. 18:24, 25) Amango Abaizraeli bafumbamira omu Chihugo Chilaganano, mango maguma Mungu aliri ababwira oku bakwanene kulwa evita yibarhenga omu kahidiko k’abanzi babo. (2 Sa. 5:17-25) Aliko, nta mango chiro Yehova alilekere Abaizraeli bonyine bachishoge akaba baje kulwa evita. Amango baliri bajira ntyo, baliri bazigana kuhikirwa n’engaruka zibi bwenene.​—Hes. 14:41-45; 2 Ny. 35:20-24.

Zene, Yehova arhabwirire abantu mpu balwe evita. Amashanja manalwa eju y’ebyabo balonzeze si arhali ebi Mungu yewe alonzeze. Bakajilwa evita bulala balonzeze kugalihya echihugo chabo, yibagwarha furanga zinene changwa y’abandi bayemera amawazo mabo m’epolitike. Aliko si, bichi rhwakaderha oku bilolere balala bali balwa oku zino lya Mungu omu kulanga obuharamye bwabo changwa kuyirha abanzi ba Mungu? Yehova nj’alanga abanamuharamya omu kuli n’okulimbula abanzi bage omu vita lyayinjire, k’okuderha, evita ly’Armagedoni. (Ufu. 16:14, 16) Mw’elyola vita, oburungu bwa Mungu njibwajirwa n’ebilemwa by’eroho s’arhali abantu.​—Ufu. 19:11-15.

3. ABAIZRAELI BARHALIRI BAYIRHA ABAGWERHE OBWEMERE MU YEHOVA

Mira, Buli mango, abasoda b’Abaizraeli baliri bayereka olukogo balala baliri bayerekana obwemere mu Mungu n’okuyirha balala Yehova aderhere oku bakwanene kuyirhwa. Hala mifano ebiri. Chiro akaba oku Yehova alibwirire Abaizraeli balimbule evile ye Yeriko, barhayirhaga Rahabu n’abantu b’omulala gwage bulala aligwerhe obwemere. (Yos. 2:9-16; 6:16, 17) Buzinda, evile yoshi yaba Gibeoni yayokolwa bulala baliyerekene oku bakengere Mungu.​—Yos. 9:3-9, 17-19.

Zene, amashanja marharhalukira abantu bagwerhe obwemere. Na mango maguma, banayirha chiro n’abantu barhali basoda.

4. ABAIZRAELI BALIKWANENE KUKULIKIRA AMARHEGEKO MA MUNGU OKU BILOLERE EVITA

Mira, Yehova alihemere Abaizraeli balwe vita omu kukulikira obwerekezi bwage. Omufano, mango maguma Mungu aliri ababwira baheme abantu b’evile bashonda kulwisa bajire bintu bilebe “yibarija omurhula.” (Kum. 20:10) Kandi Yehova alilonzeze abasoda b’Eizraeli bayorhe bachere banakulikire amakanuni ma Yehova oku bilolere olugenzi lwinja. (Kum. 23:9-14) Chiko akaba oku abasoda b’amandi mashanja mali bazungulikire baliri bafarhira emisi abakazi b’omu mavile bahimire, Yehova alilahize Abaizraeli bamenye bayinja bajira ntyo.​—Kum. 21:10-13.

Zene, bihugo binene omu gulu lyoshi byasinyize oku karatasi amarhegeko makwanene kukengwa amango m’evita. Chiro akaba oku amola marhegeko mahebwagaho eju y’okulanga abantu barhali basoda, echokugayisa kuli kubona oku, bihugo biguma birhakulikira amola marhegeko.

5. MUNGU ALIRI ALWIRA ESHANJA LYAGE

Mira, Yehova aliri alwira Abaizraeli, mango manene baliri bahima evita kugerera ebisomerene. Omufano, nka gurhe Yehova arhabalaga Abaizraeli bahime evile ye Yeriko? Kugerera obwerekezi bwa Yehova, amango Abaizraeli “babanda akalulu k’evita, ebibambazi byahindagala,” yibibayorohera kufarha evile. (Yos. 6:20) Na nka gurhe si byabaga amango Abaizraeli baliri balwa evita n’Abaamori? “Yehova abasheshera kw’envula nene y’olubula kurhenga embingu . . . Banene bafa n’olubula kulusha ab’Abaizraeli bayirhaga n’engorho.”​—Yos. 10:6-11.

ABAKRISTU B’OKULI BANACHIHANGANA KUJIRA OMURHULA N’ABANDI

Nk’oku rhwabwene, ehali yerhu elekene bwenene n’ehali y’Abaizraeli ba mira. Aliko, arhali ezola z’empanvu zonyine zezirhuma rhurhalwa evita. Hali n’ezindi. Omufano, Mungu alilebere oku omu siku z’obuzinda, balala anayigiriza “barhakachiyiga haba n’akatyu kulwa evita.” K’okuderha oku barhakanachiheba omu vita. (Isa. 2:2-4) Oku bwindi, Kristu aliderhere oku abanafunzi bage ‘barhakabere chigabi ch’egulu;” barhakajire ku lunda lulebe omu mavita m’elila gulu.​—Yoh. 15:19.

Kandi Kristu ali alihebere abanafunzi bage omurhima bajire binene olekere echola. Abakomereza oku bayake engeso zakarhuma omuntu abikira owabo omujinya, oburhe, n’okulerha evita. (Mt. 5:21, 22) Kandi, abwira abanafunzi bage oku bakwanene kuba bantu “banajira omurhula” bazigire n’abanzi babo.​—Mt. 5:9, 44.

Nka gurhe rhwakajira ntyo? Rhurhalonzeze kulwa evita, aliko si ka hachigerere amango rhwayinja rhwabona nka mwene-werhu mulebe ali mwanzi werhu? Rhujage rhwajira okwerhu koshi yirhulekana n’engeso zili nk’ezola.​—Yak. 4:1, 11.

Rhurhachiheba omu mavita m’amashanja. S’ahubwe rhunachihangana kulerha omurhula n’obuzigire ahagarhi kerhu. (Yoh. 13:34, 35) Rhujage rhwahigirira okurhachiheba ku lunda lulebe omu politike okurhunali rhwalingiriza oku Yehova nj’amala evita esiku n’amango.​—Zb. 46:9.