Rhwakalama Esiku n’Amango

1. Nka gurhe okukengera oku chilagane Yehova arhuhere ch’okulama esiku n’amango kunarhurhabala?

YEHOVA alaganyize oku balala banamukenga njibagwarha “akalamo k’esiku n’amango.” (Ro. 6:23) Amango rhwamakengera oku bi Yehova ali arhuha, obuzigire bwerhu ku ye bwakomera bwenene. Waza kw’echila: Darha w’embingu arhuzigiire bwenene n’echola chanarhuma eyi ntacho rhwakayemera charhukula kuye.

2. Nka gurhe echilagane ch’okulama esiku n’amango chinarhurhabala?

² Echilagane cha Mungu ch’akalamo k’esiku n’amango chinarhurhabala rhulembere ebibazo. Chiro n’amango abashombanyi berhu bamaderha oku bakola kurhuyirha, rhurhakaleka kukolera Yehova. Bulagurhe? Empanvu nguma eli oku rhumenyere oku rhukafa rhunali bemana emwa Yehova, nj’arhufuula n’okugwarha obulangalire oku rhurhakachifa chiro. (Yoh. 5:28, 29; 1 Ko. 15:55-58; Ebr. 2:15) Bulagurhe rhwakachizera oku nji byashobokana rhulame esiku n’amango? Rhuganire kw’ezila mpanvu zikulikire.

YEHOVA ALAMIRE ESIKU N’AMANGO

3. Bulagurhe rhwakachizera oku Yehova akagala kurhuha akalamo k’esiku n’amango? (Zaburi 102:12, 24, 27)

³ Rhumenyere oku Yehova agwerhe obuhashe b’okurhuha akalamo k’esiku n’amango bulala ali Shoko y’akalamo analamire esiku n’amango. (Zb. 36:9) Hala mandiko maguma m’Ebiblia marhuyemezeze oku Yehova abaho esiku n’amango anagenderera kubaho esiku n’amango. Zaburi ya 90:2 ederhere oku Yehova “ali ho kurhgenga esiku n’amango na kuhika esiku n’amango.” Zaburi ya 102 ederhere echintu chili kuguma n’echola. (Osome Zaburi 102:12, 24, 27.) N’omulebi Habakuki alishubire yandika ntya oku bilolere Darha w’embingu: “K’orhali wa kurhenga esiku n’amango, Yehova wee? Mungu wani wee, Muchesibwa wani, woyo orhakafa.”​—Hab. 1:12.

4. Ka rhwakagwarha obuba bulala rhurhali rhwayunva bwinja ewazo ly’oku Yehova abaho esiku zoshi kurhenga mira? Fasiriya.

⁴ K’onayunva bikukomerere okumenya oku Yehova abaho “esiku n’amango”? (Isa. 40:28) Abandi bantu banene banabona oku bibakomerere okuyunva echola. Elihu aliderhere ntya oku bilolere Mungu: “Oluganjo lw’emyaka yage lurhalwise obwenge bwerhu.” (Yob. 36:26) Aliko mpu bulala rhurhali rhwayunva chintu chilebe, k’okuderha oku chirhali ch’okuli. Omufano, chiro akaba oku rhurhayinji bwinja nka gurhe ekuura (courant) enakola, k’okuderha si oku ekuura erhabaho? Nanga chiro! Konakuguma, rhwabo nka bantu rhurhakayunva bwinja haba n’akatyu oku Yehova abaho kurhenga mira n’oku anagenderera kulama. Aliko echola chirhaderhere oku arhalamire esiku n’amango. Okuli oku bilolere Omulemi werhu kurhayumangire oku birhwakayunva changwa oku birhurhakayunva. (Ro. 11:33-36) Omulemi werhu alilamire kurhenga mira embere w’echindi chintu choshi chili omu mahanga, kuhebaho mw’ezuba n’enyenyezi. Yehova arhuyemezeze oku yewe y’eli “Mulemi w’egulu kugerera emisi yage.” Nechi, Yehova aliriho embere “alambule embingu.” (Yer. 51:15; Mdo. 17:24) Yindi mpanvu ehe yakarhuma rhwachizera oku nji byashobokana rhulame esiku n’amango?

YEHOVA ARHULEMERE YIRHULAMA ESIKU N’AMANGO

5. Bulangalire buhe Adamu na Eva baligwerhe?

⁵ Ebintu byoshi Yehova alemere byakahikire amango byafa, aliko abantu bowe nanga. Alibahere obulangalire bwabo-bwabo b’okulama buzira kufa. Aliko Yehova abwira Adamu ntya: “Oku bilolere omurhi g’okumenya amenja n’amabi, orhakwanene kugulyako, bulala olusiku nji wanagulyako, kweri nji wafa.” (Mwa. 2:17) Nka Adamu na Eva bakengaga Yehova, barhakafire. Biyunvikene oku rhwakachizera oku hakahikire amango Yehova akabayemerere kulya k’ogola “murhi gw’akalamo.” Echola chakayerekene oku kweri amabayemerera “balame esiku n’amango.”b​—Mwa. 3:22.

6-7. a) Bichi bindi biyerekene ok’omuntu arhalemwaga mpu y’afa? b) Nyungu zihe wakasiima nj’ogwarhe? (Olole amafoto.)

⁶ Basomi baguma baderhere oku, obonko bwerhu bugwerhe obuhashe b’okubika emyazi minene bwenene kulusha eyi rhwakayiga omu kalamo kerhu koshi, echola chisomeze bwenene. Omu mwaka gwa 2010, omwazi guli omu jurnale ederhere oku bilolere obwenge (Scientific American Mind) gwaderhere oku, obonko bwerhu bugwerhe obuhashe b’okubika emyazi minene bwenene engana na miliyoni esharhu y’esa z’eprograme z’eteleviziyo. Kandi byakashobokana ok’obonko bwerhu bwakabika emyazi minene erhalukire n’eyola. Aliko bibonekene oku Yehova akolaga obonko bwerhu yi bugala kubika myazi minene bwenene kulusha eyi rhwakayiga omu myaka 70 changwa 80 yonyine.​—Zb. 90:10.

⁷ Kandi Yehova arhulemere na nyorha nene y’okugenderera kulama. Oku bilolere abantu, Ebiblia ederhere oku Mungu ‘ahebere enyorha y’okulama esiku n’amango omu mirhima y’abo.’ (Muh. 3:11) Eyola ye mpanvu erhumire rhunabona olufu oku ali mwanzi werhu. (1 Ko. 15:26) Amango rhwamalwala bwenene, ka rhunachiberera ntyo n’okulingiriza oku rhwafa? Nanga. Rhunazigana kuja kulola munganga nkabaga rhwananywa n’obufumu yi rhulwisa obola bulwala. Rhunajira okwerhu koshi rhwakanagala yi rhurhafa. N’amango muntu mulebe rhuzigiire amafa, abe musole changwa mushaja, rhunayunva birhulumire bwenene. (Yoh. 11:32, 33) Rhwakagenderera kuyiga esiku n’amango eyi rhunagwerhe enyorha nene y’okulama esiku n’amango, bulala Omulemi werhu w’obuzigire intyo kw’arhulemere. Kweri, nj’ajira okuntu bishobokane nerhu rhulame esiku n’amango. Aliko rhunagwerhe empanvu zinene zakarhuma rhwachizera oku nji rhwalama esiku n’amango. Rhukola kuganira oku bintu Yehova ajiraga omu mango magerere biyerekene oku kweri arhahindamulaga omuhigo gwage gurhanzi.

OMUHIGO GWA YEHOVA GURHASAGA HINDAMUKA

8. Bichi Isaya 55:11 erhuyigirize oku bilolere omuhigo Yehova arhuherhere?

⁸ Chiro akaba oku Adamu na Eva balijirire echaha n’okulerhera abana babo olufu, Yehova arhahindamulaga amawazo mage oku bilolere omuhigo gwage. (Osome Isaya 55:11.) Achigwerhe omuhigo oku abantu bemana balame esiku n’amango. Rhumenyere echola kugerera ebintu Yehova aderhaga n’eby’ajirire y’ayeneza omuhigo gwage.

9. Bichi Mungu alaganyize abantu? (Danieli 12:2, 13)

⁹ Yehova alaganyize oku nj’afuula abafire n’okubahereza orozo l’okulama esiku n’amango. (Mdo. 24:15; Tit. 1:1, 2) Omulume mwimana Yubu, naye alichizerere oku Yehova agwerhe enyorha nene y’okufuula abafire. (Yob. 14:14, 15) Omulebi Danieli naye alimenyere oku abantu bagwerhe obulangalire b’okufuuka n’okuhaabwa orozo l’okulama esiku n’amango. (Zb. 37:29; osome Danieli 12:2, 13.) Abayahudi b’omu siku za Yesu nabo balimenyere oku Yehova akahere abakozi bage bemana “akalamo k’esiku n’amango.” (Lu. 10:25; 18:18) Yesu aliri ashambala kanene kw’echola chilagane, na yewe yenyine Eshe alimufuulire.​—Mt. 19:29; 22:31, 32; Lu. 18:30; Yoh. 11:25.

10. Bichi obufuuke bwa mira buyerekene? (Olole efoto.)

¹⁰ Yehova y’Eshoko y’Akalamo anagwerhe emisi y’okufuula abafire. Alihere omulebi Eliya emisi y’okufuula mugala wa mukana muguma we Serafati. (1 Fa. 17:21-23) Enyuma w’ahola, kugerera oburhabale bwa Mungu, omulebi Elisha afuula mugala wa mukazi muguma w’Omushunemu. (2 Fa. 4:18-20, 34-37) Abola bantu bafulwaga n’abandi biyerekene oku Yehova agwerhe emisi y’okushuba kugalulira abafire akalamo. Amango Yesu aliri oku gulu, aliyerekene oku Eshe alimuhere eyola misi. (Yoh. 11:23-25, 43, 44) Zene, Yesu ali embingu anahaabirwe “obukulu boshi . . . omu mbingu n’oku gulu.” Bobola akayeneza echilagane ch’oku “balala boshi bali omu shinda z’olwibuko” nji bafuuka n’okuhaabwa obulangalire b’okugenderera kulama esiku n’amango.​—Mt. 28:18; Yoh. 5:25-29.

11. Nka gurhe enchungu yarhumire byagalikana njirhulame esiku n’amango?

¹¹ Bulagurhe Yehova alilekerere Omugala muzigirwa alibuke bwenene embere afe? Yesu alihaanire echishubizo kw’echola chibazo omu kuderha ntya: “Bulala Mungu alizigiire egulu bwenene, ahaana Mugala wage w’echinege, yi buli muntu wayerekana obwemere muye arhaharabiswaga, s’ahubwe apate akalamo k’esiku n’amango.” (Yoh. 3:16) Omu kuhaana Omugala ebe nchungu y’okushukulira ebyaha byerhu, Mungu ajira bigalikane rhugwarhe akalamo k’esiku n’amango. (Mt. 20:28) Entumwa Paulo alifasiriye echola chigabi ch’akamaro ch’omuhigo gwa Mungu amango ayandika ntya: “Bulala olufu lwayinjaga kugerera omuntu, obufuuke nabo bwayinjaga kugera omuntu. Nka kulala kugerera Adamu boshi banafa, nantyo kandi kugerera Kristu boshi nji bajirwa bagumaguma.”​—1 Ko. 15:21, 22.

12. Nka gurhe Obwami nji bwarhabala omuhigo gwa Mungu guyenere?

¹² Yesu alibwirire abanafunzi bage oku basalire Obwami bwa Mungu buyinje n’oku obulonza bwage bujirike hanola oku gulu. (Mt. 6:9, 10) Chigabi chiguma ch’omuhigo gwa Mungu chili oku abantu balame esiku n’amango hanola oku gulu. Omu kuyeneza echola, Yehova ashimikire Omugala abe Mwami w’Obwami bw’Echimasiya. Mungu ali achishoga bantu 144 000 hanola oku gulu yi bakola haguma na Yesu omu kuyeneza omuhigo gwage.​—Ufu. 5:9, 10.

13. Bichi Yehova ali akola zene, nawe bichi okwanene kujira?

¹³ Yehova ali agusha zene “echigusho chinene” ch’abantu, anali abakoomeza kulama omu burhegesi b’obola Bwami. (Ufu. 7:9, 10; Yak. 2:8) Chiro akaba oku omu gulu bantu banene barhayunvikene eju y’akabolo n’evita, balala bali omu chigusho chinene bali bachihangana bwenene balekane n’akabolo ka buli lubero. Bali bayerekana kugerera ebijiro byabo oku bali bachula engorho zabo zibe fuka. (Mik. 4:3) Ahali h’okuchiheba omu mavita mali marhuma bantu banene bafa, bali barhabala abantu bagwarhe “akalamo k’okuli” omu kubayigiriza oku bilolere Mungu w’okuli n’emihigo yage. (1 Ti. 6:19) Abantu b’emilala bakabapinga changwa bakabula efuranga bulala bali bashigikira Obwami bwa Mungu, aliko Yehova ajira okuntu bagwarhe byoshi bakenere. (Mt. 6:25, 30-33; Lu. 18:29, 30) Ebyola birhurhabere rhumenye ok’Obwami bwa Mungu buli Bwami nya Bwami n’oku bwagenderera kukola omu kuyeneza omuhigo gwa Yehova.

AMANGO MAYINJIRE MAKWIRIRE

14-15. Nka gurhe echilagane cha Yehova ch’okulimbula olufu nji chahikira kuyenera?

¹⁴ Zene, Yesu ali Mwami w’Obwami bwa Mungu omu mbingu nj’ayeneza ebilagane byoshi Yehova ahaanire. (2 Ko. 1:20) Kurhenga mwaka gwa 1914, Yesu ali akandagira abanzi bage. (Zb. 110:1, 2) Haguma n’abantu nj’arhambula nabo nji bayeneza obuhimanyi bwabo n’okulimbula ababi.​—Ufu. 6:2.

¹⁵ Omu mango m’Oburhegesi bw’Emyaka Chihumbi, abafire nji bafuuka n’abantu berhonzi nji bahikira obushinganyanya. Enyuma w’echigeregezo chizinda, balala Yehova nj’achira olubanja oku bali banya-kunali “nji bashokola egulu, n’okulilamako esiku n’amango.” (Zb. 37:10, 11, 29) Ech’okusimisa, “omushombanyi muzinda, olufu,” “njahindulwa busha.”​—1 Ko. 15:26.

16. Mpanvu ehe nkulu ekwanene kurhushunika rhukolere Yehova?

¹⁶ Nk’oku rhwabwene, obulangalire bwerhu b’okulama esiku n’amango buyumangiire oku Chinwa cha Mungu. Obola bulangalire bwakarhurhabala rhubere bemana mu zinola siku zizinda zikomere. Aliko yirhusiimisa Yehova, rhukwanene kushunikwa na binene olekere enyorha yerhu yonyine y’okugwarha akalamo. Empanvu nkulu erhuma rhwagenderera kubera bemana ku Yehova na Yesu, eli oku rhubaziigire bwenene. (2 Ko. 5:14, 15) Obola buzigire bwarhushunika rhubayiganye n’okubwira abandi k’obola bulangalire rhugwerhe. (Ro. 10:13-15) Amango rhuli rhwayiga kuba bantu banahaana n’okurhaba banya-kuchikaziza, Yehova asiima kuba mwira werhu esiku n’amango.​—Ebr. 13:16.

17. Bichi buli muguma werhu akwanene kujira? (Matayo 7:13, 14)

¹⁷ Ka nji rhwaba mu balala nji bagwarha akalamo k’esiku n’amango? Yehova arhuhere olola rozo. Zene, rhukwanene kuchishoga kubera mw’eyola njira eyerekeze oku kalamo. (Osome Matayo 7:13, 14.) Gurhe akalamo nji kaba kali amango nji rhwalama esiku n’amango? Rhwashubiza kw’echola chibazo omu mwazi gukulikireho.