“Nji Waba Haguma Nani omu Paradizo”

1. Kasanzi kageke embere Yesu afe, bichi abwiraga nyankola-maligo muguma waliri aha burhambi bwage? (Luka 23:39-43)

YESU n’abanyankola-maligo babiri balibambirwe aha burhambi bwage, boshi baliri balibuka bwenene embere bafe. (Lu. 23:32, 33) Abola banyakola-maligo babiri babaga babwirire Yesu ebinwa by’okumushekera bulala kweri barhaliri banafunzi bage. (Mt. 27:44; Mk. 15:32) Aliko muguma ahindamula amawazo mage. Aderha ntya: “Yesu, nj’onyibuke amango waja omu bwami bwawe.” Yesu amushubiza ntya: “Kweri nkubwirire zene, nji waba haguma nani omu Paradizo.” (Osome Luka 23:39-43.) Ntacho chiyerekene oku oyola nyankola-maligo abaga ayemerere oburhumwa oku bilolere “Obwami bw’embingu” Yesu aliri ahubiri amango aliri oku gulu. Na Yesu arhaderhaga chiro ok’oyola mulume nj’aja omu Bwami embingu. (Mt. 4:17) Yesu aliri aderha oku bilolere Eparadizo nji yaba oku gulu omu mango mayinjire. Bulagurhe rhwakaderha ntyo?

2. Bichi biyerekene ok’oyola nyankola-maligo wahungamaga aliri Muyahudi?

² Byakashobokana ok’oyola nyankola-maligo wahungamaga aliri Muyahudi. Oyola nyankola-maligo abwira owabo ntya: “Orhayubahire Mungu chiro, okubona oku nawe wahabirwe obuhane kuguma naye?” (Lu. 23:40) Abayahudi baliri baharamya Mungu muguma aliko abantu b’amashanja baliri baharamya ba mungu banene. (Kut. 20:2, 3; 1 Ko. 8:5, 6) Nk’abola ba nyankola-maligo barhaliri Bayahudi, oyola wabo akabazize ntya: “K’orhayubahire bamungu chiro?” Oku bwindi, Yesu arharhumwaga oku bantu b’amashanja, aliko oku “ntama zaherere z’olubaga lwe Izraeli.” (Mt. 15:24) Mungu abaga abwirire Abaizraeli oku akafuulire abafire. Nkabaga oyola nyankola-maligo wahungamaga alimenyere ebyola, n’ebinwa byage byaliyerekene oku aliri awaza oku Yehova akafuulire Yesu n’okumujira murhegesi w’Obwami bwa Mungu. Nkabaga oyola mulume alilangalire oku naye Mungu akamufuulire.

3. Bichi oyola nyankola-maligo wahungamaga awazagako amango Yesu aderha oku bilolere Eparadizo? Fasiriya. (Mwanzo 2:15)

³ Bulala oyola nyankola-maligo aliri Muyahudi, akwanene kuba ey’alimenyere oku bilolere Adamu na Eva n’Eparadizo Yehova abalemeraga. Bobola, nkabaga oyola nyankola-maligo aliyemerere oku Eparadizo Yesu ashambalagako yakabere bustani ekwirire hanola oku gulu.​—Osome Mwanzo 2:15.

4. Bichi ebinwa Yesu abwiraga muguma omu banyankola-maligo byakarhushunika rhuwazeko?

⁴ Ebinwa Yesu abwiraga oyola nyankola-maligo bikwanene kurhushunika rhuwaze oku kuntu akalamo nji kaba omu Paradizo. Kweri, oburhegesi b’omurhula b’Omwami Sulemani bwakarhuyigiriza chintu chilebe oku bilolere Eparadizo. Ebiblia ederhere oku Yesu ali mukulu bwenene kulusha Sulemani. Rhwakalangalira oku Yesu, nj’akola haguma n’abanji arhambula haguma nabo omu kujira egulu libe Paradizo ekwirire bwenene. (Mt. 12:42) Kweri, abantu “b’ezindi ntama” bakwanene kusimiswa n’ebi bakwanene kujira yi nji balama esiku n’amango omu Paradizo.​—Yoh. 10:16.

GURHE AKALAMO NJI KABA OMU PARADIZO?

5. Gurhe onawaza akalamo nji kaba omu Paradizo?

⁵ Gurhe onawaza akalamo nji kaba omu Paradizo? Nkabaga onawaza oku bustani ekwirire bwenene nk’oku ebustani y’Edeni yaliri. (Mwa. 2:7-9) Nkabaga wakayibuka obulebi Mika ayandikaga oku, abantu ba Mungu nji bayikala “buli muguma eshishi w’omurhi gwage g’omuzabibu n’eshihi y’omurhi gwage g’omutini.” (Mik. 4:3, 4) Nkabaga kandi wakayibuka amandiko mali omu Biblia maderhere oku nji haba bilyo binene. (Zb. 72:16; Isa. 65:21, 22) Nkabaga wakabona omu bwenge bwawe oli omu bustani ekwirire bwenene, oyikere oku meza mayunjwire ebilyo bilokere. Wakabona omu bwenge bwawe ehewa eyunjwire empumulo nyinja y’amauwa n’emirhi. Kandi byakashobokana kweri oku wakawaza abantu b’omulala gwawe na bera bawe, kuhebaho n’abafuukire, muli mwasheka n’okusiimira kugeza ebisanzi haguma mweshi. Ebyola byoshi, birhali bilorho konyine. Rhwakayemera oku kweri ebyola byoshi nji byaba hanola oku gulu. Aliko kandi nji rhwakola akasi kasimisize omu Paradizo.

6. Kasi nyabachi nji rhwakola omu Paradizo? (Olole efoto.)

⁶ Yehova arhulemere n’obuhashe b’okugwarha obusiime omu kasi kerhu. (Muh. 2:24) Ahanene nji rhwakola bwenene amango m’Oburhegesi bwa Myaka Chihumbi bwa Kristu. Balala nji bafuma amalibuko makulu, n’amamiliyoni nji mafuka, nji bakenera emyambaro, ebilyo n’ahantu h’okulama. Yi nji rhuyeneza ebyola byoshi, nji byarhuhema rhukole kasi kanene kasimisize! Nka kulala Adamu na Eva babwirwaga bayinje bahinga oku gulu, nerhu nji rhwagwarha akasi kasimisize k’okukwiza egulu libe Paradizo. Waza okuntu nji byasimisa bwenene amango nji rhwayigiriza amamiliyoni m’abantu nji bafuuka eyibamenyere bintu bigeke oku bilolere Yehova n’omuhigo gwage, n’okurhabala abemana ba mira balilamire embere Yesu aburhwe, bamenye ebyarhengerere kurhenga amango bafaga!

7. Bichi rhwakachizera na bulagurhe?

⁷ Rhwakachizera kweri oku amango nji rhwaja omu Paradizo nji rhwagwarha omurhula, byoshi rhukeneere, n’ebintu byoshi nji byaba bipangirwe bwinja. Bulagurhe? Bulala Yehova arhuyerekere omufano g’okuntu akalamo nji kaba omu burhegesi b’Omugala. Rhwakabona ebyola omu ngani y’oburhegesi b’Omwami Sulemani.

OBURHEGESI BWA SULEMANI BURHUYEREKERE GURHE EPARADIZO NJI YABA

8. Nka gurhe ebinwa bili omu Zaburi 37:10, 11, 29 byayinjaga yenera enyuma Mwami Daudi amala kubiyandika? (Olole “Ebibazo by’Abanasoma Ebitabu Byerhu” mw’enola gazeti.)

⁸ Eroho lya Mungu lyayerekeza Omwami Daudi ayandike oku bilolere okuntu akalamo nji kaba amango omwami mwengehe na mwimana nj’ayikala oku chirhi ch’obwami. (Osome Zaburi 37:10, 11, 29.) Rhunazigana kuganira n’abantu oku lwandiko lwa Zaburi 37:11 amango rhulirhwaderha oku Paradizo yayinjire. Rhugwerhe empanvu nyinja z’okujira ntyo bulala Yesu aligalukiire olola lwandiko omu Mahubiri Mage m’oku Musozi omu kuyerekana oku nji lwashuba yenera omu mango mayinjire. (Mt. 5:5) Aliko kandi, ebinwa bya Daudi byaliyerekene okuntu akalamo kakabere omu burhegesi b’Omwami Sulemani. Amango Sulemani aliri arhegeka omu Izraeli, abantu ba Mungu baliri basiimira murhula gunene na ntacho balibulire omu chihugo chaliri “chahulula amarha n’obuki.” Mungu abaga aderhere ntya: “Mukagenderera kulambagira omu marhegeko mani . . . , Nji nalerha omurhula omu chihugo, nji wayinja walyama na nta muntu wakuyubahisa.” (Law. 20:24; 26:3, 6) Ebyola bilagane byayeneraga amango Sulemani aliri arhegeka e Izraeli. (1 Ny. 22:9; 29:26-28) Kandi Yehova alilaganyize oku abantu babi “barhakachibaho haba n’akatyu.” (Zb. 37:10) Bobola ebilagane bili m’olola lwandiko lwa Zaburi 37:10, 11, 29 byaliyenere mira kandi nji byashuba kuyenera omu mango mayinjire.

9. Bichi omwami-kazi we Sheba aliderhere oku bilolere oburhegesi b’Omwami Sulemani?

⁹ Mwami-kazi we Sheba aliyunvirhe emyazi oku bilolere omurhula n’akalamo kenja eshanja lye Izraeli lyaligwerhe amango m’oburhegesi b’Omwami Sulemani. Oyola mwami-kazi arhenga hale n’okubalamira e Yerusalemu aje chibonera ebyola yenyine. (1 Fa. 10:1) Amalire chibonera okuntu obwami bwa Sulemani bwaliri, aderha ntya: “Ntalibwirwe ebichira. . . . Abagwerhe obusiime bali balume bawe, n’abagwerhe obusiime bali bakozi bawe banayumanga embere zawe buli mango yibayunviriza obwengehe bwawe!” (1 Fa. 10:6-8) Aliko ehali zaliri omu bwami bwa Sulemani zaliyerekene konyine omufano gw’ebi Yehova nj’ajirira abantu amango m’oburhegesi b’Omugala, Kristu.

10. Yesu alushire Sulemani mu njira zihe?

¹⁰ Yesu ali mukulu bwenene kulusha Sulemani. Sulemani aliri mulume orhalishinganene wajiraga amagosa makomere mayinjaga lerhera ebibazo abantu ba Mungu. Aliko Yesu yewe, ali Murhegesi mushinganyanya orhakajira amagosa. (Lu. 1:32; Ebr. 4:14, 15) Yesu aligenderere kubera mwimana emwa Mungu chiro akaba oku Shetani alimulerhere ebigeregezo bikomere. Kristu ayerekene oku arhakajira echaha haba n’akatyu changwa kujira echintu chakababaza abantu bemana ali arhegeka. Ye Mwami mwinja bwenene rhukwanene kugwarha.

11. Bande nji barhabala Yesu kurhegeka?

¹¹ Yesu haguma na bantu 144 000 nj’arhegeka haguma nabo nji bakola omu kushishikala abantu n’okuyeneza omuhigo gwa Yehova oku bilolere egulu. (Ufu. 14:1-3) Abola bantu balilembeere ebigeregezo na bibazo binene amango balilamire oku gulu. Bobola bakayunva eby’abantu balamire oku gulu bali bageramo. Aliko si, bichi abola njibarhegeka haguma na Yesu nji bakola?

KASI KACHI ABASHIGWA NJI BAKOLA?

12. Kasi kahe Yehova nj’aha balala 144 000?

¹² Yesu n’abanji arhegeka haguma nabo bagwerhe kasi kanene bwenene kulusha aka Sulemani aligwerhe. Mwami Sulemani aliri ashishikala amamiliyoni m’abantu mu chihugo chiguma. Aliko balala nji barhambula omu Bwami bwa Mungu nji bashishikala amamiliyare m’abantu omu gulu lyoshi. Yehova ahere balala 144 000 lukengo lunene!

13. Kasi kahe k’akamaro balala nji barhambula haguma na Yesu bagwerhe?

¹³ Kuguma na Yesu, balala 144 000 nji bakola nka bami n’abadahwa. (Ufu. 5:10) Amango Abaizraeli balikwanene kukenga Esheriya ya Musa, abadahwa babalikwanene kurhanga kurhabala abantu bagenderere kuba n’amagala menja n’okubera hofi na Yehova. Esheriya chaliri “chichuchu ch’ebintu binja byakarhengerere,” bobola, rhwakaderha oku Yesu na balala nj’arhambula haguma nabo nji bakola akasi k’akamaro k’okurhabala abantu ba Mungu bagenderere kuba n’amagala menja n’okubera hofi na Yehova. (Ebr. 10:1) Kugera zene, rhurhamenyere nka gurhe abola bami n’abadahwa nji bayinja bashambala n’abantu nji baba bali m’obola Bwami hanola oku gulu. Ebe njira yoshi-yoshi Yehova nj’akolesa, rhwakachizera oku balala nji baba omu Paradizo hanola oku gulu nji bahaabwa obwerekezi bakenere.​—Ufu. 21:3, 4.

BICHI BALALA “B’EZINDI NTAMA” BAKWANENE KUJIRA YI NJI BALAMA OMU PARADIZO?

14. Buguma buhe buli ahagarhi “k’ezindi ntama” na bene-babo Kristu?

¹⁴ Yesu aliyirikire balala nj’arhambula haguma nabo “chishumba chigeke.” (Lu. 12:32) Ashuba kuderha oku bilolere echigusho chakabiri achiyirika “ezindi ntama.” Ebyola bigusho bibiri chili chishumba chiguma chili m’obuguma. (Yoh. 10:16) Abali mw’ebyola bigusho bibiri bali bakola haguma zene, nji banagenderera kukola haguma amango egulu lyajirwa Paradizo. Bobola, amola mango balala “b’echigusho chigeke” nji baba bali omu mbingu na balala “b’ezindi ntama” nji bagwarha obulangalire b’okusiimira akalamo esiku n’amango hanola oku gulu. Aliko, hala ebintu balala “b’ezindi ntama” bakwanene kujira zene yi nji balama omu Paradizo.

15. a) Nka gurhe balala “b’ezindi ntama” banakola na bene-babo Kristu? b) Nka gurhe wakayiganya omufano gwa mwene-werhu oli omu farmasi? (Olole efoto.)

¹⁵ Olala nyankola-maligo wahungamaga alifire n’echola charhuma arhagwarha orozo l’okuyerekana eshukurani yage yoshi oku bi Kristu amujiriraga. Aliko balala “b’ezindi ntama” bowe bagwerhe orozo lunene l’okuyerekana zene okuntu bali bachiyunva oku bilolere Yesu. Omufano, rhunayerekana oku rhumuzigiire omu kuntu rhunakolera bene-babo bashigwa. Yesu aliderhere oku nj’achira balala b’ezindi ntama olubanja omu kuyumangira oku kuntu bakolere bene-babo. (Mt. 25:31-40) Rhwakarhabala bene-babo Kristu omu kukola n’omwishingo akasi k’okuhubiri n’okujira abanafunzi. (Mt. 28:18-20) Che chirhumire rhulonzeze kukolesa bwinja ebikoleso by’okurhabala abantu bayige Ebiblia nk’echitabu Siimira Akalamo Esiku n’Amango! Akaba orhaza hwanza kuyiga Ebiblia na muntu mulebe, wakachihebera omuhigo n’okuhwanzisa mafunzo manene m’Ebiblia nk’oku wakanagala.

16. Bichi rhukwanene kujira zene yi nji rhurhambulwa n’Obwami bwa Mungu?

¹⁶ Birhahemere mpu rhulingirize amango rhwahwanza lama omu Paradizo mpu yi rhuba bantu Yehova alonzeze. Kurhenga zene, rhwakachihangana yi rhuba banihirwa omu binwa byerhu n’omu bijiro byerhu n’okugendereza kugwarha olugero omu kalamo. Kandi, rhwakaba banihirwa emwa Yehova, ku bakerhu, changwa abalume berhu, na ku bene-berhu na bali-berhu. Nka rhukengere Yehova zene mu linola gulu libi, nji byarhuyorohera kumukenga amango rhwalama omu Paradizo. Rhwakashuba kukuza obufundi n’okugwarha engeso ziyerekene oku rhuli rhwachirheganya kulama mw’eyola Paradizo. Olole omwazi “Oli Tayari ‘Kushokoola Egulu Si’?” guli mw’enola gazeti.

17. Ka rhukwanene kuyunva rhuvunikire omurhima bwenene eju y’ebyaha rhwakolaga mira? Fasiriya.

¹⁷ Kandi rhukwanene kuleka kuchiyunva banya-magosa oku byaha bikomere rhwajiraga mira. Aliko chiro akaba ntyo, rhurhakwanene haba n’akatyu kubona enchungu nk’erhuhere empanvu “y’okukoomera kujira ebyaha oku bulonza.” (Ebr. 10:26-31) Aliko rhwakagwarha obusiime akaba rhwahungamire n’omurhima goshi echaha chikomere, rhwahemere Yehova n’abashamuka oburhabale n’okuhindamula olugenzi lwerhu, anarhubabalire loshi. (Isa. 55:7; Mdo. 3:19) Oyibuke ebinwa Yesu abwiraga Abafarisayo: “Nayinjaga kuhamagala, arhali abanya-kunali s’aliko abanya-byaha.” (Mt. 9:13) Enterekero y’enchungu egwerhe obuhashe b’okushukulira ebyaha byerhu byoshi.

WAKALAMA ESIKU N’AMANGO OMU PARADIZO

18. Bichi nji wakasiima kuganira haguma n’olala nyankola-maligo wafiraga aha burhambi bwa Yesu?

¹⁸ Waza oli omu Paradizo oli waganira n’olala nyankola-maligo waganiraga na Yesu. Nta ngangane, mweshi mwakaderha kangana gurhe mugwerhe eshukurani oku nterekero ya Yesu y’enchungu. Nkabaga wakamubaza bichi byarhengereraga omu bisanzi bizinda-zinda by’akalamo ka Yesu hanola oku gulu n’okuntu achiyunvaga amango Yesu amushubiza oku byamuhemaga. Nkabaga naye akakubaza nka gurhe akalamo kaliri omu siku z’obuzinda z’egulu libi bya Shetani. Nji lwaba lukengo okuyigiriza Echinwa cha Mungu abantu bali nk’oyola mulume!—Efe. 4:22-24.

19. Bulagurhe akalamo k’omu Paradizo nji karharhuluhya? (Olole efoto eli oku chiganda.)

¹⁹ Akalamo nji karharhuluhya omu Paradizo. Buli mango nji rhwashiganana n’abantu basiimisize n’akasi kasiimisize k’okukola. Buli lusiku nji rhwagwarha orozo l’okuhikira kumenya Darha w’embingu n’okusiimira eby’ali arhuha. Buli mango nji haba bintu binene rhwayiga oku bimulolere, kandi nji haba bintu binene nji rhwayiga oku bilolere obulemi bwage. Oku nji rhwagenderera kulama, obuzigire bwerhu ku Mungu werhu nji bwagenderera kukomera. Rhugwerhe eshukurani nene ku Yehova na Yesu bulala barhuhere echilagane ch’okulama esiku n’amango omu Paradizo!