Pehea ʻOe E Hoʻokokoke Aku Ai i ke Akua?

1. Hoʻolohe paha ke Akua i nā pule a pau?

Kono ke Akua i ka poʻe like ʻole he nui e hoʻokokoke aku iā ia ma ka pule. (Halelū 65:2) Akā naʻe, ʻaʻole ʻo ia hoʻolohe a hoʻāpono i nā pule a pau. I mea hoʻohālikelike, hōʻoki ʻia ka pule o ke kāne hana ʻino i kāna wahine. (1 Petero 3:7) A i ka hana hewa mau ʻana a ka poʻe ʻIseraʻela, ʻaʻole i hoʻolohe ke Akua i kā lākou mau pule. No laila, pono kākou e mahalo i ka hiki ke pule. Akā nō naʻe, e hoʻolohe ana ke Akua i ka pule o ka poʻe hewa inā mihi lākou iā ia.​—E heluhelu iā ʻIsaia 1:15; 55:7.

E nānā i ka wikiō Hoʻolohe Paha ke Akua i nā Pule A Pau?

2. Pehea kākou e pule ai?

He mahele ka pule o kā kākou hoʻomana, no laila, pono kākou e pule iā Iēhova wale nō, nāna i hana iā kākou. (Mataio 4:10; 6:9) A, ma muli o kā kākou hewa, pono kākou e pule ma ka inoa o Iesū, no ka mea, ua make ʻo ia no kā kākou mau lawehala. (Ioane 14:6) ʻAʻole makemake ʻo Iēhova iā kākou e pule i nā pule paʻanaʻau. Akā, makemake ʻo ia iā kākou e pule mai ka naʻau.​—E heluhelu iā Mataio 6:7; Pilipi 4:​6, 7.

Hiki nō i ke Akua ke lohe i ka pule hāmau. (1 Samuela 1:​12, 13) Kono ʻo ia iā kākou e pule iā ia i nā manawa a pau, ma ka hoʻomaka ʻana a me ka hopena o ka lā, ka wā ʻai, a i loko nō hoʻi o ka pilikia.​—E heluhelu iā Halelū 55:22; Mataio 15:36.

3. No ke aha e hui pū ai nā Kalikiano?

ʻAʻole maʻalahi ka hoʻokokoke ʻana i ke Akua, no ka mea, noho kākou me ka poʻe manaʻoʻiʻo ʻole i ke Akua a hoʻohenehene lākou i kāna ʻōlelo paʻa o ka maluhia ma ka honua. (2 Timoteo 3:​1, 4; 2 Petero 3:​3, 13) No laila, pono e hoʻoikaika ʻia kākou e ko kākou mau hoahānau, a pono e hoʻoikaika ʻia lākou e kākou.​—E heluhelu iā Hebera 10:​24, 25.

Kōkua ka hui pū ʻana me ka poʻe aloha i ke Akua iā kākou e hoʻokokoke iā ia. Inā hele kākou i nā hālāwai o Nā Hōʻike a Iēhova, e pōmaikaʻi ana kākou ma muli o ka manaʻoʻiʻo o nā kānaka ʻē aʻe.​—E heluhelu iā Roma 1:​11, 12.

4. Pehea ʻoe e hoʻokokoke aku ai i ke Akua?

Hiki iā ʻoe ke hoʻokokoke iā Iēhova ma o ka noʻonoʻo pono ʻana i nā mea i aʻo ʻia mai ka Paipala. E noʻonoʻo pono i kāna mau hana, kāna ʻōlelo aʻo, a me kāna mau ʻōlelo paʻa. Kōkua ka pule a me ka noʻonoʻo pono ʻana iā kākou e hoʻomaopopo i ka waiwai o ko Iēhova aloha a me kona naʻauao.​—E heluhelu iā Iosua 1:8; Halelū 1:​1-3.

Hiki iā ʻoe ke hoʻokokoke i ke Akua, inā hilinaʻi wale nō ʻoe iā ia. Pono ʻoe e hoʻoikaika i kou manaʻoʻiʻo ma o ka noʻonoʻo pono ʻana i ke kumu no kou manaʻoʻiʻo.​—E heluhelu iā Mataio 4:4; Hebera 11:​1, 6.

5. He aha ka hopena o ka hoʻokokoke ʻana aku i ke Akua?

Aloha ʻo Iēhova i ka poʻe aloha iā ia. Hiki iā ia ke hoʻopakele iā lākou i nā mea hōʻeha i ko lākou manaʻoʻio a me ko lākou manaʻolana no ke ola mau loa. ʻŌlelo aʻo ʻo ia iā kākou e kūʻē i nā mea hiki ke hōʻeha i ko kākou olakino a me ka hauʻoli. (Halelū 91:​1, 2, 7-10) Aʻo ke Akua iā kākou i ke ola ʻoi loa.​—E heluhelu iā Halelū 73:​27, 28; Iakobo 4:​4, 8.