¿Keane pɨhɨɨkɨ «tiʼuximayatame mɨrayeʼatɨwa metá mɨtiutiʼeriwa kemɨtikayaní»?

Ketsuútsi ʼakuxi kamɨwetɨ meyunaukame wahaamatɨa pɨtiutixaa: Pedro, Santiago, Juan, metá Andrés. Yatiwarutahɨaweka kepauka tuukaari mɨtixɨximenikekaitsíe, xeime ʼiwaurika kwinié rayeʼakame putaxaa: «¿Keane yeme pɨhɨɨkɨ tiʼuximayatame mɨrayeʼatɨwa metá mɨtiutiʼeriwa kemɨtikayaní, ʼukiyarieya mɨtíhɨritɨa teʼuximayatamete mɨtiwamikwanikɨ memeiyehɨakatsíe? » (Mateo 24:3, 45; Marcos 13:3, 4). Mɨkɨ niukikɨ Ketsuútsi ʼukiyari yuxaatatɨ, putayɨ́ hiipame waranuyewaunikekai, keane memiweiya memɨtewamikwanikɨ Yuútsi Niukíeyakɨ, tuukaari mɨtixɨximenikekaitsíe. ¿Keane mɨkɨ pɨhɨɨkɨ tiʼuximayatame?

Tsimeyupaɨmetɨ mepɨhɨɨkɨ Ketsuútsi memuweiya Yuútsi yutɨrɨkariya mɨkayuhekɨakɨ mɨwaranuyewau. «Tiʼuximayatame» tsimepɨyupaɨme Yuútsi yutɨrɨkariyakɨ mɨwaranuyewau, mepɨhɨɨkɨ Yuútsi Kiekarieyatsíe Memanuyehaitɨtɨa. Mɨkɨ ʼikwai Yuútsi Niukíeyatsíe mieme yuʼiwama Jehová memayexeiya mepɨwayetuiriwa yakatixaɨ mepɨtewamikwa. Tiʼuximayatame mɨrayeʼatɨwa pɨtikuyuruwa hiikɨ «waɨkawa ʼikwai temɨtehexeiyani» (Lucas 12:42).

Yuútsi kiya pɨʼɨɨwiya (1 Timoteo 3:15). Ketsuútsi tiʼuximayatame mɨtiuhɨritɨa, pɨʼɨɨwiyanikekai Jehová kiekarieya kwieepatsíe mɨtaama, pinite kiekarieyatsíe mɨtimieme, mepɨwaruwitɨximenikekai niukíeya mɨkuxaxaatsiwanikɨ metá mepɨtewaʼɨɨkitɨakakekai xeɨritsikatetsíe. ʼAyumieme tita temɨteheuyehɨwá «tiʼuximayatame mɨrayeʼatɨwa metá mɨtiutiʼeriwa kemɨtikayaní», ʼikwai Yuútsi Niukieyatsíe mieme pɨranayenenetɨwa xapatetsíe, kɨmana temɨteʼutiʼɨɨkitanikɨ tsiere pɨranayenenetɨwa tita temɨtekuxexeiya naime xeɨritsikatetsíe.

«Tiʼuximayatame» yeme pɨrayeʼatɨwa mɨkatikupatakɨ tita Yuútsi Niukieyatsíe mɨrayemié metá yepɨtikamié Yuútsi Niukíeya mɨkuxaxaatsiwanikɨ, tsiere pɨtiutiʼeriwa kemɨtikayaní ʼaixɨ yeme mɨtiʼɨɨwiyakɨ tita Ketsuútsi mɨtipiniteya kwieepatsíe (Hechos 10:42). Hiikɨ tepɨyumɨire Jehová temayexeiya metá waɨkawa ʼikwai tepɨtehexeiya Yuútsi Niukíeya heetsíe mɨtimieme, yemɨtiyurienekɨ Jehová waɨkawa piʼɨɨwiya (Isaías 60:22; 65:13)

• ¿Keane Ketsuútsi pɨhɨɨritɨa tɨɨriyamaama Yuútsi Niukieyatsíe mɨtiwamikwanikɨ?

• ¿Kehepaɨ «tiʼuximayatame» yeme pɨrayeʼatɨwa metá pɨtiutiʼeriwa kemɨtikayaní?