ʼƗKITƗARIKA 02
Biblia pɨtatiyexatɨa tita temɨtekwewie
Hiikɨ meyuwaɨkawa teuteri mepɨteʼukaʼeniwa, waɨká mepeuyuhɨawe metá mepɨyuheiwerie. ¿ʼEkɨ mɨpaɨ tiʼanemetsíe petiuyemié? Xɨka kwiniyakɨ petiukaʼeniwani yakatixaɨ xɨka keane waɨká pemɨnakeʼerie ʼumɨní xɨari pepɨtiuyuʼiwawiyawe xɨka mɨkɨ ʼuxaʼá waarié tikumawerimɨkɨ. Biblia ʼeiyarikate pɨtatsiyexatɨa tatsikanɨtɨatɨyeikame.
1. ¿Tita tetetakwewie Biblia kehaine?
Biblia yapɨtarahɨawe titakɨ haxa mɨtiyɨatɨne naitsarie kwieepa. Metá tsiere, niuki ʼaixɨ ʼaneneme pɨtatsiyexaatɨa, paine naitɨ haxa mɨtiʼanene kwitɨwa pɨtikumawiré. Biblia ʼipaɨ merahɨawe «nemuxeyetuirienikɨ tita xemɨtetakwewie» (nakaterɨwa Keremiyaxi [Jeremías] 29:11, 12). Mɨkɨ pɨtatsipareewieni temɨtenewiekakɨ haxa temɨteʼanuyekɨkatsíe metá ʼaixɨ temɨtekuʼeriwani. Metá tsiere pɨtarahɨawe kenaame heyeme teyutemamawietɨ teʼakɨɨniwawe.
2. ¿Biblia kehaine ketiyɨní ʼuxaʼá waarié?
Biblia paine ʼuxaʼá waarié «Hatsuakuri mepɨkakwini, mepɨkaʼutitsuanani, mepɨkayuhiwerieka meta mepɨkateʼukakukuineni» (nakaterɨwa Matsiɨkɨtɨ kemɨratɨa [Apocalipsis] 21:4). Xewitɨrí pɨkayehaakamɨneni, pɨkananaimarieka, pɨkatikuyeni metá mɨɨkí pɨkumawiré. Biblia paine kenaame teuteri heyeme meʼuʼuwaatɨ meʼakɨɨné kwieepa, haaraweri ʼayeitɨarieyu.
3. ¿Tita metiupareewiwe yuri pemɨtiʼerieka kenaame rayuyeʼatɨani Biblia kemaine?
Hiipatɨ meputiyuane kenaame ʼariké ʼaixɨ tikuyɨní, yatɨtɨtá yuri mepɨkateʼerie kenaame mɨkɨ rayuyeʼatɨani. Biblia kemaine riixɨ́a pɨrayuyeʼatɨani. Mɨkɨtsíe yuri teteʼerietɨ tepakɨɨniwe xɨka teteʼutiwawani «ʼutɨarika xapayaritsíe», tatsɨrí, xɨka Biblia teʼakaterɨwani (Nɨʼariekate [Hechos] 17:11). Mɨkɨ metsipareewieni pemɨranuyewauní xɨka pereumaimɨkɨni ʼuxaʼá waarietsíe timieme.
MATSI WAƗKÁ TINETIMAʼÍ
Hiipame tepɨtexeiya tita ʼuxaʼá waarié temɨteʼanunake Bibliatsíe mɨrayemié. Tsiere hiipame teuteri mɨkɨ kemɨtiwakupareewiwa.
4. Biblia paine heyeme teʼuʼuwaatɨ tepakɨɨné witsitiuʼanekaku
ʼEena mɨrakaʼuxatsíe pɨrayemié tita mɨrayuyeʼatɨani. ¿Keane waɨká ʼatsikunanake? ¿Titayari?
Bibliatsíe xenakaterɨwa tita mɨrayuyeʼatɨani hamaatɨa mɨkaʼutɨká metá xeteneutixaata ʼikɨtsíe:
¿ʼEkɨ peraine ʼikɨ textos tatiupareewiwe? ʼAnuiwarima metá ʼahamikuma, ¿tsiere tiwarupareewiwe?
Neutiʼeriwani ʼipaɨ tiʼanekaku pemuyeikanitsíe:
XEWITƗRÍ... |
MEYUNAITƗ... |
|---|---|
|
|
|
|
|
|
|
|
|
|
5. Tita temɨtetakwewie tatsiʼupareewiwe hiikɨ tatuukaritsíe ʼaixɨ temɨteukuteni
Waɨkawa teuteri mepɨyuhɨawe hiipatɨtá mepɨhaʼa kwieepa ʼaixɨ mɨkatiyɨatɨnekɨ. Hiipatɨ yɨɨkɨ mepɨtekuyuruwa ʼaixɨ meteheuyurikutɨ. Tineuxeiya kehepaɨ hiipame tiwakupareewiwa tita ʼuxaʼá waarié ʼaixɨ mɨtiyɨní. VIDEO xeneuxeiya metá xeteneutixaata ʼikɨtsíe:
Temɨteʼuxeitsíe, ¿Rafika titatsíe reuyuhɨawekai?
Tseepá mɨkatiukumawirixɨ tita mɨtixeiyakai haxa mɨtiʼanene, ¿ketipareewi Bibliatsíe mɨretimá?
Tita temɨtetakwewie Bibliatsíe mɨraxaxaatsiwa tatsiʼupareewiwe temɨkayuhɨawenikɨ metá temɨteʼanutaxexeiyani haxa mɨtiʼanene. Xenakaterɨwa Temaiwawemete [Proverbios] 17:22 metá Xumatari [Romanos] 12:12, metá xeteneutixaata ʼikɨtsíe:
¿ʼEkɨ kepehaine ʼuxaʼá waarié kemɨtiyɨní Bibliatsíe mɨraxaxaatsiwa, hiikɨ ʼatuukaritsíe metiupareewiwe? ¿Titayari?
HIIPATƗ KEMEMUTIYUANE: «Biblia mɨraxaxaata kemɨtiyɨní mɨkatiyuritɨni hepaɨ pɨrekuyɨne».
Xɨka yeme rayuyeʼatɨamɨkɨ Bibliatsíe mɨraxaxaatsiwa, ¿ʼaixɨ tiʼane temeyeterɨwani? ¿Titayari?
TITA PEMƗRETIMÁ
Biblia pɨtarahɨawe teyutemamawietɨ tepakɨɨné, mɨkɨ pɨtatsikupareewiwa temɨyehuunikɨ tseepá haxa temɨteʼanuyehuu.
Mɨrayeʼerieni
¿Títakɨ teuteri meteheuyehɨwá tita mɨrayeʼatɨarieni?
¿Biblia kehaine ʼuxaʼá waarié kemɨtiyɨnitsíe?
¿Hiikɨ kemetiupareewiwe tita ʼuxaʼá waarié mɨrayeʼatɨarieni?
MATSI WAƗKÁ TINEUKAXEIYA
Matsi waɨká tinetimaʼí tita temɨtetakwewietsíe.
«¿Kehepaɨ teteʼukaxeiyawe tita temɨtetakwewie?» (¡Despertad!, 22 de abril de 2004)
Tinetimaʼí memɨtekukuye kemɨtiwakupareewiwa tita memɨtetakwewie.
«¿Biblia kemaine tatiupareewiwe temɨtekukuyenitsíe?» (Artículo de jw.org)
Video kwikarimaakame pemɨxeiyatsíe, tineuyumaa waʼatɨ ʼanuiwari wahaamatɨa haaraweritsíe xeteʼuʼuwa.
Tinakaterɨwa kehepaɨ mɨtipareewi xeime activista tita Biblia mɨtatiyexatɨa.
«Kwieepa haxa mɨtiyɨatɨne nepɨkareupatamɨkɨrí» (La Atalaya, 1 de julio de 2013)