ʼƗKITƗARIKA 11
Kehepaɨ matsi ʼaixɨ Biblia temɨtehetiʼenietɨkɨniwe
¿Heiwa perakamatɨyeika xɨka kwinié tipaɨmeme petikatsutɨamɨkɨ? Xɨari pemɨrayeʼatɨanikɨ tsipapaɨmemekɨ meri pepɨtiukatsutɨawe. Yaxeikɨ́a tsiere pepɨtiuyuriwe Yuútsi niukieya pemakaterɨwanikɨ. Xɨaritá pepɨtiyukuʼiwawiya: «¿Hakewa nepɨrekatsutɨani?». ʼIkɨ ʼɨkitɨarikatsíe tepɨtehetimaní kehepaɨ Yuútsi niukieya pemɨtiutiterɨwani metá pemɨtiuyutiʼɨkitɨwani peyutemawietɨ.
1.¿Titayari ʼaixɨ tiʼane naime tuukaaritetsíe Biblia temakaterɨwani?
Keane naime tuukaaritetsíe Biblia makaterɨwa, nutsɨ «Jehová nɨʼarikayatsíe», yutemawietɨ payaaní metá yutuukaaritsíe ʼaixɨ reuʼerietɨ (nakaterɨwa Salmo 1:1-3). Pemɨtikatsutɨanikɨ, neuyutaʼinɨata xei tuukaari tsipapaɨmeme peʼakaterɨwatɨ. Xɨka waɨká perakaterɨwani Yuútsi niukieyatsíe, waɨkawa ʼatsinaketɨ payaaní.
2.¿Ketatiupareewiwa Biblia temakaterɨwanitsíe?
Temɨtehetiʼenietɨkɨkanikɨ tita temɨteʼakaterɨwa Bibliatsíe, teputiʼeriwani tita temɨteʼakaterɨwaxɨtsíe. ʼIkɨ xapa xeikɨ́a tepɨkaʼakaterɨwani, tsiere «ʼamaitɨ heetsiena ketinakaterɨwani» (Josué 1:8). Pemɨtiutiterɨwanitsíe ʼipaɨ ketineyukuʼiwawiyani: «¿ʼIkɨ kenetikuʼɨkitɨwa Jehová heetsíe? ¿ʼIkɨ kehepaɨ netiupareewiwe netuukaaritsíe? ¿Kehepaɨ hiipame netiwarupareewiwe ʼikɨkɨ?».
3.¿Kepauka nepanuyewauwé Yuútsi niukieya nemakaterɨwanikɨ?
¿Tuukaari pekatihɨ́ Biblia pemakaterɨwanikɨ? Teyuwaɨká mɨpaɨ tepɨʼane. Biblia paine: «ʼAixɨ xetekuyuruwatɨ yutuukaaritsíe» (Efesios 5:16). Mɨpaɨ pepɨtiuyuriwe tuukaarikɨ pemekahɨwenitsíe Yuútsi niukieya pemakaterɨwanikɨ. Hiipatɨ mepɨteʼakaterɨwa ximeri. Hiipatɨtá taikai, nutsɨ memukaʼuxipiwetsíe. Hiipatɨ tsiere mepekaterɨwa tɨkaarikɨ mekakahiwetɨ. ¿Kepaukatá ʼekɨ pepekahɨwé pemekaterɨwanikɨ?
MATSI WAƗKÁ TINETIMAʼÍ
Tinetimaʼí kepemɨtiuyuriwe Biblia terɨwarika metsinakenikɨ. ʼEena hiipame pepɨtikaxeiya kehepaɨ ʼaixɨ pemɨtiyukuyuruwani pemɨtiyutiʼɨkitɨanikɨ Bibliatsíe.
Terɨwarika Bibliatsíe tetemawietɨ tepakɨniwe ʼikwai mɨkatatsinakekai hepaɨ, reumietɨ tatsinaketɨ payeiwé.
4. Tinetimaʼí kehepaɨ Biblia petemawietɨ pemayeiwé
Xɨari waɨriyarikatsata terɨwarika Bibliatsíe pepukatsutɨawe. ʼAxɨkai, ʼaxɨkai ʼikwai tatsinaketɨ mayeika hepaɨ pɨʼane, ʼeena pɨraniuwa waɨkawa tepɨtenakeʼerieka Biblia teʼutiterɨwatɨ. Xenakaterɨwa 1 Pedro 2:2 metá xeteneutixaata ʼikɨtsíe:
¿Biblia ʼaumɨ́ xɨka peʼutiterɨwani naime ʼatuukaaritsíe metsinaketɨ rayeiwé?
VIDEO xeneuxeiya xemɨwaretimanikɨ teemari kehepaɨ terɨwarika Bibliatsíe tiwanaketɨ kemɨratɨa. ʼAriké xeteneutixaata ʼikɨtsíe:
¿Tita teemari meteʼanutaxeiyaxɨa videotsíe?
¿Tita tiwarupareewi memɨkatehayewakɨ?
¿Kemeteʼuyuri terɨwarika Biblia wanaketɨ mayanikɨ?
Kehepaɨ pemɨtiutsutɨawe:
Xeime Biblia pepukuwauwé ʼaixɨ pereitiʼenietɨyeikame. Peputaʼinɨatawe Traducción del Nuevo Mundo xɨka ʼaniukikɨ xuaweni.
Pepɨtiukatsutɨawe perakaterɨwatɨ waɨká mɨʼatsinaketsíe. ʼEena mayemié mɨtitewatsíe «Kehepaɨ pemɨtiutsutɨawe Biblia peʼutiterɨwatɨ».
Keneyeʼutɨaximeni tita pemɨrakaterɨwa. Keneuxeiya mɨtitewá: «Neterɨwarika Bibliatsíe», ʼimatɨrieka mayemietsíe.
Neutiwawá JW library®. Xɨka ʼatelefonotsíe peikaʼɨna nutsɨ tita pemɨrexeiyatsíe, pepɨyɨwekaxɨani pemɨrakaterɨwa metá pemiʼenieni Yuútsi niukieya tseepá kewa.
Tsiere tinekuxexeiyani tita matsi waɨká mɨrayemié Traducción del Nuevo Mundo. Mana pepɨtikaxeiya mapas, tablas metá glosario mɨpaɨ matsi waɨká pepɨretimaní Bibliatsíe.
5. ʼAixɨ keneyukuyuruwani pemɨtiutiʼɨkitɨariwanitsíe
Xenakaterɨwa Salmo 119:34 metá xeteneutixaata ʼikɨtsíe:
¿Títakɨ ʼaixɨ tiʼane pemuyutanenewiwani ʼakuxi Biblia pekaʼakaterɨwawetɨ metá ʼaixɨ pemuyukuyuruwanikɨ ʼaʼɨkitɨarikatsíe?
¿Kehepaɨ matsi petiuyuriwe pemɨtiutiʼɨkitɨariwanitsíe? ʼIpaɨ pepɨtiuyuriwe:
Matɨari mɨrakaʼutɨká, naime kenakaterɨwani ʼɨkitɨarikatetsíe.
Textos keneutiwawani, nakaterɨwani metá keneutiʼeriwani kemɨtikunanake pemɨtiyuʼɨkitɨatsíe.
Niuki kenanukuʼutɨaxɨa, ʼiwaurikate mɨtiʼeiya. Pemɨrakumaikakɨ kepauka pemɨtitiʼɨkitɨarienitsíe.
¿Peramaikái?
Jehová niukieya temɨkuxaata Biblia yɨɨkɨ ʼaneneemetsíe tepɨteʼayutiʼɨkitɨaxime, mɨɨtá yeme waɨkawa pɨtatsinake Traducción del Nuevo Mundo ʼaixɨ mɨreukuʼuxekɨ metá meyutiʼenierietɨyeikakɨ, tsiere Yuútsi kemɨtitewá mayemiekɨ (ʼikɨ keneuxeiya jw.orgtsíe mayemié: «¿Jehová niukíeya memɨkuxaata yuBiblia metehexeiya?»).
HIIPATƗ KEMEMUTIYUANE: «Kemaine Yuútsi niukieya waɨkawa tuukaari peuyewetsé heetsiena pemɨretimamatekenikɨ».
¿ʼEkɨtá kepetiyukɨhɨawe?
TITA PEMƗRETIMÁ
Bibliatsíe waɨkawa pemɨretimamatekenikɨ, kenakaʼutɨa kepauka pemititerɨwani, Yuútsi pareewiya keneutawawiriwani pemɨretiʼenietɨyeikanikɨ ʼaterɨwarikatsíe metá ʼaixɨ keneyukuyuruwani pemɨtiutiʼɨkitɨariwatsíe.
Mɨrayeʼerieni
¿Tita metiupareewiwe matsi waɨká Bibliatsíe pemɨretimamatenikɨ?
¿Tuukaarikɨ keʼupaukakaku pepɨyɨwe pemɨrakaterɨwani metá pemɨtiuyutiʼɨkitɨwani Yuútsi niukieya?
¿Títakɨ reuyewetsé ʼaixɨ pemuyukuyuruwani pemɨtiutiʼɨkitɨariwanitsíe?
MATSI WAƗKÁ TINEUKAXEIYA
ʼEena tineukaxeiya kehepaɨ matsi metiupareewiwe Yuútsi niukieya ʼaixɨ pemɨretiʼenietɨyeikanikɨ.
«Yuútsi niukieya terɨwarika kenetemawieka» (La Atalaya, núm. 1 2017)
Tihaikatɨ kemɨʼatiupareewiwe Biblia pemakaterɨwanikɨ.
Tineuxeiya kehepaɨ metiunakiriwe Biblia.
Tinetimaʼí hiipatɨ kememutiyuane meteheutewitɨrí Biblia meʼakaterɨwatɨ.
Kehepaɨ Bibliatsíe pemɨtiuyuʼɨkitɨawe metá ʼaixɨ pemɨreitiʼenietɨyeiwé (2:06)