Pagpangita sa mga Takus
1 Isa ka hangkat para sa aton ang instruksion ni Jesus tuhoy sa pagbantala. Sia nagsiling: “Bisan diin nga banwa ukon minuro ang inyo sudlan, usisaon ninyo kon sin-o didto ang takus.” (Mat. 10:11) Apang bangod wala pirme sa balay ang mga tawo karon, paano naton mahimo ang epektibo nga pagpangita?
2 Analisaha ang Imo Teritoryo: Magsugod paagi sa pag-analisar sang imo teritoryo. San-o posible nga yara sa ila puluy-an ang mga tawo? Diin ayhan sila masapwan kon adlaw? May inadlaw bala sa sulod sang semana ukon mga inoras sa adlaw nga mas mabinatunon sila kon duawon? Ang pagpasibu sang imo ministeryo sa rutina kag mga kahimtangan sang mga tawo sa lokal nga teritoryo makabulig sa imo nga matigayon ang labing maayo nga mga resulta.—1 Cor. 9:23, 26.
3 Nangin madinalag-on ang madamo nga manugbantala nga masapwan ang madamo nga tawo sa ila puluy-an kon kasisidmon. Ang pila ka tagbalay mas relaks kag luyag mamati sa sini nga tion. Kon tingulan kag indi ka makagua bangod sang mga baha, ang pagpanaksi paagi sa telepono ukon pagsulat mahimo mangin epektibo. Ang pagpangabudlay sa duog sang negosyo kag pagpanaksi sa publiko nga mga duog mga paagi man nga malab-ot ang mga tawo sang maayong balita.
4 Sang isa ka bulan sang pinasahi nga hilikuton, naghimo sing kahimusan ang isa ka kongregasyon nga magpanaksi sa kahapunanon sang Sabado kag Domingo kag sa gab-i sang Mierkoles kag Biernes. Nag-organisar man sila sang pagpanaksi sa telepono kag sa mga duog sang negosyo. Ini nga mga kahimusan nagresulta sang daku gid nga kapagsik sa ministeryo amo nga namat-od ang kongregasyon nga padayunon ini.
5 Mangin Makugi sa Pagduaw Liwat: Kon isa ka hangkat sa inyo teritoryo nga masapwan ang mga tawo sa puluy-an kon magduaw liwat, tilawi nga magkontrata sang pat-od nga tion sa pagbalik liwat antes magbiya sa tagsa ka pagduaw, lakip sa una nga pagduaw. Nian, siguraduha nga tumanon ang ginkasugtan. (Mat. 5:37) Kon nagakaigo, sarang mo mapangayo ang numero sang telepono sang tagbalay. Makabulig man ini sa imo nga mapakig-angutan sia liwat.
6 Ang aton makugi nga mga panikasog sa pagpangita sa mga takus kag sa pagtatap sa interes pat-od nga pakamaayuhon gid ni Jehova.—Hulu. 21:5.