“Maayo Gid nga Trabaho!”

AMO ang mabasa sa isa ka ulong-dinalan sa St. Helena News. Ginhimo ini liwat sang mga Saksi ni Jehova. Nagpatindog sila sing ikaduha nga Kingdom Hall sa diutay nga isla sang St. Helena, kapin sa isa ka libo ka kilometro sa katundan sang Aprika. Ang tinukod nahamtang sa isa ka mataas nga duog nga ginatawag Half Tree Hollow, nga may matahom nga talan-awon sa Atlantic Ocean.

Ang inspektor sang tinukod kag ang hepe sang mga bombero nagbungat sing pila ka pagdayaw sa mga Saksi. “Nakahimo kamo sing butang nga dalayawon,” siling sang isa ka retirado nga gobernador. “Isa ini ka maayong halimbawa!” dugang sang inspektor sa koryente.

Ang adlaw sang dedikasyon gintalana sa Sabado, Enero 9, 1993. Paagi sa mga anunsio sa radyo, ang bug-os nga isla sang mga 6,000 ka tawo gin-agda sa pagtambong. Apang matapos ayhan sang isa ka diutay nga grupo sang lokal nga mga Saksi, mga 150 tanan, ang proyekto sing sibu sa tion? Si Sarel Hart, isa ka nagalakbay nga manugtatap gikan sa Bagatnan nga Aprika, nagpaathag: “Nabalaka kami sang hapon sang ikawalo nga adlaw, sang ang alagyan sa unahan kinahanglan pa tampukan agod magtapan.” Paano sila makatigayon sing mga trak, mga kasangkapan, kag bastante nga inugtampok agod magtapan ang duta sa sining atrasado na nga oras? Si Hart nagpadayon: “Nabatian ni Jehova ang hipos nga mga pangamuyo. Ang kontraktor nga nagsuplay sing inugtampok nga materyal nagsiling sa kauturan: ‘Nangabay kamo sing lima ka trak. Nahibaluan ko nga nagakinahanglan kamo sing dugang pa. Nag-untat ako sa pag-isip​—ginpakargahan ko na lang ang mga trak tubtob may bastante na kamo.’ Alas 4:00 na sang hapon sang ang operator sa traktura naglabay sa iya pagpauli. Ginpadulog sia sang isa sang mga Saksi kag ginpaathag ang amon kahimtangan. ‘Bayari lang ninyo ang akon overtime,’ siling niya, kag ginpadulog niya ang iya makina sa alagyan kag gintapan ang duta suno sa kadasigon sang pagtampok sang mga trak. Sa sulod sang tatlo ka oras ang batsehon nga alagyan padulong sa Kingdom Hall nangin isa ka matapan nga alagyan.”

Sang masunod nga adlaw isa ka kabilugan sang 328​—kapin sa 5 porsiento sang mga pumuluyo sang isla​—ang nagtambong sa pamulongpulong sang dedikasyon. Lakip sa tumalambong amo ang sekretaryo sang gobierno kag ang isa sang mga konsehal, kag ang Anglikano nga obispo nagpadala man sing mensahe sang pagpanginbulahan.

[Mapa sa pahina 31]

(For fully formatted text, see publication)

Aprika

St. Helena

[Retrato sa Pahina 31]

Bag-o nga Kingdom Hall