Pagpalista sa Teokratikong Eskwelahan sa Pagministro
1 Ang Teokratikong Eskwelahan sa Pagministro naghanas sa minilyon ka Saksi ni Jehova subong mga ministro. Madumduman sang madamo sa aton kon daw ano nga katahap ang ginbatyag naton sang nagpalista kita primero sa sining eskwelahan, kag karon mapasalamaton naton nga ginakilala ang papel sini sa aton espirituwal nga pag-uswag subong mga manunudlo sang Pulong sang Dios. (Ipaanggid ang Binuhatan 4:13.) Nagpalista ka bala sa sining tumalagsahon nga eskwelahan?
2 Sin-o ang mahimo makapalista? Ang pahina 73 sang Organisado sa Pagtuman sang Aton Ministeryo nagasabat: “Ang tanan nga nagapakig-upod sing aktibo sa kongregasyon mahimo makapalista, lakip na ang mga tawo nga bag-o pa lang nagatambong sa miting, lamang nga ang ila kabuhi wala nagasupak sa Cristianong mga prinsipio.” Ginaagda namon ang tanan nga kalipikado nga magpalapit sa manugtatap sang eskwelahan kag magpalista.
3 Ang Programa sang Eskwelahan Para sa 1997: Ang programa sang Teokratikong Eskwelahan sa Pagministro para sa 1997 nagatuptop sang nanuhaytuhay nga mga panudlo kag mga karakter sa Biblia, subong man sang maragtas sang organisasyon. Dugang sa pagpauswag sang aton mga ikasarang sa paghambal kag pagtudlo, makatuon kita gikan sa madamong espirituwal nga mga hiyas nga masapwan sa kurikulum sini kada semana. (Hulu. 9:9) Kon maghanda kita para sa eskwelahan, nga nagalakip sang semanal nga pagbasa sang Biblia, kag magtambong sing tayuyon, makatigayon kita sing dakung espirituwal nga kaayuhan gikan sa programa.
4 Para sa 1997 ang kalabanan nga mga pagbasa sang Biblia para sa Asaynment Num. 2 mas malip-ot sangsa nagligad nga mga tuig. Kon nagahanda para sa sini, dapat orasan sing maayo sang estudyante ang iya pagbasa kag nian hibaluon kon pila sa lima ka minuto nga gintalana sa sini ang magamit para sa introduksion kag konklusion. Magatugot ini sa estudyante nga magamit sing bug-os ang iya oras kag mapalambo ang iya ikasarang sa pagbasa kag arte sa pagpamulongpulong sing ekstemporanyo.—1 Tim. 4:13.
5 Ang dipormal nga pagpanaksi gindugang subong posible nga danyag para sa mga presentasyon sa Asaynment Num. 3, nga napasad sa Ihibalo nga libro. Gani, mahimo pilion sang isa ka utod nga babayi ang pagduaw liwat, pagtuon sang Biblia sa puluy-an, ukon dipormal nga pagpanaksi subong danyag para sa sining asaynment.
6 May pribilehiyo ka man sa paghatag sing pamulongpulong sa pagtudlo, mga talalupangdon nga punto sa Biblia, ukon asaynment sang isa ka estudyante, mapakita mo ang imo apresasyon paagi sa paghanda kag pag-ensayo sing maayo sang imo bahin, paagi sa pagpresentar sini nga may kombiksion kag kapagsik, paagi sa indi pagsobra sa oras, paagi sa pagpamati kag sa pag-aplikar sang laygay sang manugtatap sang eskwelahan, kag paagi sa pagtuman sing matutom sang imo asaynment. Sa amo ang imo pagpalista sa eskwelahan mangin pagpakamaayo para sa imo kag para sa tanan nga magapamati sa imo.