Sunda si Cristo Paagi sa Pagpakita sing Pagkadungganon
1. Paano ang tema sang kombension sa sini nga tuig naangot sa pagpakita sing pagkadungganon?
1 Ginalaragway sang Biblia ang Soberano sa Bug-os nga Uniberso nga si Jehova, subong napanaptan sing kadungganan. (Sal 104:1) Ang ginpanghambal kag gingawi ni Jesus pirme gid nagahatag sing kadungganan sa iya Amay kag sa kahimusan sang iya Amay. (Juan 17:4) Ang kada isa sa aton may mga kahigayunan nga ilugon si Jesus kag magdala sing kahimayaan kay Jehova sa aton nagapakari nga “Sunda si Cristo!” Distrito nga Kombension.
2. Paano ang aton paghanda para makatambong sa kada sesyon magahatag sing kadungganan kay Jehova?
2 Dungganon nga Pagsimba: Mapadunggan naton si Jehova paagi sa pagtambong sa espirituwal nga kapiestahan nga ginhanda niya para sa aton. Nakalisensia ka na bala sa imo amo kag ginpahisuno ang imo mga hilikuton agod makatambong ka sa sesyon kada adlaw, pati na sa Biernes? Naplano mo na bala nga mag-abot sing temprano agod may tion ka sa pagpangita sing pulungkuan kag makapakigbahin sa nagabukas nga ambahanon kag pangamuyo? Naplano mo na bala nga magbalon agod makapanyaga ka sa duog nga pagahiwatan sang kombension upod sa imo mga kauturan? Sa umpisa sang kada sesyon, kon mainayuhon na kita nga pangabayon sang tsirman nga magkadto sa aton mga pulungkuan, dapat nga untaton na naton ang pagpakigsugilanon kag magpungko antes magsugod ang programa.
3. Ngaa ang pagpamati sing maayo sa programa nagapadungog sa aton pagsimba?
3 Ang pagpamati sing maayo sa programa nagapadungog man sa aton langitnon nga Amay. Sang nagtambong ang isa ka reporter sa isa ka distrito nga kombension sa ila lugar, nagsulat sia nga matingala gid ang mga tagpanilag sa “maayo nga paggawi sang mga nagatambong, kay matinong sila nga nagapamati sa programa kag nagapakita gid nga ginapabaloran nila ang espirituwal nga mga butang.” Nagkomento man sia nga “madamo katama nga kabataan . . . , ang makatilingala nga nagapahimunong tanan ukon masako sa pagbukad sing mga teksto sa Balaan nga Biblia.” Kon nag-umpisa na ang sesyon, indi kita dapat magpakigsugilanon kon indi man gid kinahanglanon, mag-text, magkaon, ukon magdayandayan. Ang mga kabataan dapat magpungko sa tupad sang ila mga ginikanan agod mabuligan sila nga makabenepisyo sa programa. (Deut. 31:12; Hulu. 29:15) Kon himuon naton ini, ginapakita naton nga ginatahod naton ang iban kag ginapabaloran naton ang importante katama nga espirituwal nga pagkaon nga ginaaman sa aton.
4. Ngaa dapat mangin dungganon ang aton panagway sa kombension?
4 Dungganon nga Panagway: Madamo ang nag-apresyar sa mga pahanumdom sang pamulongpulong nga “Magpakita Sing Cristianong Dignidad sa Tanan nga Tion” sang nagligad nga distrito nga kombension. Ginpadaku sadto nga dapat panikasugan sang mga alagad sang Dios nga mangin dungganon sa ila pagpamayo kag pamustura. Dapat man naton ini hatagan sing serioso nga igtalupangod sa sini nga tuig. Ginapakita sang aton panagway kon ano ang aton ginabatyag tuhoy kay Jehova kag sa aton pribilehiyo nga mangin iya mga Saksi. Dapat ang pamayo naton nagapakita “nga nagapangangkon [kita] nga nagasimba sa Dios.”—1 Tim. 2:9, 10, NW.
5. Paano naton mahuptan nga dungganon ang aton panagway sa tion sang pagliwaliwa sa duog nga ginahiwatan sang kombension?
5 Magapanapot lamang bala kita sing dungganon kon nagapamati sa programa? Dumduma nga madamo ang makaobserbar sa aton kon ginatakod naton ang aton badge card sa banwa ukon siudad nga ginahiwatan sang kombension. Dapat matalupangdan sang iban nga dungganon ang aton panagway. Busa, bisan pa nagaliwaliwa kita, subong sang pagkaon sa gua pagkatapos sang programa sa hapon, dapat magpanapot kita nga nagakabagay sa mga ministro nga nagtambong sa isa ka Cristianong kombension kag indi dapat mag-ilis sing maong, short, ukon T-shirt. Daku nga panaksi ang mahatag sini sa komunidad! Mahamuot si Jehova kon ang aton panagway nagapakita nga ministro gid kita niya.
6. Ano ang positibo nga mga resulta sang pagpakita sing Cristianong pagkadungganon?
6 Makalilipay nga mga Resulta: Ang pagpakita sing dungganon nga panagway sa aton kombension nagatuga sing mga kahigayunan sa di-pormal nga pagpanaksi kag nagahatag sing maayo nga impresyon. Pagkatapos sang isa ka kombension, ang isa ka opisyal nagsiling: “Wala pa ako nakakita sing subong sini kahim-ong nga mga tawo. Kamo gid ang sahi sang mga tawo nga luyag sang Dios nga ilugon namon.” Ang pagpadayag sing pagkadungganon nagapakita man nga ginatahod naton kag ginahigugma ang isa kag isa kag ginahimaya naton si Jehova. (1 Ped. 2:12) Ginapakita sini nga may kahadlok kita sa Dios kag ginaapresyar gid naton ang aton pribilehiyo nga matudluan sang aton Amay. (Heb. 12:28) Kabay nga panikasugan naton nga magpakita sing pagkadungganon samtang ginapaabot naton ang “Sunda si Cristo!” Distrito nga Kombension sa sini nga tuig.