Madaug Mo ang Negatibo nga Balatyagon

1-2. Ano ang ginabatyag ni apostol Pablo kon kaisa, kag ngaa naintiendihan naton ang iya ginabatyag? (Roma 7:21-24)

ANO ang pagkakilala mo kay apostol Pablo? Posible mahunahuna mo nga isa sia ka maisog nga misyonero, maayo sia magtudlo sa iban, kag madamo sia sing ginhimo nga sulat nga nangin bahin sang Biblia. Amo gid man sina si Pablo. Pero may mga tion nga nabalaka man sia, nasubuan, kag nagaluya ang buot. Gani, pareho gid sia sa madamo sa aton subong.

² Basaha ang Roma 7:21-24. Sa sulat ni Pablo para sa mga taga-Roma, ginsambit niya ang iya ginabatyag nga amo man ang ginabatyag sang madamo sa aton. Matutom nga Cristiano si Pablo kag gusto gid niya tumanon ang Dios, pero nabudlayan sia nga himuon ini bangod indi sia perpekto. Magluwas sa sini, ginakonsiensia sia gihapon kon kaisa kon madumduman niya ang mga ginhimo niya sang una. Kag nasubuan sia bangod may problema pa gid sia nga madugay na niya nga ginaantos.

3. Ano ang binagbinagon naton sa sini nga artikulo? (Tan-awa man ang “Dugang nga Paathag.”)

³ Bisan pa may mga tion nga nagaluya ang buot ni Pablo, wala sia nagpadaug sa iya negatibo nga balatyagon.a Sa sini nga artikulo, binagbinagon naton ini nga mga pamangkot: Ngaa nagsiling si Pablo nga “makaluluoy” sia? Paano niya nadaug ang negatibo nga balatyagon? Kag ano ang himuon naton para madaug man naton ang aton negatibo nga balatyagon?

ANG MGA RASON SANG NEGATIBO NGA BALATYAGON NI PABLO

4. Ano ang rason sang negatibo nga balatyagon ni Pablo?

⁴ Ang mga ginhimo niya sang una. Antes nangin Cristiano si Pablo, nga ginatawag Saulo sang una, madamo sia sing ginhimo nga malain nga ginhinulsulan niya sang ulihi. Halimbawa, ara sia sang ginbato ang matutom nga si Esteban para patyon, kag nag-ugyon sia sa sini. (Binu. 7:58; 8:1) Si Pablo man ang nagpanguna sa mapintas nga paghingabot sa mga Cristiano.—Binu. 8:3; 26:9-11.

5. Ano ang ginbatyag ni Pablo sa mga ginhimo niya sang una?

⁵ Sang nangin Cristiano si Pablo, may mga tion nga ginakonsiensia sia bangod sa mga ginhimo niya sang una. Kag samtang nagaligad ang tion, posible nga mas nagalalain pa gid sia. Halimbawa, sang ginhimo niya ang iya una nga sulat para sa mga taga-Corinto sang mga 55 C.E., nagsiling sia: “Indi ako takus tawgon nga apostol, bangod ginhingabot ko ang kongregasyon sang Dios.” (1 Cor. 15:9) Pagligad sang mga lima ka tuig, sa iya sulat para sa mga taga-Efeso, nagsiling sia nga sia ang “pinakakubos sa tanan nga balaan.” (Efe. 3:8) Kag sang nagsulat sia kay Timoteo, nagsiling sia nga isa sia anay ka ‘manugpasipala, manughingabot, kag arogante nga tawo.’ (1 Tim. 1:13) Sa banta mo, ano ayhan ang ginabatyag ni Pablo kon pagbisita niya sa isa ka kongregasyon, ara didto ang iya mga ginhingabot sang una ukon ang ila pamilya?

6. Ano pa gid ang nagpaantos kay Pablo? (Tan-awa man ang footnote.)

⁶ Isa ka tunok sa unod. Ginkumparar ni apostol Pablo sa “tunok sa unod” ang isa niya ka problema nga nagpaantos gid sa iya. (2 Cor. 12:7) Wala niya ginsiling kon ano gid ang iya problema. Pero base sa iya mga ginsulat, posible nga isa ini ka problema sa pisikal, sa emosyonal, ukon iban pa nga problema nga nagpabudlay gid sa iya.b

7. Ngaa nabudlayan si Pablo nga himuon ang husto? (Roma 7:18, 19)

⁷ Ang iya mga kaluyahon. Nabudlayan si Pablo nga pakigbatuan ang iya mga kaluyahon. (Basaha ang Roma 7:18, 19.) Gusto gid niya himuon ang husto. Pero bangod indi sia perpekto, indi ini mahapos. Nagsiling sia nga pirme ginakontra sang iya malain nga mga handum ang iya handum nga maghimo sang husto. Gani, grabe gid ang pagpangabudlay ni Pablo. (1 Cor. 9:27) Pero, nakahimo sia gihapon sang sala. Sigurado gid nga nagaluya ang iya buot kon nagabalik ang iya indi maayo nga mga kinaiya.

KON PAANO GINPAKIGBATUAN NI PABLO ANG IYA NEGATIBO NGA BALATYAGON

8. Base sa mga sulat ni Pablo, paano niya nadaug ang iya mga kaluyahon?

⁸ Base sa mga sulat ni Pablo, mahangpan naton nga ginpamensaran niya sing maayo kon paano makabulig ang espiritu sang Dios para madaug niya kag sang iya mga kauturan ang malain nga mga handum. (Roma 8:13; Gal. 5:16, 17) Ginsambit ni Pablo ang indi maayo nga mga kinaiya kag mga handum nga dapat likawan sang mga Cristiano. (Gal. 5:19-21, 26) Ginapakita sini nga ginpamensaran ni Pablo kon ano ang iya mga kaluyahon, kag gintun-an niya ang Kasulatan para mabal-an niya kon paano niya ini daugon. Sigurado gid nga gin-aplikar niya mismo ang iya ginlaygay sa iban.

9-10. Paano nadaug ni Pablo ang iya negatibo nga balatyagon? (Efeso 1:7) (Tan-awa man ang piktyur.)

⁹ Bisan pa may mga tion nga nagaluya ang buot ni Pablo, madamo gihapon sia sing rason para malipay. Halimbawa, nalipay gid sia kon makabaton sia sang maayo nga mga report halin sa malayo nga mga kongregasyon. (2 Cor. 7:6, 7) Abyan man niya ang mga kauturan. (2 Tim. 1:4) Kabalo sia nga nalipay sa iya si Jehova. Kag ‘matinlo ang iya konsiensia’ sa iya pag-alagad sa Dios. (2 Tim. 1:3) Bisan pa gani sang tion nga napriso si Pablo sa Roma, ginpalig-on niya ang iya mga kauturan nga ‘magkasadya pirme sa Ginuo.’ (Fil. 4:4) Mahangpan naton sa mga sulat ni Pablo nga wala sia nagpadaug sa iya negatibo nga balatyagon. Kay man, kon makahunahuna gani sia sang mga butang nga makapaluya sang iya buot, ginatinguhaan niya dayon nga magpamensar sang mga butang nga makapalipay sa iya.

¹⁰ Nadaug man ni Pablo ang iya negatibo nga balatyagon bangod kumbinsido sia nga isa ka regalo ni Jehova sa iya ang gawad. (Gal. 2:20; basaha ang Efeso 1:7.) Gani, sigurado sia nga ginpatawad na sia ni Jehova paagi sa halad-gawad ni Jesucristo. (Roma 7:24, 25) Bisan pa sa mga sala ni Pablo sang una kag sa iya mga kaluyahon, malipayon sia nga ‘nakahimo sang sagrado nga pag-alagad’ sa Dios.—Heb. 9:12-14.

11. Ngaa makapalig-on sa aton ang halimbawa ni Pablo?

¹¹ Pareho kay Pablo, posible nabudlayan man kita nga himuon ang husto. Kay man, kinahanglan gid naton panikasugan nga indi makahunahuna, makahimo, ukon makahambal sing malain. Posible ginasilingan man naton ang aton kaugalingon, ‘Makaluluoy gid ako!’ Binagbinaga ang isa ka sister nga si Elizac nga beintehon ang edad. Nagsiling sia: “Napalig-on gid ako sa halimbawa ni Pablo. Narealisar ko nga indi lang ako ang nagapakigbato sa pagluya sang buot. Ginapahanumdom sini sa akon nga nabal-an gid ni Jehova kon ano ang nagakatabo sa iya katawhan.” Pareho kay Pablo, ano ang himuon naton para may matinlo man kita nga konsiensia kag mangin malipayon sa pag-alagad bisan pa sa aton negatibo nga balatyagon?

KON PAANO NATON MADAUG ANG NEGATIBO NGA BALATYAGON

12. Ano ang dapat naton himuon sing regular para madaug naton ang negatibo nga balatyagon?

¹² Regular nga himua ang mga hilikuton nga makapasuod sa imo kay Jehova. Kon himuon naton ini, mas makapokus kita sa positibo nga mga butang. Makumparar naton ini sa aton mga ginahimo para makapabilin kita nga mapagros. Halimbawa, kon nagakaon kita sing masustansia nga pagkaon, kon regular kita nga naga-exercise, kag kon bastante ang aton tulog, naganami ang aton pamatyag. Amo man sina ang aton ginabatyag kon regular kita nga nagabasa sang Biblia, kon nagabantala kita, kag kon nagahanda kita, naga-attend, kag nagakomento sa mga miting. Kon regular naton nga himuon ini nga mga hilikuton, madaug naton ang negatibo nga balatyagon.—Roma 12:11, 12.

13-14. Ano ang nakabulig sa pila ka matutom nga kauturan?

¹³ Binagbinaga ang halimbawa ni John. Sang 39 anyos sia, nabal-an nga may kanser sia. Sang primero, nagluya gid ang iya buot. Daw indi sia makapati nga may kanser sia kay kahoben pa sa iya. Sadto nga tion, tatlo ka tuig pa lang ang edad sang iya bata nga lalaki. Paano nadaug ni John ang iya negatibo nga balatyagon? Nagsiling sia: “Bisan pa grabe sa akon ka kapoy, ginasigurado ko nga regular kami nga naga-attend sang akon pamilya sa mga miting, nagabantala, kag naga-family worship kada semana.” Nagsiling pa si John: “Sa umpisa, grabe gid ang akon kasubo. Pero natun-an ko nga pabakuron kita ni Jehova kag ipabatyag niya sa aton nga palangga gid niya kita. Gani, madaug naton ang negatibo nga balatyagon. Buligan ka gid ni Jehova, pareho sa ginhimo niya sa akon.”

¹⁴ Si Eliza, nga ginsambit kaina, nagsiling: “Sa kada tion nga naga-attend ako sa mga miting kag nagatuon ako, mabatyagan ko nga ginapamatian ako ni Jehova kag palangga gid niya ako. Nagapahalipay gid ini sa akon.” Ginsugid man ni Nolan, nga isa ka manugtatap sang sirkito sa Africa, kon ano ang nakabulig sa iya kag sa iya asawa nga si Diane. Sia nagsiling: “Bisan sa mga tion nga nagaluya ang amon buot, padayon kami nga nagapangamuyo, nagatuon sang Biblia, naga-attend sa mga miting, kag nagabantala. Maathag nga amo ini ang paagi ni Jehova para indi madula ang amon kalipay. Ginadumdom namon pirme nga buligan gid kami ni Jehova kag pakamaayuhon. Wala kami kabalo kon paano niya ini himuon, pero sigurado kami nga himuon gid niya ini.”

15. Ano ang posible kinahanglan pa naton himuon para madaug naton ang negatibo nga balatyagon? Maghatag sing halimbawa.

¹⁵ Para madaug naton ang negatibo nga balatyagon, may dapat pa gid kita himuon. Halimbawa, ibutang ta nga nagasakit ang imo likod. Para madula ini, indi bastante nga ipamasahe mo lang ini pirme. Dapat mo man hibaluon kon ngaa nagasakit ini. Posible kinahanglan mo mag-research ukon magpakonsulta sa doktor. Sing kaanggid, para madaug naton ang negatibo nga balatyagon, posible kinahanglan naton mag-research sa Biblia kag sa aton mga publikasyon kag mag-istorya sa hamtong nga mga kauturan. Binagbinagon naton ang pila pa ka panugda nga makabulig sa aton.

16. Ano ang himuon mo para mabal-an mo ang rason sang imo negatibo nga panghunahuna? (Salmo 139:1-4, 23, 24)

¹⁶ Mangamuyo kay Jehova nga buligan ka nga mabal-an ang rason sang imo pagkabalaka. Kabalo si Hari David nga kilala gid sia ni Jehova. Gani ginpangabay niya si Jehova nga buligan sia nga mabal-an ang rason sang iya “nagakabalaka nga mga panghunahuna.” (Basaha ang Salmo 139:1-4, 23, 24.) Puede mo man pangabayon si Jehova nga buligan ka nga mabal-an ang rason sang imo negatibo nga panghunahuna kag kon paano mo ini madaug. Pamangkuta man ang imo kaugalingon: ‘Ngaa grabe gid ang akon pagkabalaka? Ano nga mga butang ukon sitwasyon ang makapahunahuna sa akon sang negatibo? Ginapadalman ko gid bala ang negatibo nga panghunahuna imbes nga dulaon ini dayon?’

17. Ano nga mga topiko ang puede mo tun-an nga makapalig-on sa imo? (Tan-awa man ang piktyur.)

¹⁷ Tun-i ang mga topiko nga makabulig sa imo sitwasyon. Hatagi sang tion ang pagtuon sa mga kinaiya ni Jehova nga makapalig-on sa imo. Halimbawa, nakabulig gid kay apostol Pablo ang pagpamalandong parte sa gawad kag sa pagkamapinatawaron ni Jehova. Puede mo man ini himuon. Gamita ang Giya sa Pagtuon Para sa mga Saksi ni Jehova, Mga Teksto Para sa Aton Cristianong Pagkabuhi, ukon ang iban pa nga mga gamit sa pag-research para tun-an ang parte sa mga kinaiya ni Jehova pareho sang iya kaluoy, pagkamapinatawaron, kag mainunungon nga gugma. Ilista ang mga artikulo nga nakita mo sa imo pag-research. Ibutang ini nga listahan sa lugar nga makita mo ini dayon, kag tun-i ini nga mga artikulo kon nasubuan ka. Tinguhai nga iaplikar ang imo nabasa sa imo sitwasyon.—Fil. 4:8.

18. Ano nga mga topiko ang gintun-an sang pila ka utod?

¹⁸ Binagbinaga si Eliza nga ginsambit kaina. Nag-research sia parte kay Job. Nagsiling sia: “Nagdululungan ang akon mga problema. Gani, gintun-an ko ang halimbawa ni Job. Grabe gid ang pagluya sang iya buot bangod sang madamo nga problema. Pero bisan pa wala sia kabalo kon ngaa nagaantos sia, padayon sia nga nagpangayo sing bulig kay Jehova.” (Job 42:1-6) Si Diane, nga ginsambit kaina, nagsiling: “Gintun-an namon sang akon bana ang libro nga Mangin Suod kay Jehova. Nagapasalamat gid kami kay ginadihon kami ni Jehova pareho sa ginahimo sang isa ka maninihon sa daga. Kon nagaluya ang amon buot bangod sa amon mga kakulangan, ginadumdom namon nga ginadihon kami ni Jehova nga mangin mas maayo nga mga tawo. Gani, nagasuod pa gid kami sa iya.”—Isa. 64:8.

MAKASALIG KA NGA BULIGAN KA KAG PADYAAN NI JEHOVA

19. Ano ang mabatyagan naton kon kaisa, pero ano ang masaligan naton?

¹⁹ Bisan pa iaplikar naton ang tanan nga panugda sa sini nga artikulo, may mga tion gihapon nga masubuan kita, mabalaka, ukon maluyahan sang buot. Pero sa bulig ni Jehova, madaug naton ang negatibo nga balatyagon. Makasalig kita nga mas madamo ang tion nga mangin malipayon kita sa aton kabuhi kag sa aton pag-alagad kay Jehova bangod may maayo kita nga kaangtanan sa iya.

20. Ano ang gusto mo panikasugan nga himuon?

²⁰ Kon nagaluya ang aton buot bangod sa aton nahimo nga mga sala sang una, bangod sa aton mga problema subong, ukon bangod sa aton mga kaluyahon, panikasugan gid naton nga indi magpaapekto sa sini. Kay man, buligan kita ni Jehova nga mangin kalmado. (Sal. 143:10) Imadyinon naton ang aton kabuhi sa bag-ong kalibutan. Sa sina nga tion, indi na gid kita makabatyag sang negatibo nga balatyagon. Sa baylo, mangin malipayon kita kada adlaw sa pag-alagad sa aton mahigugmaon nga Dios nga si Jehova.