Mga Pamangkot

◼ Paano naton mabuligan ang mga payunir?

Sang 2009 nga tuig sang pag-alagad, mga 800,000 ang regular kag espesyal payunir sa bilog nga kalibutan. Ginhinguyang sining bug-os tion nga mga alagad ang una nga bunga sang ila tion, kusog, kag pagkabutang para ipalapnag ang maayong balita. (Hulu. 3:9) Nalipay gid si Jehova sa ila mga panikasog! Paano naton mapakita ang pagtamod ni Jehova kag makabulig para mangin malipayon kag makapadayon sila sa ila pag-alagad?

Pat-od nga makapalig-on gid ang aton maayo nga mga pulong para makapadayon sila sa pagpayunir. (Hulu. 25:11) Mabag-o bala naton ang aton semanal nga iskedyul agod makapakig-upod sa ila sa ministeryo? Sa pagpanghikot upod sa ila, mahimo naton sila pasakyon sa aton salakyan. Kon magsakay kita sa ila salakyan, mahimo kita mag-amot para sa ila gasto. (1 Cor. 13:5; Fil. 2:4) Mapakita man naton ang aton mahigugmaon nga pagsuporta paagi sa aton pagkamaabiabihon kag pag-agda sa ila nga magkaon sa aton balay kon kaisa.—1 Ped. 4:8, 9.

Ginapasalig sang Kasulatan nga amanan ni Jehova ang mga nagauna sang iya Ginharian. (Sal. 37:25; Mat. 6:33) Ginahimo niya ini paagi sa aton mahigugmaon nga mga kauturan. (1 Juan 3:16-18) Siempre pa, wala ginasalig sang mga payunir sa iban ang ila pinansial nga mga responsibilidad. Kag wala sila nagapabatibati kon nagapamigado sila. Pero kon mangin alisto kag mapanilagon kita, mabuligan naton ang matutom nga mga payunir kag ‘mapun-an ang ila kakulangan.’—2 Cor. 8:14, 15.

Si Febe isa ka makugi nga ebanghelisador sang unang siglo nga katapo sang Kongregasyon sang Cencrea. Sang nagkadto sia sa Roma, ginpalig-on ni Pablo ang mga kauturan didto: “Batunon ninyo sia sa Ginuo sa paagi nga takus sa mga balaan, kag agod mabuligan ninyo sia sa bisan ano nga butang nga kinahanglan niya kamo.” (Roma 16:1, 2) May kahigayunan kita nga mapakita ang pareho sini nga pagsakdag sa katapo sang aton kongregasyon nga nagapadayon sa pagbantala sang maayong balita subong mga regular kag espesyal payunir.—Binu. 5:42.

◼Nagakaigo bala nga magbutang sing daku nga laragway ni Jesus sa tion sang Memoryal?

Para sa matuod nga mga Cristiano, ang mga laragway sang mga hitabo kag mga karakter sa Biblia indi lamang dekorasyon kundi ginagamit sa pag-ilustrar kag sa pagtudlo. Wala naton ini ginagamit sa pagsimba kay Jehova. (2 Cor. 5:7; tan-awa ang The Watchtower, Mayo 15, 1972, pahina 295-296.) Ang pila ka Kingdom Hall may matahom nga mga laragway tuhoy sa mga hitabo sa Biblia, kag kinaandan na nga wala ini ginadilian.

Pero, sa tion sang Panihapon sang Ginuo, indi nagakaigo nga magdispley sang laragway ni Jesus ilabi na para sa sina nga okasyon. Dapat nga masentro ang aton atension sa mga emblema kag sa diskurso. Dapat man naton hunahunaon ang mga bag-uhan nga nagatambong, kay basi ang pila sa ila, bangod sang ila relihion sang una, mahimo maghatag sing sobra nga atension, kag magsimba pa gani sa laragway ni Jesus. Sa Roma kapitulo 14 kag 1 Corinto kapitulo 10, ginpakita ni apostol Pablo nga dapat tahuron ang konsiensia sang iban, lakip na ang mga sensitibo bangod sang ila mga pagpati sang una.