Tsab Ob Sau Rau Cov Thexalaunikas
3 Yog li ntawd, cov kwv tij’e, cia li thov Vajtswv pab peb tsis tseg, kom Vajtswv Yehauvas* txoj lus thiaj nrov ncha mus rau txhua qhov, thiab kom sawv daws qhuas txoj lus ntawd ib yam li tau muaj hauv nej. 2 Thiab cia li thov Vajtswv cawm peb dim ntawm cov neeg lim hiam uas xav ua phem rau peb, vim tsis yog txhua tus thiaj muaj kev ntseeg. 3 Tiam sis tus Tswv yog tus ncaj ncees, nws yuav txhawb nej lub zog thiab tiv thaiv nej ntawm Xatas.* 4 Tsis tas li ntawd, peb tso siab rau tus Tswv tias nej yuav ua raws nraim li peb tau qhia rau nej, tsis hais tam sim no thiab yav tom hauv ntej. 5 Thov tus Tswv pab kom nej muaj lub siab hlub Vajtswv tiag thiab pab nej ua siab ntev thev kom ua tau Khetos tes hauj lwm.
6 Cov kwv tij’e, nim no peb tuav peb tus Tswv Yexus Khetos lub npe qhia nej tias, txav deb ntawm txhua tus kwv tij uas tsis mloog lus* thiab tsis kam coj raws li tus qauv uas peb twb qhia tseg rau nej lawd. 7 Nej yeej paub lawm tias nej yuav tsum xyaum coj li peb. Thaum peb nrog nej nyob peb yeej tsis coj li cov neeg uas tsis mloog lus, 8 thiab peb tsis lam mus thov khawv noj. Tiam sis peb khwv iab khwv daw nruab hnub hmo ntuj, thiaj tsis ua nra hnyav rau nej ib tug twg. 9 Peb yeej muaj cai kom nej yug peb, tiam sis peb xav tso tus qauv zoo rau nej xyaum. 10 Thaum peb nrog nej nyob, peb yeej ib txwm sam hwm rau nej tias, “Yog leej twg tsis kam ua hauj lwm, tsis txhob pub mov rau tus ntawd noj.” 11 Rau qhov peb hnov xov tias nej cov muaj ib txhia tsis mloog lus, tsis kam mus ua hauj lwm kiag li. Cov ntawd tseem mus txob plaub, cuam tshuam luag tej teeb meem thiab. 12 Peb sam hwm thiab tuav tus Tswv Yexus Khetos lub npe thov kom cov uas coj li ntawd tsis txhob ua neeg ntau ncauj, tiam sis yuav tsum mus ua hauj lwm es noj tej uas lawv ob txhais tes khwv tau los.
13 Tiam sis cov kwv tij’e, tsis txhob tso tes hauj lwm zoo tseg. 14 Yog leej twg tsis kam mloog tej lus uas peb hais hauv tsab ntawv no ces yuav tsum ceev faj tus ntawd* thiab tseg txhob nrog nws ua ke kom nws paub txaj muag. 15 Nco ntsoov tias nws tsis yog ib tug yeeb ncuab rau nej, tiam sis kav tsij ntuas nws tam li ib tug kwv tij.
16 Thov kom tus Tswv uas muaj lub siab tus thiab pub tau lub siab tus, ho pub kom nej muaj lub siab tus rau txhua txoj hau kev. Thov kom tus Tswv nrog nraim nej txhua leej txhua tus.
17 Kuv yog Povlauj, kuv txhais tes sau kiag tsab xov no tuaj rau nej ntag kom nej thiaj paub kuv tus ntawv tes zoo li cas.
18 Thov kom peb tus Tswv Yexus Khetos foom koob hmoov nplua mias rau nej txhua leej txhua tus.