Malakaus Sau
14 Tshuav ob hnub xwb yuav ua Kev Cai Hla Dhau thiab ua Kev Cai Noj Ncuav Tsis Xyaw Keeb. Cov pov thawj hlob thiab cov xib hwb* tuav tswv yim* ntes Yexus coj mus tua pov tseg. 2 Lawv hais tias, “Peb txhob ntes nws rau lub sij hawm uas tab tom ua kev cai tsam ua rau cov tib neeg ntxhov.”
3 Thaum Yexus nyob hauv Npethanis, nws mus noj mov hauv Ximoos tsev. Ximoos yog tus uas yav nram ntej mob ruas. Lub sij hawm ntawd ib tug poj niam txawm nqa ib hwj* roj tsw qab uas kim heev tuaj txog ntawd. Nws muab hwj roj lov kiag coj mus hliv rau saum Yexus taub hau. 4 Lawv ib txhia tsis zoo siab, lawv thiaj yws tias, “Ua cas tseem muab hwj roj tsw qab no nkim pov tseg thiab? 5 Yog muab hwj roj tsw qab no muag tseem tau 300 denalias* coj mus pub rau cov pluag!” Mas lawv meem txom heev* rau tus poj niam ntawd. 6 Tiam sis Yexus hais tias, “Cia nws ua nws. Txhob ua rau nws ntxhov siab. Tsim nyog qhuas tej uas nws ua rau kuv no. 7 Cov pluag yeej yuav nrog nej nyob. Nej yuav pab lawv thaum twg los tau tiam sis kuv yuav tsis nrog nej nyob mus li. 8 Nws ua tau zoo kawg. Nws hliv roj tsw qab rau kuv lub cev npaj rau hnub uas faus kuv. 9 Kuv hais ncaj qha rau nej tias, txoj xov zoo nrov ncha mus txog qhov twg, tus poj niam no tes hauj lwm yuav nrov ncha mus txog qhov ntawd.”
10 Yudas Ikhali-aus uas yog ib tug ntawm 12 tug tub txib, txawm mus cuag cov pov thawj hlob es yuav muab Yexus cob rau lawv. 11 Thaum lawv hnov li ntawd mas lawv zoo siab kawg li. Lawv cog lus tias lawv yuav them nyiaj rau nws. Yudas thiaj nrhiav seb lub sij hawm twg zoo muab Yexus cob rau lawv.
12 Thawj hnub* ua Kev Cai Noj Ncuav Tsis Xyaw Keeb, yog hnub sawv daws tua tsiaj ua Kev Cai Hla Dhau. Thaum ntawd cov thwj tim los nug Yexus tias, “Koj xav kom peb mus npaj pluas hmo Kev Cai Hla Dhau rau koj noj qhov twg?” 13 Yexus thiaj txib nws ob tug thwj tim thiab hais rau nkawd tias, “Mus rau hauv nroog, muaj ib tug yawg kwv ib hub dej yuav tuaj ntsib neb. Cia li raws nws qab mus. 14 Nws nkag rau lub tsev twg ces hais rau tus tswv tsev tias, ‘Xib Hwb hais tias, “Chav tos txais qhua nyob qhov twg? Kuv yuav nrog kuv cov thwj tim noj pluas hmo Kev Cai Hla Dhau.”’ 15 Nws yuav coj neb mus rau ib cha uas dav heev nyob txheej saud, muaj rooj muaj tog txhij txhua. Neb cia li npaj rau qhov ntawd.” 16 Ob tug thwj tim thiaj mus rau hauv lub nroog. Nkawd txawm pom muaj raws li Yexus hais ntawd ces nkawd thiaj npaj ua Kev Cai Hla Dhau.
17 Thaum tsaus ntuj lawd, Yexus nrog 12 tug thwj tim tuaj txog. 18 Thaum lawv tab tom noj mov ntawm rooj, Yexus hais tias, “Kuv hais ncaj qha rau nej tias, nej cov uas nrog kuv koom tsum no, ib tug yuav ntxeev siab rau kuv.” 19 Ces lawv ntxhov siab heev. Lawv thiaj nug Yexus ib tug zuj zus tias, “Puas yog kuv?” 20 Nws hais rau lawv tias, “Yog nej 12 tug no ib tug. Yog tus uas nrog kuv tib txhij ntsw hauv lub tais. 21 Vajtswv Txoj Lus yeej sau tseg lawm tias neeg Leej Tub yuav tuag. Tiam sis tus uas ntxeev siab rau neeg Leej Tub yuav txom nyem lauj! Kheev nws tsis txhob yug los zoo dua.”
22 Thaum lawv tab tom noj mov, Yexus muab ib lub ncuav los. Nws ua Vajtswv tsaug tas thiab muab ntais cev rau nws cov thwj tim hais tias, “Cia li txais mus, lub ncuav no piv txog kuv lub cev.” 23 Yexus kuj muab ib khob cawv txiv hmab los thiab ua Vajtswv tsaug. Nws mam li muab cev rau lawv txhua tus haus. 24 Yexus hais rau lawv tias, “Khob cawv no piv txog kuv cov ntshav uas ua hom thawj nias rau Vajtswv lo lus cog tseg uas yuav muab nchuav los cawm coob leej. 25 Kuv hais ncaj qha rau nej tias, kuv yuav tsis haus cawv txiv hmab mus txog hnub kuv tau haus tej cawv txiv hmab tshiab hauv Vajtswv lub Nceeg Vaj.”* 26 Tom qab lawv hu nkauj tas, lawv txawm nce mus rau saum lub Roob Txiv Aulib lawm.
27 Yexus hais rau lawv tias, “Nej yuav tso kuv tseg rau qhov Vajtswv Txoj Lus twb hais lawm tias, ‘Kuv yuav tua tus tswv yug yaj mas pab yaj yuav tawg ua sab ua sua.’ 28 Thaum kuv sawv hauv qhov tuag rov los lawd, kuv yuav ua nej ntej mus rau Kalilais.” 29 Tiam sis Petus hais rau Yexus tias, “Txawm lawv txhua tus tso koj tseg los kuv yeej yuav tsis tso li.” 30 Yexus thiaj hais rau Petus tias, “Kuv hais ncaj qha rau koj tias hnub no, hmo no ntag, thaum qaib tsis tau qua ob tsig, koj yuav tsis lees paub kuv peb zaug.” 31 Tiam sis Petus teb tawv qhawv tias, “Txawm kuv yuav nrog koj tuag los kuv yeej yuav tsis hais ib zaug tias kuv tsis paub koj li.” Cov thwj tim puav leej hais ib yam nkaus thiab.
32 Lawv thiaj los txog hauv ib lub vaj hu ua Kexemanes. Yexus hais rau nws cov thwj tim tias, “Nej nyob ntawm no kuv yuav mus thov Vajtswv.” 33 Yexus coj Petus, Yakaunpaus, thiab Yauhas nrog nws mus. Nws txawm nyuaj siab heev* thiab ntxhov siab kawg li. 34 Nws thiaj hais rau lawv tias, “Kuv nyuaj siab kawg li, tshuav tuag xwb. Nej nyob ntawm no zov tos tsis txhob tsaug zog.” 35 Yexus thiaj mus tom ntej me ntsis, nws txhos caug ntua thov tias, yog ua tau, tsis txhob cia tej xwm phem los raug nws. 36 Yexus thov tias, “Anpas,* kuv Txiv, koj ua tau txhua yam. Thov tshem lub khob no mus. Txawm li cas los, thov kom muaj raws li koj xav, tsis yog raws li kuv xav.” 37 Thaum Yexus rov los ntawm cov thwj tim, lawv tsaug zog tas. Nws thiaj hais rau Petus tias, “Ximoos’e, koj tsaug zog lawm lod? Cas nej yuav yoo tsis taus dab ntub zov ib nyuag txoos teev li? 38 Nej yuav tsum zov tos thiab thov Vajtswv tsis tseg, nej thiaj tsis qaug rau kev txhaum. Lub siab mas kub lug tiam sis lub cev* qaug zog zis.” 39 Yexus rov mus thov Vajtswv dua thiab nws thov ib yam li qub. 40 Thaum Yexus rov los, nws pom cov thwj tim tsaug zog tas. Lawv rua tsis taus qhov muag li, lawv thiaj tsis pom qab teb Yexus. 41 Thaum Yexus rov los zaum peb nws hais rau lawv tias, “Tam sim no tsis yog lub caij uas nej yuav tsaug zog ncaws nruj nris li ko! Cia li sawv! Twb txog lub sij hawm uas neeg Leej Tub yuav raug muab cob rau cov neeg lim hiam txhais tes lawm. 42 Cia li sawv peb mus. Saib maj! Tus uas ntxeev siab rau kuv twb tuaj yuav txog.”
43 Thaum Yexus tseem hais lus, Yudas uas yog ib tug ntawm 12 tug tub txib txawm tuaj txog kiag. Cov pov thawj, cov xib hwb, thiab cov txwj laus txib ib pab neeg coob coob nqa ntaj nqa qws nrog nws tuaj thiab. 44 Yudas tus uas ntxeev siab rau Yexus twb qhia cov tib neeg lawm tias, “Yog kuv nwj tus twg ces ntes kiag tus ntawd, tsis txhob pub nws dim li.” 45 Yudas txawm ncaj qha mus rau ntawm Yexus thiab hais tias, “Xib Hwb!”* ces nws nwj kiag Yexus sab plhu. 46 Cov tib neeg txawm los ntes kiag Yexus. 47 Tiam sis ib tug uas nyob ntawd txawm rho hlo ntaj los tib ntag tus tuam pov thawj hlob tus tub qhe ib sab pob ntseg tu nrho. 48 Yexus hais rau cov tib neeg tias, “Nej nqa ntaj nqa qws tuaj ntes tub sab lod? 49 Nej twb niaj hnub pom kuv qhia hauv lub tuam tsev, ua cas nej ho tsis ntes kuv? Txawm li ntawd los, yuav tsum muaj li no kom muaj tiav raws li Vajtswv Txoj Lus tau hais tseg lawd.”
50 Thaum ntawd cov thwj tim tso Yexus tseg khiav tas lawm. 51 Muaj ib tug tub hluas raws Yexus qab. Nws tsuas npua ib daim ntaub mag xwb. Cov tib neeg txawm yuav ntes nws, 52 tiam sis nws muab daim ntaub mag hle hlo rau lawv, khiav liab qab* mus lawm.
53 Lawv txawm coj Yexus mus rau hauv tus tuam pov thawj hlob tsev. Cov pov thawj hlob, cov txwj laus, thiab cov xib hwb sawv daws tuaj ua ke ntawd thiab. 54 Tiam sis Petus tuaj deb deb raws Yexus qab mus txog ntawm tus tuam pov thawj hlob tsev. Nws txawm mus sab hauv lub loog, nrog cov tub teg tub taws zaum nte taws. 55 Cov pov thawj hlob thiab pab Xahenrees nrhiav neeg los nkaug Yexus kom lawv tau kev muab nws tua, tiam sis nrhiav tsis tau li. 56 Yeej muaj coob tus dag txog Yexus, tiam sis lawv tej lus tsis sib tim. 57 Kuj muaj tej tug sawv tsees ua cuav tim khawv nkaug Yexus tias, 58 “Peb hnov nws hais tias, ‘Lub tuam tsev uas yog neeg txhais tes ua no, kuv yuav muab lauj tseg mas peb hnub xwb kuv yuav ua dua ib lub tshiab uas tsis yog neeg txhais tes ua.’” 59 Txawm lawv nkaug li no los lawv tej lus twb tsis sib tim li.
60 Tus tuam pov thawj hlob thiaj sawv tsees nug Yexus tab meeg sawv daws tias, “Koj txawm yuav tsis teb ib los li lod? Koj tsis hnov tej lus lawv nkaug koj ntawd lod?” 61 Tiam sis Yexus nyob twj ywm tsis teb ib los li. Tus tuam pov thawj hlob thiaj rov nug Yexus tias, “Koj puas yog tus Khetos uas yog Vajtswv tus Dawb Huv tus Tub?” 62 Yexus thiaj teb tias, “Yog mas. Kuv hais rau nej tias nej yuav pom neeg Leej Tub zaum ntawm tus uas muaj hwj chim loj kawg nkaus sab xis thiab yuav pom nws nrog huab nrog cua saum ntuj los.” 63 Tam sim ntawd, tus tuam pov thawj hlob txawm dua rhe nws lub tsho thiab hais tias, “Peb tseem yuav tos pes tsawg tus tim khawv ntxiv? 64 Nej twb hnov nws tej lus tuam mom Vajtswv lawm. Nej pom zoo li cas?” Lawv puav leej pom zoo muab nws tua pov tseg. 65 Ib txhia txawm nto qaub ncaug rau Yexus thiab npog nws ntsej muag. Lawv xuas nrig ntaus nws thiab hais rau nws tias, “Koj txawj cev Vajtswv lus diam, sim twv seb leej twg ntaus koj?” Cov tub ceev xwm thiaj xuas tawg ncuav rau Yexus thiab coj nws mus lawm.
66 Thaum Petus tseem nyob hauv lub loog, tus tuam pov thawj hlob ib tug ntxhais qhev txawm los rau ntawd. 67 Thaum nws pom Petus nte taws, nws ntsia ntsoov Petus thiab hais tias, “Koj twb nrog Yexus tus neeg Naxales ntawd thiab los sad?” 68 Tiam sis Petus tsis kam lees li. Nws hais tias, “Kuv tsis paub nws. Xyov koj hais koj dab tsi.” Ces Petus txawm sawv mus ze zog ntawm lub rooj loog. 69 Tus ntxhais qhev ho los pom Petus nyob ntawd thiab rov hais rau cov neeg uas sawv ntawd tias, “Nws yog lawv ib tug tiag.” 70 Petus rov tsis lees dua thiab. Ib me ntsis tom qab, cov neeg sawv ib ncig ntawd ho los hais Petus tias, “Koj yeej yog lawv ib tug kawg! Koj yog neeg Kalilais tiag.” 71 Tiam sis Petus twv ntuj twv teb tias, “Kuv yeej tsis paub tus neeg uas nej hais ko!” 72 Tam sim ntawd, qaib txawm qua ob tsig. Petus thiaj nco dheev txog Yexus cov lus hais tias, “Ua ntej qaib qua ob tsig, koj yuav tsis lees paub kuv peb zaug.” Ces Petus txawm quaj tu siab nrho.