Lukas Sau
15 Cov neeg sau se thiab cov neeg muaj txim pheej caum Yexus, mloog nws qhia. 2 Cov Falixais thiab cov xib hwb* thiaj yws tias, “Ua cas tus yawg no ho nrog cov muaj txim ntaus phooj ywg thiab tseem nrog lawv noj mov ua ke?” 3 Ces Yexus hais zaj lus piv txwv no rau lawv tias, 4 “Yog nej leej twg muaj 100 tus yaj, es ib tug ploj lawd, nws yuav tsis muab 99 tug tso rau tom roob moj sab qhua es mus nrhiav kom tau tus uas ploj lawm lod? 5 Thaum nws nrhiav tau lawd, nws zoo siab heev, nws muab tsaws hlo rau saum xub pwg. 6 Thaum nws mus txog tsev, nws hu nws tej phooj ywg thiab tej neeg zej zos tuaj ua ke. Nws hais rau lawv tias, ‘Nrog kuv zoo siab rau qhov kuv nrhiav tau kuv tus yaj uas ploj lawd.’ 7 Ib yam li ntawd, kuv hais rau nej tias, thaum ib tug neeg muaj txim hloov dua siab tshiab, cov uas nyob saum ntuj yim huab zoo siab dua li thaum muaj 99 tug neeg ncaj ncees uas tsis tas hloov dua siab tshiab li.
8 “Ib yam li tus poj niam uas muaj kaum lub nyiaj damas* yog nws ua ib lub poob lawd nws yuav taws teeb cheb tsev thiab ua tib zoo nrhiav kom tau lub nyiaj ntawd los sad. 9 Thaum nws nrhiav tau lawd, nws hu nws tej phooj ywg thiab tej neeg zej zos tuaj ua ke hais rau lawv tias, ‘Nrog kuv zoo siab, rau qhov kuv nrhiav tau kuv lub nyiaj damas* uas poob lawd.’ 10 Ib yam li ntawd, kuv hais rau nej tias, Vajtswv cov tub txib saum ntuj zoo siab heev thaum ib tug neeg muaj txim hloov dua siab tshiab.”
11 Yexus hais ntxiv tias, “Muaj ib tug yawg uas muaj ob tug tub. 12 Tus yau los hais rau leej txiv tias, ‘Txiv, thov muab tej qub txeeg qub teg uas yog kuv li feem rau kuv.’ Ces leej txiv txawm muab nyias li feem rau nyias. 13 Ob peb hnub tom qab ntawd, tus tub yau txawm sau nra mus kev deb mus nyob txawv teb chaws. Nws cia li mus ua ib tug neeg tsis tsim txiaj ua dog ua dig, thiab muab nws tej qhov txhia chaw siv phum lam ntsuav. 14 Thaum nws muab ib puas tsav yam siv tas lawd txawm muaj kev tshaib kev nqhis thoob plaws lub teb chaws. Zaum no nws tsis tshuav dab tsi li lawm. 15 Nws thiaj mus thawj ib tug neeg hauv lub teb chaws ntawd. Tus neeg ntawd thiaj txib nws mus zov npua tom teb. 16 Nws nqhis nqhis tej nyuag taum uas npua noj los, twb tsis muaj leej twg pub nws noj li.
17 “Thaum nws ras dheev tias nws ua yuam kev lawm, nws hais tias, ‘Cov neeg ua hauj lwm rau kuv txiv yeej muaj noj muaj haus tsis tu li los sad, ua cas kuv yuav tuag tshaib li no! 18 Kuv yuav rov qab mus cuag kuv txiv thiab hais rau nws tias, “Txiv, kuv tau ua txhaum rau lub ntuj* thiab rau koj lawm. 19 Kuv tsis tsim nyog ua koj tus tub lawm. Thov cia kuv ua hauj lwm rau koj tam li tus tub zog xwb.”’ 20 Nws txawm sawv tsees rov mus cuag nws txiv. Thaum nws tseem los txog deb tsawv, leej txiv pom nws thiab hlub nws heev. Leej txiv thiaj dhia loo mus puag nkaus nws hnia. 21 Ces tus tub hais rau leej txiv tias, ‘Txiv, kuv tau ua txhaum rau lub ntuj* thiab rau koj lawm. Kuv tsis tsim nyog ua koj tus tub lawm.’ 22 Tiam sis leej txiv hais rau nws cov tub qhe tias, ‘Tsuag tsuag, mus nqa lub tsho uas zoo tshaj plaws rau nws hnav. Thiab nqa ntiv nplhaib tuaj rau nws coj thiab nqa khau tuaj rau nws rau. 23 Thiab cia li mus ntes tus me nyuam nyuj rog rog los tua noj ua kev zoo siab. 24 Rau qhov kuv tus tub twb tuag lawm tiam sis nws ciaj rov los. Nws twb ploj lawm tiam sis nim no nws rov los txog tsev.’ Sawv daws thiaj zoo siab kawg li.
25 “Thaum tus tub hlob mus ua teb rov los yuav txog tsev, nws hnov suab nkauj nrov doog diaj thiab sawv daws dhia seev cev. 26 Nws thiaj hu ib tug tub qhe tuaj thiab nug tias, ‘Nej ua dab tsi?’ 27 Tus tub qhe teb tias, ‘Twb yog koj tus kwv rov los lawm. Koj txiv thiaj tua tus me nyuam nyuj rog rog ua kev zoo siab rau qhov nws rov los txog tsev, tsis raug mob raug nkeeg.’ 28 Tiam sis tus tij laug chim heev, tsis kam mus hauv tsev. Leej txiv thiaj tawm tuaj ua tib zoo hais nws. 29 Nws thiaj teb leej txiv tias, ‘Ua cas kuv ua koj qhev tau ntev niaj ntau xyoo no, tsis muaj ib zaug kuv yuav tawv koj li los koj twb tsis muab ib tug nyuag me nyuam tshis tua ua kev zoo siab rau kuv thiab kuv cov kwv luag noj. 30 Tiam sis koj niag tub no, nws coj koj tej nyiaj txiag mus siv phum lam ntsuav mus tham niam ntiav. Thaum nws rov los txog ntua xwb, koj txawm siv tua tus me nyuam nyuj rog rog rau nws noj.’ 31 Leej txiv hais rau nws tias, ‘Kuv tus me tub, koj yeej ib txwm nrog kuv nyob. Txhua yam kuv muaj yeej yog koj li. 32 Koj tus kwv twb tuag lawm tiam sis nws ciaj rov los, nws twb ploj lawm tiam sis nim no nws rov los txog tsev, yeej tsim nyog peb sawv daws zoo siab xyiv fab.’”