Lukas Sau
17 Ces Yexus hais rau nws cov thwj tim tias, “Ua li cas los yeej yuav muaj tej yam ua rau neeg ua txhaum. Tiam sis tus uas ua rau lwm tus ua txhaum yuav raug txom nyem lauj! 2 Yog tus ntawd ua rau ib tug uas txo hwj chim li tej me nyuam yaus ua txhaum ces muab ib txhib zeb dai nws caj dab pov hauv hiav txwv kuj zoo dua. 3 Nej yuav tsum ceev faj. Yog koj tus kwv tij ua txhaum rau koj, cia li ntuas nws. Yog nws thim xav* cia li zam txim rau nws. 4 Txawm ib hnub nws ua txhaum xya zaus rau koj thiab los cuag koj xya zaus tias, ‘Thov txim,’* los koj yuav tsum zam rau nws.”
5 Ces cov tub txib hais rau tus Tswv tias, “Thov pab kom peb muaj kev ntseeg ntxiv.” 6 Tus Tswv thiaj teb lawv tias, “Yog nej muaj kev ntseeg luaj li ib lub noob me me* xwb ces nej yuav hais rau tsob ntoo* no tias, ‘Cia li tsaws hlo mus rau hauv hiav txwv!’ Ces yeej yuav muaj raws li nej hais.
7 “Yog nej muaj ib tug tub qhe mus laij teb los sis mus yug yaj los txog tsev, nej leej twg yuav hais rau nws tias, ‘Kav tsij los noj mov tso’? 8 Nej yeej tsis hais li ntawd, tiam sis nej yuav hais tias, ‘Cia li tu cev khov kho es ua hmo rau kuv noj. Koj thiab zaub thiab mov* rau kuv noj tas, koj mam li noj.’ 9 Twb yog tus tub qhe ua nws tes hauj lwm xwb, tus los pav tseem yuav ua nws tsaug thiab lod? 10 Ib yam li ntawd, thaum nej ua nej tes hauj lwm tiav, cia li hais tias, ‘Peb yog ib co tub qhe tsis tsim txiaj dab tsi li, tsis tas leej twg yuav ua peb tsaug. Twb yog peb ua peb lub luag hauj lwm xwb.’”
11 Thaum Yexus yuav mus rau Yeluxalees, nws hla ntawm Xamalis thiab Kalilais ciam teb mus. 12 Thaum Yexus tab tom mus rau hauv ib lub zos, muaj kaum tus yawg mob ruas tuaj cuag nws. Lawv sawv deb deb 13 thiab hu rau Yexus tias, “Yexus, Xib Hwb, thov hlub* peb thiab lauj!” 14 Thaum Yexus pom lawv, nws hais rau lawv tias, “Mus cuag cov pov thawj kom lawv saib nej.” Ua ciav thaum lawv mus, lawv txawm zoo tas lawm. 15 Thaum ib tug pom tias nws zoo lawd, nws rov qab mus rau ntawm Yexus thiab tsa suab hlo qhuas Vajtswv. 16 Nws txawm khwb nkaus ntawm Yexus ko taw thiab ua Yexus tsaug, tsis tas li ntawd nws tseem yog ib tug neeg Xamalis thiab. 17 Yexus thiaj hais tias, “Kaum tus puav leej zoo tib si los sad. Cuaj tus dua twg lawm? 18 Lawv txawm yuav tsis muaj ib tug tig rov los qhuas Vajtswv li lod? Tsuas yog tus neeg txawv teb chaws no xwb.” 19 Yexus thiaj hais rau nws tias, “Cia li sawv tsees mus. Twb yog koj ntseeg, koj thiaj zoo lawm.”
20 Cov Falixais nug Yexus tias, “Thaum twg Vajtswv txoj kev kav* mam li los?” Nws teb lawv tias, “Vajtswv txoj kev kav* yuav tsis los rau tib neeg pom yooj yim. 21 Tsis muaj leej twg yuav hais tias, ‘Saib! Nyob nov!’ los sis ‘Nyob tod!’ rau qhov Vajtswv txoj kev kav* twb nyob hauv nej no lawm.”
22 Ces Yexus hais rau nws cov thwj tim tias, “Yuav muaj ib hnub uas nej yuav xav pom neeg Leej Tub los nrog nej nyob, tiam sis nej yuav tsis pom. 23 Yuav muaj tib neeg hais rau nej tias, ‘Saib! Nws nyob nov,’ los sis ‘Nws nyob tod!’ Tsis txhob caum lawv mus. 24 Rau qhov xob laim ib sab ntuj mus rau ib sab ntuj li cas, lub caij lub nyoog uas neeg Leej Tub rov los yuav zoo ib yam li ntawd. 25 Tiam sis ua ntej ntawd, nws yuav tsum raug kev txom nyem ntau yam thiab tiam neeg no yuav tsis lees yuav nws. 26 Tsis tas li ntawd, tiam uas Nau-as nyob zoo li cas ces lub caij lub nyoog uas neeg Leej Tub rov los yuav zoo ib yam li ntawd. 27 Lawv ua noj ua haus, qua tub qua ntxhais mus txog ntua hnub uas Nau-as nce rau hauv lub nkoj es dej dag los nyab thiab rhuav tshem lawv tib si mus. 28 Ib yam li lub sij hawm uas Lauj nyob. Lawv ua noj ua haus, ua lag ua luam, ua liaj ua teb, ua vaj ua tsev. 29 Tiam sis hnub uas Lauj tawm hauv Xaudoos mus lawd hluav taws leej faj poob saum ntuj los rhuav tshem lawv tib si mus. 30 Lub caij lub nyoog uas neeg Leej Tub tshwm los yuav zoo ib yam li ntawd.
31 “Hnub ntawd tus uas nyob saum txheej tsev las tshav tsis txhob nqes los nqa nws tej khoom hauv tsev. Ib yam li ntawd, tus uas nyob tom teb yuav tsum tsis txhob rov los nqa tej khoom uas muab tso tseg lawd. 32 Nco ntsoov tej uas raug Lauj tus poj niam. 33 Rau qhov tus uas xav cawm nws txoj sia yuav tsis tau txoj sia tiam sis tus uas yeem tso nws txoj sia tseg rau kuv, tus ntawd yuav cawm tau nws txoj sia. 34 Kuv qhia rau nej tias, hmo ntawd ob tug pw ib txag los yuav coj ib tug tseg ib tug. 35 Ob tug poj niam zom zeb ua ke los yuav coj ib tug tseg ib tug.” 36* —— 37 Lawv thiaj hais rau Yexus tias, “Tus Tswv, yuav muaj li ntawd rau qhov twg?” Nws teb lawv tias, “Lub cev tuag nyob qhov twg ces dav* yuav yuj qhov ntawd.”