Tsab Ob Sau Rau Cov Thexalaunikas
2 Tiam sis cov kwv tij’e, peb yeej tos ntsoov lub sij hawm uas peb tus Tswv Yexus Khetos rov los* thiab coj peb mus nrog nws ua ke. Yog li ntawd, peb thov kom nej 2 tsis txhob rawm tso tej uas nej tau kawm lawd tseg, thiab tsis txhob poob siab thaum nej hnov tej lus uas luag hais tias yog Vajtswv tshoov, hnov tej lus uas luag qhia, thiab hnov txog tej tsab ntawv uas luag hais tias yog peb sau tuaj qhia tias Vajtswv Yehauvas* hnub los txog lawm.
3 Tsis txhob pub leej twg ntxias tau nej rau qhov ua ntej hnub ntawd los txog yuav tsum muaj kev fav xeeb, thiab yuav tsum qhia tawm tias tus neeg phem uas tsis leem cai yog leej twg tso. Nws yog tus uas yuav raug puas tsuaj. 4 Nws tawm tsam thiab tsab loj dua txhua tus uas neeg hu ua tim tswv thiab txhua yam uas neeg pe hawm. Nws mus zaum kiag hauv Vajtswv lub tuam tsev mas nws xav kom sawv daws pom tias nws zoo li Vajtswv ntag. 5 Nej puas nco thaum kuv tseem nrog nej nyob kuv twb qhia tej no rau nej lawd?
6 Nim no nej paub lawm tias leej twg yog tus uas tav tus neeg tsis leem cai no, kom nws thiaj ua tsis tau ywj siab ua ntej nws lub sij hawm. 7 Qhov tseeb tiag, tus neeg tsis leem cai twb pib ua hauj lwm lawm, tiam sis tsis tau pom kiag xwb. Yuav zoo li ntawd mus txog thaum tus uas tav nws dua lawm. 8 Thaum ntawd mam li paub tseeb tias tus neeg tsis leem cai yog leej twg. Tswv Yexus yuav ua rau sawv daws paub tias nws rov los* lawm ces nws yuav qhib ncauj hais tej lus muaj hwj chim,* ua rau tus neeg tsis leem cai puas tsuaj mus. 9 Muaj tus uas tsis leem cai vim Xatas tes hauj lwm txhawb nws. Xatas pub hwj chim rau nws ua txhua yam txuj ci, thiab ua tej txuj ci dag ntxias, thiab ua tej txuj ci uas neeg xav tsis thoob,* 10 thiab ua txhua yam kev phem los haub ntxias cov uas yuav raug puas tsuaj. Cov ntawd yuav raug puas tsuaj vim lawv tsis lees yuav thiab tsis nyiam qhov tseeb uas yuav cawm tau lawv dim. 11 Twb yog vim li ntawd, Vajtswv thiaj cia lub tswv yim dag ntxias los ua rau lawv yuam kev kom lawv ntseeg qhov cuav. 12 Thaum kawg lawv thiaj raug txiav txim vim lawv tsis kam ntseeg qhov tseeb thiab vim lawv txaus siab rau yam uas tsis ncaj ncees.
13 Cov kwv tij’e, Vajtswv Yehauvas* hlub nej. Peb thiaj niaj hnub ua Vajtswv tsaug uas muaj nej, rau qhov txij thaum chiv keeb, Vajtswv twb xaiv nej los tau kev cawm dim lawm. Twb yog nej ntseeg qhov tseeb thiab Vajtswv lub hwj huam ntxuav nej dawb huv lawm, nws thiaj xaiv nej. 14 Nws hu nej los tau kev cawm dim ntawm txoj xov zoo uas peb tau tshaj tawm, xwv nej thiaj tau lub hwj chim ci ntsa iab ib yam li peb tus Tswv Yexus Khetos. 15 Yog li ntawd, cov kwv tij, cia li sawv ruaj khov thiab coj raws nraim li tus qauv uas peb twb qhia rau nej lawd, tsis hais tej lus uas nej hnov peb qhia thiab tej uas peb sau tuaj rau nej. 16 Tsis tas li ntawd, thov kom peb tus Tswv Yexus Khetos, thiab thov kom Vajtswv uas yog peb Leej Txiv nplig nej lub siab. Vajtswv yog tus hlub peb. Twb yog nws muaj kev hlub nplua mias rau peb mas thiaj nplig tau peb mus ib txhis thiab pub peb muaj kev vam kev cia siab. 17 Thov kom nws pub nej sawv ruaj nreeg, xwv txhua yam uas nej ua thiab hais thiaj li zoo kawg nkaus.