Lukas Sau
7 Thaum Yexus hais tej no rau cov tib neeg tas lawd, nws txawm mus rau hauv Khapena-us. 2 Lub sij hawm ntawd muaj ib tug thawj tub rog,* nws tus tub qhe mob hnyav kawg li twb yuav tuag. Nws hlub tus tub qhe ntawd heev. 3 Thaum nws hnov tias Yexus los, nws txawm txib cov Yudais ob peb tug laus neeg mus thov kom Yexus tuaj kho nws tus tub qhe. 4 Lawv thiaj mus cuag Yexus thiab thov nws tias, “Yeej tsim nyog koj pab nws rau qhov no, 5 rau qhov nws hlub peb haiv neeg heev. Nws tseem ua lub tsev pe hawm rau peb thiab.” 6 Yexus thiaj nrog lawv mus. Thaum Yexus mus yuav txog tus thawj tub rog lub tsev, nws txawm txib ob peb tug kwv luag tuaj hais Yexus tias, “Yawg hlob, tsis xav tab kaum koj. Tus neeg zoo li kuv tsis tsim nyog koj mus rau hauv kuv tsev. 7 Twb yog vim li ntawd kuv thiaj tsis tuaj thov koj. Tiam sis yog koj hais tib los xwb, kuv tus tub txib yeej yuav zoo. 8 Rau qhov kuv los yeej muaj lwm tus tswj kav, thiab kuv los kuj tswj kav ib pab tub rog. Kuv txib tus no mus, nws yeej mus, kuv txib tus tod los, nws yeej los. Kuv txib kuv tus tub qhe ua dab tsi, nws yeej ua.” 9 Thaum Yexus hnov tus thawj tub rog tej lus ntawd, nws qhuas heev. Nws thiaj tig mus hais rau pab neeg coob coob uas raws nws qab tias, “Kuv qhia tseeb rau nej tias, txawm yog cov neeg Ixayees los kuv yeej tsis tau pom ib tug muaj kev ntseeg npaum li no.” 10 Ces thaum cov uas tuaj hais Yexus ntawd rov mus txog tsev, ua ciav tus tub qhe twb zoo lawm.
11 Dhau ntawd, nws txawm mus rau hauv ib lub nroog hu ua Na-is. Nws cov thwj tim thiab ib pab neeg coob coob nrog nws mus ua ke thiab. 12 Thaum nws mus yuav txog ntawm lub rooj loog uas mus hauv nroog, muaj neeg kwv ib tug tuag tuaj txog ntawd. Nws yog ib tug poj ntsuam tib leeg tub. Muaj ib pab neeg coob coob tawm hauv nroog nrog tus poj ntsuam tuaj thiab. 13 Thaum tus Tswv pom tus poj ntsuam ntawd mas nws hlub heev. Nws hais rau tus poj ntsuam tias, “Txhob quaj mog.” 14 Yexus thiaj txav zog mus tuav kiag lub txaj uas kwv tus tuag. Cov tib neeg ntawd txawm nres ces Yexus hais tias, “Tus hluas’e, kuv hais rau koj tias cia li sawv tsees!” 15 Ces tus tuag txawm sawv tsees los zaum pib hais lus. Yexus thiaj muab nws cob rau nws niam. 16 Tej no ua rau sawv daws tshee hnyo. Lawv thiaj pib qhuas Vajtswv tias, “Muaj ib tug cev Vajtswv lus muaj hwj chim kawg li los rau hauv peb lawm lauj,” thiab, “Vajtswv tseem nco txog nws haiv neeg.” 17 Qhov uas Yexus tau ua no thiaj nrov ncha mus thoob plaws Yudias thiab tej cheeb tsam uas nyob puag ncig ntawd.
18 Yauhas cov thwj tim thiaj mus qhia txhua yam ntawd rau nws paub. 19 Yog li, Yauhas thiaj txib nws ob tug thwj tim mus nug tus Tswv hais tias, “Koj puas yog tus uas peb niaj hnub tos, los tseem tshuav dua lwm tus?” 20 Thaum nkawd mus txog ntawm Yexus, nkawd nug nws tias, “Yauhas tus uas muab neeg ua kev cai raus dej xav paub seb koj puas yog tus uas peb niaj hnub tos, los tseem tshuav dua lwm tus thiab?” 21 Lub sij hawm ntawd, Yexus kho coob tus tej mob zoo. Txawm tej kab mob loj heev los nws kho tib si, thiab nws ntiab dab tawm. Nws kuj kho coob leej dig muag pom kev. 22 Ces Yexus teb nkawd tias, “Cia li mus qhia tej uas neb tau pom thiab tau hnov rau Yauhas, cov dig muag pom kev, cov lag ntseg hnov lus, cov ceg tawv mus taus kev, cov mob ruas zoo huv, cov tuag ciaj sawv rov los, thiab cov txom nyem twb hnov txoj xov zoo lawm. 23 Tus uas tso siab rau kuv es tsis ua xyem xyav yuav zoo siab.”
24 Thaum ob tug uas Yauhas txib tuaj rov mus lawm, Yexus txawm pib qhia txog Yauhas rau cov neeg coob coob ntawd tias, “Nej mus tom roob moj sab qhua, nej pom dab tsi? Puas yog tus tauj deg uas cua ntsawj rawv mus rawv los? Tsis yog. 25 Yog li, nej pom leej twg? Puas yog ib tug hnav tsuj hnav npuag? Cov uas hnav tsuj hnav npuag, noj qab hnav zoo, tsuas nyob hauv vaj ntxwv tsev xwb los sad. 26 Nws yog leej twg tiag? Puas yog ib tug cev Vajtswv lus? Kuv qhia rau nej tias, Yauhas yeej yog ib tug cev Vajtswv lus tiag. Nws tseem loj dua tus cev Vajtswv lus lawm thiab. 27 Twb muaj lus sau cia txog Yauhas tias, ‘Kuv yuav txib kuv tus tub xa xov ua koj ntej. Nws yuav kho kev tos koj!’ 28 Kuv qhia nej tias, tej neeg uas yug los lawd tsis muaj ib tug loj dua Yauhas. Txawm li ntawd los, tus uas me tshaj hauv Vajtswv lub Nceeg Vaj* tseem loj dua Yauhas.” 29 (Thaum cov tib neeg thiab cov neeg sau se hnov li no, lawv thiaj qhuas tias Vajtswv yog tus ncaj ncees rau qhov Yauhas twb muab lawv ua kev cai raus dej lawm. 30 Tiam sis cov Falixais thiab cov uas paub Mauxes Txoj Kev Cai zoo, tsis kam ua raws li Vajtswv lub siab nyiam, lawv thiaj tsis cia Yauhas muab lawv ua kev cai raus dej.)
31 “Yog li ntawd, kuv yuav muab tiam neeg no piv rau leej twg thiab lawv coj li cas? 32 Lawv zoo li tej me nyuam yaus uas zaum tom tshav puam. Lawv sib hu tias, ‘Peb twb tshuab raj rau nej los nej tsis kam seev cev. Peb twb tsa suab hlo quaj los nej tsis los kua muag.’ 33 Ib yam li ntawd, thaum Yauhas tus uas muab neeg ua kev cai raus dej los, nws tsis noj thiab tsis haus cawv li luag tej los nej hais tias, ‘Nws raug dab.’ 34 Thaum neeg Leej Tub los, nws ho nrog sawv daws noj thiab haus los nej tseem hais tias, ‘Ntsia seb! Tus yawg no noj loj haus loj, nws tseem nrog tej neeg sau se thiab tej neeg txhaum ntaus phooj ywg thiab!’ 35 Tiam sis yus tes hauj lwm ncaj ncees ua pov thawj tias yus yog tus neeg muaj tswv yim.”
36 Muaj ib tug Falixais tseev kom Yexus mus nrog nws noj mov. Yexus thiaj mus tom nws tsev thiab zaum ntawm rooj mov. 37 Lub sij hawm ntawd, muaj ib tug poj niam uas cov neeg zej zos yeej paub tias nws yog ib tug neeg tsis tsim txiaj.* Nws hnov tias Yexus tuaj noj mov hauv tus Falixais tsev. Nws thiaj nqa ib hwj roj tsw qab kim heev tuaj ntawd thiab. 38 Nws txawm los txhos caug ntawm Yexus, ncaj ntawm Yexus txhais ko taw thiab quaj heev. Nws tej kua muag si laws los ntub Yexus ko taw. 39 Tus Falixais uas caw Yexus tuaj ntawd pom li no, nws txawm xav twj ywm tias, “Yog tus txiv neej no yog ib tug cev Vajtswv lus tiag, nws yuav tsum paub hais tias tus poj niam uas kov nws ko taw ntawd yog ib tug neeg tsis tsim txiaj.”* 40 Tiam sis Yexus txawm hais rau tus Falixais tias, “Ximoos, kuv xav hais lo puav rau koj.” Ximoos teb tias, “Xib Hwb, hais mas.”
41 “Muaj ob tug neeg tshuav ib tug yawg nqi. Muaj ib tug tshuav 500 denalias,* tiam sis ib tug tshuav 50 xwb. 42 Thaum nkawd them tsis taus, tus yawg ntawd zam nkawd ob leeg nqi tib si. Ua li tus twg yuav nco yawd txiaj ntsig dua?” 43 Ximoos teb tias, “Kuv xav mas tus uas nws zam ntau dua yuav nco nws txiaj ntsig dua.” Yexus hais rau nws tias, “Yog li koj hais lawm.” 44 Yexus txawm tig saib tus poj niam ntawd ces mam li hais rau Ximoos tias, “Koj tsis pom tus poj niam no lod? Thaum kuv tuaj hauv koj tsev, koj twb tsis muab dej ntxuav kuv ko taw. Tiam sis tus poj niam no muab nws cov kua muag ntxuav kuv ko taw thiab muab nws cov plaub hau los so. 45 Thaum kuv tuaj txog, koj twb tsis nwj kuv sab plhu tos txais kuv. Tiam sis kuv tuaj tav no, tus poj niam no nwj kuv ko taw tsis tseg. 46 Koj twb tsis muab roj ywg kuv taub hau tiam sis tus poj niam no muab roj tsw qab ywg kuv ko taw. 47 Kuv qhia koj tias, tus poj niam no ua txhaum ntau yam* tiam sis nws twb tau kev zam txim lawm, nws thiaj muaj lub siab hlub luag npaum li no. Tiam sis tus uas tau kev zam txim tsawg, tsis paub hlub luag npaum li no.” 48 Yexus hais rau tus poj niam tias, “Kuv zam koj tej kev txhaum lawm.” 49 Cov uas nrog Yexus zaum noj mov ua ke ntawd txawm hais zom zaws tias, “Nws yog leej twg es ho zam tau txim thiab?” 50 Yexus hais rau tus poj niam tias, “Twb yog koj ntseeg koj thiaj dim, cia li mus zoo txhob txhawj.”