Sau Rau Cov Loos
1 Kuv yog Povlauj uas yog Yexus Khetos* ib tug tub qhe. Nws hu kuv los ua ib tug tub txib thiab txib kuv mus tshaj tawm Vajtswv txoj xov zoo. 2 Vajtswv tau hais kom cov uas cev nws tej lus txheej thaum ub muab txoj xov zoo no sau rau hauv nws Txoj Lus dawb huv. 3 Txoj xov no hais txog nws tus Tub uas yog Daviv tus xeeb ntxwv. 4 Peb yeej paub tseeb tias tus no yog Vajtswv tus Tub rau qhov Vajtswv twb siv Nws lub hwj huam dawb huv tsa tus no sawv hauv qhov tuag rov los. Nws yeej yog peb tus Tswv Yexus Khetos tiag. 5 Twb yog Yexus hlub* kuv, nws thiaj xaiv kuv los ua ib tug tub txib mus coj txhua haiv neeg los ntseeg thiab mloog nws lus, kom sawv daws hwm nws lub npe. 6 Nej kuj yog cov uas tawm hauv lwm haiv neeg los ua Yexus Khetos cov thwj tim thiab. 7 Tsab ntawv no yog sau rau txhua tus uas nyob hauv Loos. Nej yog cov uas Vajtswv hlub thiab yog cov uas nws hu los ua cov dawb huv.
Thov kom Vajtswv uas yog peb Leej Txiv thiab tus Tswv Yexus Khetos foom koob hmoov nplua mias rau nej thiab nrog nej sib raug zoo.
8 Ua ntej no, kuv tuav Yexus Khetos lub npe ua kuv tus Vajtswv tsaug vim nej muaj kev ntseeg. Tib neeg thoob ntiaj teb twb hnov txog nej txoj kev ntseeg lawm. 9 Kuv yeej ua kawg kuv lub siab lub ntsws los tshaj tawm txoj xov zoo txog Vajtswv tus Tub. Vajtswv yeej paub tias kuv niaj hnub thov Nws pab nej tsis tseg. 10 Kuv niaj hnub thov Vajtswv tias yog nws pom zoo ces nws yuav qhib kev rau kuv tuaj pom nej tiag tiag li. 11 Kuv xav pom nej heev kom kuv thiaj txhawb tau nej txoj kev ntseeg ruaj khov rau Vajtswv. 12 Thiab kom peb ib leeg txhawb tau ib leeg txoj kev ntseeg.
13 Cov kwv tij, kuv xav kom nej paub tias kuv twb npaj siab yuav tuaj xyuas nej ob peb zaug tiam sis muaj chaw tab kaum lawm xwb. Kuv xav nrog nej mus tshaj tawm kom coj tau tib neeg los ua Yexus cov thwj tim, ib yam li thaum kuv mus qhia lwm haiv neeg. 14 Kuv tshuav neeg nqi, tsis hais cov Kilis los lwm haiv neeg, tus ruam tus ntse tib si. 15 Kuv thiaj xav xav tuaj tshaj tawm txoj xov zoo rau nej hauv Loos. 16 Kuv yeej tsis txaj muag tshaj tawm txoj xov zoo li. Txoj xov no ua pov thawj txog Vajtswv lub hwj chim uas yuav cawm tau cov muaj kev ntseeg. Twb xub muab tshaj tawm rau cov Yudais mam tshaj tawm rau cov Kilis. 17 Vajtswv nthuav nws txoj kev ncaj ncees rau cov uas muaj kev ntseeg. Qhov no ua rau lawv haj yam tuav kev ntseeg ruaj. Vajtswv Txoj Lus thiaj hais tias, “Tus ncaj ncees yuav tau txoj sia rau qhov nws muaj kev ntseeg.”
18 Vajtswv tus uas nyob saum ntuj npau taws heev rau cov neeg ua phem lim hiam. Lawv txwv tsis pub tib neeg los paub qhov tseeb. 19 Yeej tsim nyog lawv paub Vajtswv rau qhov Vajtswv twb muaj pov thawj qhia meej rau lawv paub txog nws lawm. 20 Txawm neeg tsis pom Vajtswv los yog lawv saib tej uas Vajtswv tsim txij thaum ntuj tsim teb raug los, lawv yeej paub tias Vajtswv zoo li cas. Thaum peb kawm txog tej uas Vajtswv tsim, peb yeej pom nws lub hwj chim uas nyob mus ib txhis thiab pom tias nws yeej yog Vajtswv tiag. Yog li ntawd, neeg yeej tsis muaj lus cav li. 21 Cov neeg no yeej paub Vajtswv tiam sis lawv tsis hwm nws, tsis nco nws txiaj ntsig. Twb yog lawv lub siab ruam tsis to taub, lawv thiaj ua lub neej tsaus ntuj nti. 22 Lawv khav tias lawv ntse tiam sis lawv ruam kawg li. 23 Lawv tsis kam pe hawm tus Vajtswv uas muaj sia zees nyob mus ib txhis.* Tiam sis lawv ho mus pe hawm tej mlom zoo li neeg uas txawj ploj txawj tuag, zoo li tej noog, zoo li tej tsiaj muaj plaub txhais tes taw, thiab zoo li tej nab.*
24 Vim li ntawd, Vajtswv thiaj tso lawv tseg cia lawv ua ywj siab. Lawv thiaj siv lawv lub cev mus ua ntau yam kev phem kev qias, rhuav ntsej muag kawg li. 25 Lawv yeej paub qhov tseeb txog Vajtswv tiam sis lawv ho mus ntseeg tej yam cuav. Lawv tsis kam pe hawm Vajtswv tus uas tsim ib puas tsav yam tiam sis lawv yeem mus pe tej uas Vajtswv tsim. Yeej tsim nyog qhuas Vajtswv mus ib txhis. Amees.* 26 Twb yog vim li no Vajtswv thiaj cia lawv mus sib daj sib dee tsis paub txaj muag li. Tej poj niam cia li rov sib dee lawm. Vajtswv yeej ib txwm tsis tau tsim kom tib neeg ua li no. 27 Tej txiv neej los kuj rov sib dee ib yam li ntawd thiab. Lawv tso tej poj niam tseg thiab huas kev ntshis mus nrhiav txiv neej lawm. Lawv thiaj ua phem ua qias ywj siab, vuab tsuab kawg li. Tiam sis lawv yuav raug txim txaus nkaus tej kev phem uas lawv tau ua ntawd.
28 Vim lawv tsis quav ntsej Vajtswv thiab tsis lees yuav nws, Vajtswv thiaj tso lawv tseg thiab cia tej kev phem thawm lawv tej siab tej ntsws. Lawv thiaj tau hau ntsoov rau txoj kev phem xwb. 29 Lawv lub siab thiaj puv npo tej kev nkhib nkhaus, kev phem, kev lim hiam, thiab kev siab hlob. Lawv khib xeeb, tua neeg, sib cav sib ceg, hais lus dag, thiab tsim txom luag. Lawv nyiam taug xaiv, 30 ib leeg ntxo ib leeg, ntxub Vajtswv, ua saib tsis taus luag, khav theeb, muab hlob, thiab tuav tswv yim ua phem. Lawv tsis mloog niam txiv lus, 31 tsis txawj xav, tsis ua raws li cog lus tseg, tsis txawj sib hlub, thiab tsis muaj lub siab khuv leej. 32 Lawv yeej paub tej uas Vajtswv tau sam hwm tias, tsim nyog muab cov neeg uas coj li no rhuav tshem, los lawv tseem ua txhaum qees. Lawv tseem qhuas cov neeg uas ua tej kev txhaum no thiab.