Tsab Ob Sau Rau Cov Thexalaunikas
1 Ntawm no yog Povlauj. Xivanas* thiab Timautes nkawd kuj nrog kuv nyob no thiab. Tsab ntawv no yog sau rau lub koom txoos hauv Thexalaunikas uas nrog Vajtswv uas yog peb Leej Txiv thiab nrog tus Tswv Yexus Khetos koom ib lub siab.
2 Thov kom Vajtswv uas yog peb Leej Txiv thiab kom tus Tswv Yexus Khetos foom koob hmoov nplua mias* rau nej thiab nrog nej sib raug zoo.
3 Peb yeej ua Vajtswv tsaug uas muaj nej cov kwv tij sawv daws. Yeej tsim nyog peb ua Vajtswv tsaug li no rau qhov nej tsuas muaj kev ntseeg loj zuj zus ntxiv xwb, thiab nej ib leeg yim huab txawj hlub ib leeg dua li yav tas los. 4 Twb yog li ntawd, peb thiaj qhuas nej rau lwm cov koom txoos uas ntseeg Vajtswv. Txawm nej raug kev tsim txom thiab raug kev txom nyem npaum li cas los, nej ua siab ntev tiv thiab tso siab plhuav* rau Vajtswv. 5 Qhov no ua pov thawj tias Vajtswv yog tus txiav txim ncaj ncees. Thaum kawg nws thiaj suav tias nej tsim nyog nkag rau hauv nws lub Nceeg Vaj* uas nej tab tom tiv kev txom nyem rau ntag.
6 Vajtswv yog tus ncaj ncees, yog li ntawd, nws mam li pauj cov uas tsim kev txom nyem rau nej. 7 Thaum Tswv Yexus tshwm saum ntuj los ces nej cov uas raug kev txom nyem yuav tau nrog peb so los siav. Nws cov tub txib uas muaj hwj chim yuav nrog nws mas 8 yuav muaj hluav taws cig lam lug nrog lawv los. Thaum ntawd nws yuav rau txim pauj cov uas tsis paub Vajtswv thiab rau cov uas tsis kam coj raws li txoj xov zoo txog peb tus Tswv Yexus. 9 Lawv yuav raug puas tsuaj mus ib txhis thiab yuav ncaim tus Tswv mus mas lawv yuav tsis pom nws lub hwj chim ci ntsa iab li lawm. 10 Thaum ntawd tus Tswv yuav los nrog nws cov xaiv tseg* tau koob meej ci ntsa iab ces cov uas muaj kev ntseeg yuav qhuas ntxhias nws. Vim nej ntseeg tej uas peb qhia, nej yuav tau nrog lawv thiab.
11 Twb yog vim li ntawd, peb thiaj thov tas zog rau nej, kom Vajtswv suav tias yeej tsim nyog hu nej los tau txoj sia. Peb thov kom Vajtswv siv nws lub hwj chim ua txhua yam zoo rau nej raws li nws siab nyiam, thiab kom txhua yam hauj lwm ntawm sab kev ntseeg tiav log. 12 Thaum kawg nej tes hauj lwm thiaj ua rau peb tus Tswv Yexus lub npe tau koob meej. Vim nej nrog nws koom ib lub siab, nej kuj yuav tau koob meej thiab. Tej no muaj raws li txoj kev hlub uas Vajtswv thiab tus Tswv Yexus Khetos pub dawb.