Mathais Sau
21 Thaum lawv mus yuav txog Yeluxalees thiab Npefantsis ntawm Roob Txiv Aulib, Yexus txawm txib nws ob tug thwj tim mus, 2 thiab hais rau nkawd tias, “Cia li mus rau hauv lub zos tom neb hauv ntej. Thaum mus txog, neb yuav pom ob niam tub nees luav khi cia ntawd. Cia li muab daws cab los rau kuv. 3 Yog leej twg nug, neb cia li teb tias, ‘Tus Tswv yuav siv.’ Ces nws yuav cia rau neb cab los tam sid.”
4 Tej no muaj tiav raws nkaus li Vajtswv tau hais rau tus cev Nws lus tias, 5 “Qhia cov uas nyob hauv Xi-oos* tias, ‘Saib maj! Koj tus vaj ntxwv tab tom los rau hauv koj. Nws muaj siab mos siab muag thiab caij tus me nyuam nees luav los, yog tus maum nees luav tus me nyuam.’”
6 Ob tug thwj tim thiaj mus ua raws nkaus li Yexus tau txib nkawd. 7 Nkawd thiaj cab ob niam tub nees luav los. Cov thwj tim txawm muab lawv cov tsho sab nraud pua rau saum ob tug nees luav ces Yexus mam li caij tus me nyuam. 8 Coob tus uas caum Yexus txawm hle lawv tej tsho sab nraud los pua kev. Ib txhia kuj mus txiav nplooj ntoos los pua thiab. 9 Tsis tas li ntawd xwb, cov neeg coob coob uas ua nws ntej thiab ua nws qab qw nrov nrov tias, “Thov tsom kwm* Daviv tus Xeeb Ntxwv! Tus uas sawv cev rau Vajtswv Yehauvas* lub npe tau koob hmoov nplua mias! Thov kom tus uas nyob saum ntuj tsom kwm* Daviv tus Xeeb Ntxwv!”
10 Thaum nws mus rau hauv Yeluxalees, cov neeg hauv lub nroog qw ntshu nrooj tias, “Tus no yog leej twg?” 11 Cov neeg coob coob uas nrog Yexus los thiaj teb zom zaws tias, “Yog Yexus tus uas cev Vajtswv lus! Nws tuaj Naxales hauv Kalilais tuaj!”
12 Yexus txawm mus rau hauv lub tuam tsev. Nws muab cov tub lag tub luam thiab cov neeg uas tuaj yuav khoom ntiab tawm huv si mus. Nws muab cov neeg pauv nyiaj tej rooj thiab cov neeg muag nquab tej rooj zaum ntxeev pes hlo tseg. 13 Nws hais rau lawv tias, “Vajtswv Txoj Lus twb hais tias, ‘Kuv lub tsev yuav yog lub tsev thov Vajtswv,’ tiam sis nej muab ua lub tsev rau tub sab nkaum.” 14 Cov neeg dig muag thiab cov neeg ceg tawv kuj tuaj cuag Yexus hauv lub tuam tsev. Nws kho lawv txhua tus zoo huv si.
15 Thaum cov pov thawj hlob thiab cov xib hwb* pom tej txuj ci uas Yexus ua thiab hnov tej me nyuam tub qw zom zaws hauv lub tuam tsev tias, “Thov tsom kwm Daviv tus Xeeb Ntxwv!” mas lawv chim kawg li. 16 Lawv thiaj hais rau Yexus tias, “Koj puas hnov tej uas lawv hais?” Yexus teb tias, “Hnov mas. Nej tsis tau nyeem lod? Vajtswv Txoj Lus twb hais tias, ‘Txawm tej me nyuam yaus* los yuav qhuas txog koj.’” 17 Yexus txawm ncaim lawv mus rau lub nroog Npethanis thiab so ib hmos rau qhov ntawd.
18 Thaum sawv ntxov, Yexus rov los rau hauv lub nroog Yeluxalees, nws hnov plab tshaib. 19 Nws pom ib tsob txiv cev ntawm ntug kev tiam sis thaum nws mus txog ntawd, ua ciav tsuas pom nplooj xwb. Nws thiaj hais rau tsob txiv tias, “Koj yuav tsis txi txiv rau leej twg noj ib zaug ntxiv lawm.” Tsob txiv cev txawm ntsws kiag tam sid. 20 Thaum cov thwj tim pom li no, lawv xav tsis thoob li. Lawv thiaj hais tias, “Ua cas tsob txiv cev cia li ntsws kiag lawm?” 21 Yexus thiaj teb lawv tias, “Kuv hais ncaj qha rau nej tias, yog nej ntseeg Vajtswv tiag es txhob ua xyem xyav, tsis yog nej yuav muaj hwj chim ua rau ib tsob ntoo ntsws xwb, tiam sis nej yuav hais tau rau lub roob no tias, ‘Cia li tsaws hlo mus rau hauv dej hiav txwv’ ces yuav muaj raws li ntawd. 22 Nej yuav tsum ntseeg tias Vajtswv yeej ua tau raws li nej thov, nej thiaj tau tej ntawd.”
23 Yexus txawm mus rau hauv lub tuam tsev thiab pib qhia sawv daws. Cov pov thawj hlob thiab cov txwj laus thiaj los nug nws tias, “Koj puas muaj cai ua tej no? Thiab leej twg tso cai rau koj ua tej no?” 24 Yexus thiaj teb lawv tias, “Kuv yuav nug nej ib los thiab. Yog nej teb tau ces kuv mam li qhia nej tias leej twg tso cai rau kuv ua tej no. 25 Leej twg tso cai rau Yauhas muab neeg ua kev cai raus dej? Yog Vajtswv* los yog tib neeg?” Lawv txawm sab laj tias, “Yog peb teb tias yog Vajtswv ces nws yuav nug peb tias vim li cas peb ho tsis ntseeg Yauhas. 26 Tiam sis yog peb teb tias yog tib neeg, nyob tsam pab neeg ntawd ho ua li cas rau peb, vim lawv ntseeg tias Yauhas yog ib tug cev Vajtswv lus.” 27 Lawv thiaj teb Yexus tias, “Peb tsis paub.” Yexus thiaj hais rau lawv tias, “Ces kuv yuav tsis qhia nej tias leej twg tso cai rau kuv ua tej no thiab.
28 “Nej xav li cas? Ib tug yawg muaj ob tug tub. Nws hais rau tus hlob tias, ‘Tub, hnub no koj mus tu txiv hmab tom teb.’ 29 Tus tub hlob teb tias, ‘Kuv tsis mus.’ Tiam sis tom qab ntawd, nws ho thim xav nws thiaj mus lawm. 30 Leej txiv ho mus txib tus yau. Tus yau teb tias, ‘Txiv, kuv mam mus,’ tiam sis nws ho tsis mus. 31 Ob tug tub no, tus twg mloog leej txiv lus?” Lawv teb tias, “Tus hlob.” Yexus thiaj hais rau lawv tias, “Kuv hais ncaj qha rau nej tias, cov neeg sau se thiab cov niam ntiav yuav ua nej ntej mus rau hauv Vajtswv lub Nceeg Vaj.* 32 Thaum Yauhas los, nws ua ncaj ua ncees rau nej xyaum los nej tsis ntseeg nws. Tiam sis cov neeg sau se thiab cov niam ntiav ho ntseeg. Txawm nej pom tej no los nej twb tsis muaj lub siab thim xav los ntseeg nws.
33 “Cia kuv piav ib zaj lus piv txwv ntxiv. Muaj ib tug yawg uas yog ib tug tswv teb. Nws txawm cog txiv hmab rau nws daim teb. Nws xov laj kab ncig thiab khawb tau ib lub qhov tsuam txiv hmab rau hauv. Nws kuj ua tau ib lub tsev tsom faj zov daim teb ntawd thiab. Nws cia neeg los tu* daim teb ntawd ces nws txawm tawm mus ncig teb chaws lawm. 34 Thaum txog caij de txiv hmab, nws thiaj txib nws cov tub qhe mus sau nws feem txiv hmab ntawm cov neeg uas tu daim teb. 35 Tiam sis cov neeg uas tu daim teb txawm muab cov tub qhe ntes. Lawv muab ib tug ntaus, muab ib tug tua, thiab ho muab pob zeb ntaus ib tug. 36 Tus tswv teb thiaj txib ib co tub qhe coob dua qub mus. Tiam sis cov neeg tu daim teb ua phem rau lawv ib yam nkaus thiab. 37 Thaum kawg tus tswv teb thiaj txib nws tus tub mus. Nws vam tias lawv yuav hwm nws tus tub. 38 Thaum cov neeg tu daim teb pom dheev tus tub, lawv txawm tuav tswv yim tias, ‘Tus no yog tus uas yuav tau daim teb los ua qub txeeg qub teg ntag. Cia peb muab nws tua pov tseg, peb thiaj tau nws daim teb!’ 39 Lawv thiaj muab nws ntes kiag cab mus tua sab nraum daim teb txiv hmab. 40 Nej sim xav seb, thaum tus tswv teb rov los, nws yuav ua li cas rau cov neeg uas tu nws daim teb?” 41 Lawv thiaj teb Yexus tias, “Vim lawv yog neeg lim hiam, tus tswv teb yuav muab lawv rhuav tshem thiab yuav muab daim teb rau lwm cov tu. Thaum txog caij de txiv, lawv thiaj yuav faib nws feem rau nws.”
42 Yexus hais rau lawv tias, “Nej tsis tau nyeem lod? Vajtswv Txoj Lus twb hais tias, ‘Lub pob zeb uas cov kws ua tsev muab xyeeb tseg, twb muab teeb rau saum kaum tsev uas siab tshaj* lawm. Vajtswv Yehauvas* yog tus ua tej no thiab yog ib yam uas raug qhov muag kawg li.’ 43 Kuv thiaj hais rau nej tias, Vajtswv yuav muab nws lub Nceeg Vaj* tshem ntawm nej mus thiab yuav muab pub rau ib haiv neeg uas ua raws li nws lub siab nyiam.* 44 Yog leej twg dawm lub pob zeb no, tus ntawd yuav ntog tsoo nws sab heev. Yog lub pob zeb poob los ntaus leej twg, tus ntawd yuav tawg ntsoog ntxaws.”
45 Thaum cov pov thawj hlob thiab cov Falixais hnov ob zaj lus piv txwv no, lawv paub tias Yexus hais txog lawv. 46 Lawv xav muab Yexus ntes tiam sis lawv ho ntshai, rau qhov pab neeg coob coob ntseeg tias nws yog ib tug cev Vajtswv lus.