Lukas Sau
6 Muaj ib hnub Xanpataus, Yexus thiab nws cov thwj tim hla ib daim teb mog.* Nws cov thwj tim txawm zaws hnab mog los tev noj. 2 Cov Falixais muaj ib txhia nug tias, “Ua cas nej ua tej uas txwv tsis pub ua rau hnub Xanpataus?” 3 Tiam sis Yexus teb lawv tias, “Nej tsis tau nyeem txog Daviv lod? Muaj ib zaug Daviv thiab nws cov kwv luag tshaib plab. 4 Nws thiaj mus rau hauv Vajtswv lub tsev thiab muab cov ncuav uas fij rau Vajtswv lawd los noj. Thiab nws tseem muab cov ncuav rau nws cov kwv luag noj huv tib si. Yog yam uas tsis muaj leej twg muaj cai noj, tsuas yog tus pov thawj thiaj muaj cai noj xwb los sad?” 5 Ces Yexus thiaj hais rau lawv tias, “Neeg Leej Tub yog tus Tswv uas kav hnub Xanpataus.”
6 Muaj dua ib hnub Xanpataus, Yexus mus qhia cov neeg rau hauv lub tsev pe hawm. Muaj ib tug yawg sab tes xis qhuav tas kuj tuaj ntawd thiab. 7 Cov xib hwb* thiab cov Falixais ntsia ntsoov Yexus seb Yexus puas kho tus yawg ntawd rau hnub Xanpataus kom lawv thiaj nrhiav tau kev los nkaug nws. 8 Tiam sis Yexus twb paub tej uas lawv xav ntawd, Yexus thiaj hais rau tus yawg qhuav tes tias, “Cia li los sawv hauv plawv no.” Ces nws txawm los sawv kiag hauv plawv. 9 Ces Yexus hais rau lawv tias, “Cia kuv nug nej seb, qhov twg thiaj raws txoj cai rau hnub Xanpataus, ua qhov zoo los ua qhov phem, cawm txoj sia los rhuav txoj sia?” 10 Yexus ntsia puag ncig cov neeg, Yexus thiaj hais rau tus yawg qhuav tes tias, “Cia li xyab hlo koj txhais npab.” Nws thiaj ua li ntawd ces nws txhais tes txawm zoo hlo. 11 Cov xib hwb thiab cov Falixais txawm chim ua npau taws vog. Lawv txawm sib tham zom zaws seb yuav ua li cas rau Yexus.
12 Muaj ib hnub Yexus nce mus saum roob mus thov Vajtswv. Nws thov Vajtswv ib hmos kaj ntug plaws. 13 Thaum kaj ntug nws txawm hu nws cov thwj tim los cuag nws. Nws thiaj xaiv tau 12 leeg thiab muab lawv hu ua cov tub txib. 14 Lawv cov npe hu li no, Ximoos tus uas Yexus muab hu ua Petus, nws tus kwv Anrus, Yakaunpaus, Yauhas, Filis, Npathaulaumais, 15 Mathais, Thaumas, Yakaunpaus uas yog Afe-as tus tub, Ximoos tus uas kub siab,* 16 Yudas uas yog Yakaunpaus tus tub, thiab Yudas Ikhali-aus tus uas ntxeev siab rau Yexus.
17 Ces Yexus lawv txawm nqes saum roob los txog ntawm ib qho chaw tiaj tiaj. Yexus cov thwj tim tuaj coob coob rau ntawd. Kuj muaj ib pab neeg coob coob tuaj rau ntawd thiab. Lawv tuaj hauv Yudias, Yeluxalees, thiab ntawm ntug hiav txwv thaj tsam Thailab thiab Xaidoos. Lawv tuaj mloog nws qhia thiab tuaj kom nws kho lawv tej mob. 18 Txawm cov neeg raug dab los Yexus kho lawv zoo tib si. 19 Thaum tib neeg kov Yexus, muaj hwj chim tawm hauv nws mus kho lawv tej mob zoo lawm. Twb yog vim li no txhua leej txhua tus thiaj sib txiv qev mus kov Yexus.
20 Yexus txawm tig los ntsia nws cov thwj tim thiab hais rau lawv tias,
“Nej cov uas txom nyem yuav zoo siab rau qhov Vajtswv lub Nceeg Vaj* yuav yog nej tug.
21 “Nej cov uas nim no tshaib nqhis yuav zoo siab rau qhov nej yuav tsau npo.
“Nej cov uas nim no quaj ntsuag yuav zoo siab rau qhov nej yuav luag ntxhi.
22 “Nej cov uas raug luag ntxub, raug luag thuam, raug luag ntiab tawm, thiab raug luag rhuav nej lub npe* vim nej ntseeg neeg Leej Tub yuav zoo siab. 23 Lawv cov yawg koob twb ua li ntawd rau cov cev Vajtswv lus lawm thiab. Yog li, thaum nej raug tej ntawd cia li zoo siab xyiv fab, rau qhov Vajtswv yuav foom koob hmoov nplua mias rau nej.*
24 “Tiam sis nej cov uas nplua nuj yuav raug txom nyem lauj, rau qhov tej uas nej muaj, nej tsuas tau li ntawd lawm xwb.
25 “Nej cov uas nim no tsau npo yuav txom nyem lauj, rau qhov nej yuav tshaib nqhis.
“Nej cov uas nim no luag ntxhi yuav txom nyem lauj, rau qhov nej yuav quaj ntsuag.
26 “Nej cov uas luag qhuas ntxhias yuav txom nyem lauj, rau qhov lawv cov yawg koob kuj qhuas cov uas cev lus cuav li ntawd lawm thiab.
27 “Tiam sis kuv hais rau nej cov uas tab tom mloog no tias, cia li hlub nej cov yeeb ncuab, ua zoo rau cov uas ntxub nej, 28 foom koob hmoov rau cov uas tsawm foom nej, thov Vajtswv rau cov uas ua saib tsis taus nej. 29 Yog leej twg ntaus koj ib sab plhu, tig sab tod rau nws ntaus thiab. Yog leej twg txeeb koj lub tsho sab nraud, cia li hle lub sab hauv rau nws thiab. 30 Yog leej twg thov koj ib yam dab tsi, cia li muab rau nws. Yog leej twg txeeb koj ib yam dab tsi lawd, tsis txhob mus muab rov los.
31 “Tsis tas li ntawd xwb, yog nej xav kom lwm tus ua li cas rau nej, nej yuav tsum ua ib yam li ntawd rau lawv thiab.
32 “Yog nej tsuas hlub cov uas hlub nej xwb, nej xav tias luag yuav qhuas nej no lod? Txawm cov neeg txhaum los kuj txawj sib hlub li ntawd thiab. 33 Yog nej tsuas ua zoo rau cov uas ua zoo rau nej xwb, nej xav tias luag yuav qhuas nej no lod? Txawm cov neeg txhaum los kuj txawj ua ib yam li ntawd thiab. 34 Yog nej tsuas txais rau cov uas nej xav tias yuav them taus nej, nej xav tias luag yuav qhuas nej no lod? Txawm cov neeg txhaum los, lawv twb txais rau cov uas yuav them taus lawv thiab xwb. 35 Tiam sis nej yuav tsum coj txawv ntawd es hlub nej cov yeeb ncuab, ua zoo thiab zoo siab hlo txais rau luag, tsis txhob tos luag them rov qab. Yog nej ua li ntawd, nej yuav tau koob hmoov nplua mias thiab nej yuav yog Vajtswv tus muaj hwj chim loj dua ntais cov me nyuam.* Rau qhov Vajtswv yeej ua zoo rau cov lim hiam thiab cov uas tsis ris nws txiaj ntsig. 36 Nej Leej Txiv yog tus muaj lub siab hlub,* nej yuav tsum muaj lub siab hlub ib yam li ntawd.
37 “Tsis tas li ntawd xwb, cia li tseg tsis txhob txiav txim rau luag, Vajtswv thiaj li yuav tsis txiav txim rau nej. Nej cia li tseg tsis txhob thuam luag, nej thiaj li tsis raug thuam. Kav tsij zam txim rau luag, Vajtswv thiaj yuav zam txim rau nej. 38 Xyaum pub rau luag ces luag yuav pub rau nej. Luag yuav luj ib taig puv nkaus, muab co muab nias kom phwj yos, laub lug rau hauv nej lub nqaws tsho.* Nej muab lub luaj li cas luj rau luag, luag yuav muab lub luaj li ntawd luj rov rau nej.”
39 Ces Yexus kuj qhia ib zaj lus piv txwv rau lawv tias, “Ib tug dig muag coj puas tau ib tug dig muag kev? Yog ua li ntawd, nkawd yeej yuav poob qhov xwb, puas yog? 40 Ib tug tub kawm* yeej txawj tsis tshaj tus xib hwb, tiam sis txhua tus uas luag ua tib zoo cob* lawd yuav txawj li tus xib hwb. 41 Ua cas koj ho pom qhov nyuag hmoov ntoo* hauv koj tus kwv tij lub qhov muag, tiam sis koj ho tsis pom tog niag ntoo* hauv koj lub? 42 Koj yuav ua li cas hais rau koj tus kwv tij tias, ‘Cia kuv pab so qhov nyuag hmoov ntoo hauv koj lub qhov muag,’ tiam sis koj twb tsis pom tog niag ntoo uas nyob hauv koj lub?
43 “Tsis muaj ib tsob ntoo zoo yuav txi cov txiv phem. Thiab tsis muaj ib tsob ntoo phem yuav txi cov txiv zoo. 44 Yog koj saib cov txiv, koj yuav paub tias tsob ntoo zoo li cas. Yeej tsis muaj leej twg de tau txiv cev ntawm tsob pos, los sis de tau txiv hmab ntawm tsob ntoo pos. 45 Tus neeg zoo xav ntsoov txog yam zoo hauv nruab siab, nws thiaj hais tawm yam zoo xwb. Tiam sis tus neeg phem xav ntsoov txog yam phem hauv nruab siab, nws thiaj hais tawm yam phem. Vim lub siab xav li cas, lub ncauj hais tawm li ntawd.
46 “Vim li cas nej muab kuv hu ua ‘Tus Tswv! Tus Tswv!’ tiam sis ho tsis ua raws li kuv hais? 47 Kuv hais rau nej tias txhua tus uas los cuag kuv uas mloog kuv lus thiab ua raws li ntawd, yuav zoo li no. 48 Nws zoo li tus yawg ua tsev uas khawb qhov ncej tob tob mus ti nkaus daim lag zeb. Twb yog li ntawd, thaum dej nyab los ntaus lub tsev, los lub tsev tsis ua zog li vim lub tsev cog ruaj heev. 49 Tiam sis tus uas hnov kuv hais, thiab tsis ua raws li ntawd, zoo li tus yawg ua tsev rau saum npoo av thiaj tsis ruaj tsis khov. Thaum dej nyab los ntaus lub tsev, lub tsev thiaj vau hlo puas tsuaj tas huv si.”