Lukas Sau
13 Lub sij hawm ntawd, muaj ib txhia txawm los qhia Yexus paub txog cov neeg Kalilais uas Philaj muab tua rau thaum lawv tab tom muab tsiaj fij rau Vajtswv. 2 Yexus hais rau lawv tias, “Nej xav tias cov Kalilais ntawd raug tua vim lawv ua txhaum loj dua lwm cov Kalilais lod? 3 Tsis yog li ntawd, kuv qhia nej tias tshwj hlo nej tsis tso kev txhaum tseg, nej yuav raug puas tsuaj ib yam nkaus. 4 Los sis 18 leej uas lub tsev tsom faj hauv Xilau-as pob los ntaus tuag, nej xav tias yog lawv muaj txim loj dua cov uas nyob hauv Yeluxalees no lod? 5 Tsis yog li ntawd, kuv qhia nej tias tshwj hlo nej tsis tso kev txhaum tseg, nej yuav raug puas tsuaj ib yam li lawv thiab.”
6 Ces Yexus hais ib zaj lus piv txwv li no, “Muaj ib tug yawg cog ib tsob txiv cev rau hauv nws lub vaj txiv hmab. Nws mus saib seb puas pom txi txiv tiam sis tsis pom ib lub li. 7 Ces nws hais rau tus tu lub vaj txiv hmab tias, ‘Tau peb lub xyoos no, kuv tuaj saib tsob txiv cev tiam sis tsis pom txi li. Cia li muab ntov pov tseg. Tseem yuav cia nws nyob ntxoov av ua dab tsi?’ 8 Nws teb tus tswv vaj tias, ‘Yawg Hlob, cia nws nyob nws ib xyoos ntxiv. Kuv mam li npoog av thiab rau chiv rau. 9 Yog txi txiv lawd ces zoo. Tiam sis yog tsis txi, mam muab ntov pov tseg.’”
10 Muaj ib hnub Xanpataus uas Yexus qhia hauv ib lub tsev pe hawm. 11 Muaj ib tug poj niam tuaj rau hauv. Nws raug dab ua rau nws mob tau 18 lub xyoos. Nws khoov duav sawv tsis taus ntseg li. 12 Thaum Yexus pom nws, Yexus txawm hais rau tus poj niam ntawd tias, “Koj twb dim koj tus mob lawm.” 13 Ces Yexus tsa tes npuab tus poj niam ntawd. Nws txawm sawv tau ntseg tam sid thiab tsa ncauj qhuas Vajtswv. 14 Tiam sis tus saib xyuas lub tsev pe hawm tsis zoo siab vim Yexus kho mob rau hnub Xanpataus. Nws thiaj hais rau pab neeg ntawd tias, “Muaj rau hnub los ua hauj lwm, ua cas ho tsis tuaj kho mob rau tej hnub ntawd es nej ho yuav kho mob rau hnub Xanpataus?” 15 Tiam sis tus Tswv teb nws tias, “Cov neeg siab nkhaus,* hnub Xanpataus nej txhua tus yeej daws nej tej nyuj thiab tej nees luav mus haus dej los sad. 16 Tus poj niam no yog Anplahas xeeb ntxwv. Es Xatas twb muab nws khi tau 18 lub xyoos. Tseem tsis tsim nyog tso nws dim rau hnub Xanpataus thiab lod?” 17 Thaum Yexus hais li no tas, cov uas tawm tsam nws txaj muag txhua tus. Tiam sis cov neeg coob coob zoo siab heev rau tes hauj lwm zoo kawg nkaus uas Yexus tau ua.
18 Yexus hais ntxiv tias, “Vajtswv txoj kev kav* zoo li cas? Kuv yuav muab piv rau dab tsi? 19 Vajtswv txoj kev kav* zoo ib yam li lub noob me me* uas ib tug yawg coj mus cog rau hauv nws lub vaj. Lub noob ntawd tuaj thiab hlob los ua ib tsob niag ntoo. Tej noog saum nruab ntug thiaj los ua zes rau saum tej ceg.”
20 Yexus rov hais dua tias, “Kuv yuav muab Vajtswv txoj kev kav* piv rau dab tsi? 21 Vajtswv txoj kev kav* piv ib yam li tej keeb* uas ib tug poj niam muab xyaw peb maum taig* hmoov mog,* ua rau cov hmoov ntawd su tuaj.”
22 Thaum Yexus sawv kev mus rau Yeluxalees, nws qhia tib neeg ib lub nroog rau ib lub thiab ib lub zos rau ib lub. 23 Muaj ib tug yawg txawm los nug Yexus tias, “Tus Tswv, puas yog tsawg tsawg tus thiaj yuav dim xwb?” Yexus teb tias, 24 “Ua tiag txeem lub qhov rooj nqaim mus rau hauv. Kuv qhia rau nej tias muaj coob tus nrhiav kev mus rau hauv tiam sis yuav mus tsis tau. 25 Thaum tus tswv tsev sawv los xauv qhov rooj ces nej yuav sawv sab nraud khob hais tias, ‘Tus Tswv, thov qhib qhov rooj rau peb.’ Tiam sis nws yuav teb tias, ‘Kuv tsis paub xyov nej tuaj qhov twg tuaj.’ 26 Ces nej yuav teb tias, ‘Es peb twb nrog koj noj koj haus ua ke, thiab koj twb tuaj qhia ntawm tej kev loj hauv peb tej nroog ne.’ 27 Tiam sis nws yuav hais rau nej tias, ‘Kuv tsis paub xyov nej tuaj qhov twg tuaj. Cov niag neeg siab phem, cia li khiav mus!’ 28 Thaum nej pom Anplahas, Ixaj, Yakhauj, thiab cov cev Vajtswv lus hauv Vajtswv lub Nceeg Vaj* tiam sis nej ho raug muab pov rau sab nraud ces nej yuav quaj tom hniav qawv rau qhov ntawd. 29 Tsis tas li ntawd xwb, yuav muaj neeg nyob sab hnub tuaj sab hnub poob, sab qaum teb sab qab teb tuaj koom tsum hauv Vajtswv lub Nceeg Vaj.* 30 Cov uas ua qab ib txhia yuav tau ua ntej thiab cov uas ua ntej ib txhia yuav tau ua qab.”
31 Tib lub sij hawm ntawd, ib txhia Falixais txawm los hais rau Yexus tias, “Kav tsij tawm ntawm no mus rau qhov Helauj xav muab koj tua.” 32 Yexus hais rau lawv tias, “Mus hais rau niag hma ntawd tias, ‘Hnub no thiab tag kis kuv tseem yuav ntiab dab thiab kho tib neeg tej mob. Hnub peb kuv mam ua kuv tes hauj lwm tiav.’ 33 Txawm li cas los xij, hnub no, tag kis, thiab nag kis kuv yuav tsum ua hauj lwm ntxiv. Kuv yuav peem mus kom txog Yeluxalees rau qhov tsis tsim nyog ib tug cev Vajtswv lus raug tua rau lwm qhov. 34 Yeluxalees os, Yeluxalees’e! Koj yog tus uas tua cov cev Vajtswv lus thiab xuas pob zeb ntaus cov uas Vajtswv txib tuaj rau koj. Ntau zaus kuv twb hu koj cov me nyuam ib yam li tus poj qaib cuab me nyuam los puag hauv phab tis tiam sis koj tsis kam. 35 Vajtswv yuav muab koj lub tuam tsev tso nyob qhuav nquas cia. Kuv qhia rau koj tias koj yuav tsis pom kuv mus txog thaum koj hais tias, ‘Tus uas sawv cev rau Vajtswv Yehauvas* lub npe tau koob hmoov nplua mias!’”