Lukas Sau

11 Muaj ib zaug thaum Yexus thov Vajtswv tas, nws ib tug thwj tim hais rau nws tias, “Tus Tswv thov koj qhia peb thov Vajtswv ib yam li Yauhas qhia nws cov thwj tim thiab.”

2 Yexus hais rau lawv tias, “Nej yuav tsum thov Vajtswv li no, ‘Peb Leej Txiv, thov kom sawv daws hwm koj lub npe. Thov koj lub Nceeg Vaj* los. 3 Thov koj pub kom peb muaj txaus noj* txhua hnub. 4 Thiab thov koj zam peb lub txim* ib yam li peb tau zam cov uas ua txhaum rau peb. Thiab thov tsis txhob cia peb qaug rau tej kev sim siab.’”

5 Ces Yexus hais rau lawv tias, “Piv txwv tias nej muaj ib tug phooj ywg. Thaum ib tag hmo nej mus hais rau nws tias, ‘Npawg, thov muab peb lub ncuav rau kuv, 6 rau qhov kuv muaj ib tug phooj ywg tuaj kev deb tuaj so hauv kuv tsev es kuv tsis muaj dab tsi rau nws noj li.’ 7 Tiam sis tus npawg teb hauv tsev tuaj tias, ‘Txhob tab kaum kuv. Tsam no qhov rooj twb xauv lawm, thiab kuv cov me nyuam peb twb pw lawm. Kuv tsis zoo sawv los muab rau koj.’ 8 Kuv qhia rau nej tias, txawm neb ob kwv npawg sib raug zoo los, ntshe nws yuav tsis kam sawv los muab rau koj. Tiam sis vim koj tas zaj tas zog taij thov nws, nws yeej yuav sawv los muab rau koj. 9 Yog li, kuv hais rau nej tias, yeej meem thov mas nej yuav tau. Yeej meem nrhiav mas nej yuav ntsib. Yeej meem khob mas yuav qhib rau nej. 10 Rau qhov txhua tus uas thov yeej yuav tau. Txhua tus uas nrhiav yeej yuav ntsib. Txhua tus uas khob yeej yuav qhib rau nws. 11 Nej cov ua txiv, yog nej tus tub taij ntses, nej yuav muab nab rau lod? 12 Los sis nws taij qe es nej yuav muab raub ris teb rau lod? 13 Txawm nej yog neeg txhaum los nej twb paub muab tej yam zoo rau nej cov me nyuam. Yog li ntawd, nej Leej Txiv saum ntuj yim huab paub muab lub hwj huam dawb huv rau cov uas thov nws!”

14 Muaj ib tug yawg raug dab* ua rau nws hais tsis tau lus. Tom qab Yexus ntiab niag dab tawm lawd, nws txawm hais tau lus mas pab neeg coob coob xav tsis thoob li. 15 Tiam sis muaj ib txhia hais tias, “Twb yog Npexenpus* uas yog dab tus thawj pub hwj chim rau nws ntiab dab xwb.” 16 Muaj dua lwm cov ho sim Yexus kom nws cia li tuav Vajtswv lub npe ua txuj ci rau lawv pom. 17 Yexus paub tej uas lawv xav ntawd, nws thiaj hais rau lawv tias, “Txhua lub teb chaws uas rov sib tawm tsam yuav puas tsuaj mus, thiab txhua tsev neeg uas tsis koom siab yuav tawg ua sab ua sua. 18 Ib yam li ntawd, nej hais tias Npexenpus pub hwj chim rau kuv ntiab dab tiam sis yog Xatas rov rhuav nws tes hauj lwm, nws txoj kev kav puas yuav ruaj khov? 19 Yog Npexenpus pub hwj chim rau kuv ntiab dab ces leej twg ho pub hwj chim rau nej cov thwj tim ntiab dab thiab? Nej cov thwj tim tes hauj lwm twb phua cai tias nej hais tsis yog lawm. 20 Yog Vajtswv lub hwj chim* ua rau kuv ntiab tau dab ces qhia tias Vajtswv txoj kev kav* twb los txog lawm, tiam sis nej tsis paub xwb. 21 Yog muaj ib tug neeg muaj zog heev tuav rawv cuab yeej zov nws lub vaj lub tsev ces yeej tsis muaj leej twg yuav txeeb tau nws tej cuab txhiaj cuab tam li. 22 Tiam sis yog ib tug muaj zog tshaj ho tawm tsam yeej nws, tus ntawd yuav txeeb nws tej cuab yeej uas nws tso siab rau, thiab tus ntawd yuav muab tej uas nws txeeb tau coj mus sib faib. 23 Tus uas tsis kam tuaj kuv tog yeej tawm tsam kuv, thiab tus uas tsis kam mus coj neeg los cuag kuv, tseem yuav ua rau neeg khiav ntawm kuv mus.

24 “Thaum dab tawm hauv ib tug neeg mus, tus dab ncig mus ncig los tom teb chaws moj sab qhua tiam sis nws nrhiav tsis tau chaw nyob. Tus dab txawm hais tias, ‘Kuv mam rov qab mus rau tus neeg uas kuv tawm tuaj.’ 25 Thaum nws rov los txog, ua ciav tus neeg ntawd zoo li lub tsev uas twb muab cheb muab tu du lug. 26 Tus dab thiaj mus coj dua xya tus dab uas tsiv tshaj nws los nyob hauv tus neeg ntawd. Yog li, thaum kawg, tus neeg ntawd lub neej haj yam phem tshaj thaum chiv thawj.”

27 Thaum Yexus tab tom qhia tej no, muaj ib tug poj niam qw hauv pab neeg coob coob tuaj tias, “Leej niam uas yug koj thiab pub mis rau koj noj tau koob hmoov ntau kawg li lauj!” 28 Tiam sis Yexus hais tias, “Tsis yog li kod. Tus uas hnov Vajtswv txoj lus thiab coj raws nraim li ntawd thiaj yog tus uas tau koob hmoov!”

29 Thaum muaj neeg coob coob sib txiv qev los ua ke, Yexus thiaj hais tias, “Tiam neeg no lim hiam heev. Lawv xav pom txuj ci kawg li tiam sis lawv yuav tsis pom. Lawv tsuas pom qhov txuj ci uas tau muaj rau Yaunas xwb. 30 Yaunas ua pov thawj rau cov Ninaves li cas ces neeg Leej Tub yuav ua pov thawj rau tiam neeg no ib yam nkaus. 31 Thaum txog Hnub Txiav Txim, tus poj vaj uas nyob nram qab teb yuav nrog cov neeg tiam no sawv rov los. Nws yuav phua cai rau lawv. Tos nws phua cai los, nws tuaj puag nram qab teb tuaj mloog Xalaumoos tej tswv yim. Kuv qhia rau nej tias tseem muaj ib tug loj dua Xalaumoos nyob ntawm no thiab. 32 Thaum txog Hnub Txiav Txim, cov neeg hauv Ninaves yuav nrog tiam neeg no sawv rov los. Cov Ninaves yuav phua cai rau tiam neeg no. Tos lawv phua cai los twb yog thaum lawv hnov Yaunas qhia, lawv txawm hloov dua siab tshiab. Kuv qhia rau nej tias tseem muaj ib tug loj dua Yaunas nyob ntawm no. 33 Yog leej twg taws teeb, nws yeej tsis muab tso rau qhov chaw nraim nkoos los sis muab tawb khwb rau, tsuas muab txawb rau saum tus ncej teeb kom cov neeg tuaj hauv tsev pom kev xwb. 34 Koj lub qhov muag yog lub teeb rau lub cev. Yog koj lub qhov muag ntsia ntsoov rau ib yam xwb* ces koj lub cev kuj yuav ci kaj nrig thiab. Tiam sis yog koj lub qhov muag phem* ces koj lub cev kuj yuav tsaus nti thiab. 35 Yog li, ceev faj tsam koj xav tias koj tau qhov kaj nyob hauv koj tiam sis ho yog qhov tsaus. 36 Yog li ntawd, thaum koj lub cev ci kaj nrig tsis muaj ib qho tsaus li ces tag nrho koj lub cev yuav cig lam lug li lub teeb rau koj xwb.”

37 Thaum nws hais li no tas, muaj ib tug Falixais txawm caw Yexus mus noj mov. Yexus thiaj mus tom nws tsev thiab txav mus zaum ntawm tsum mov. 38 Thaum tus Falixais pom Yexus tsis ntxuav tes* ua ntej noj mov, ua rau nws tsis pom qab xav li. 39 Tiam sis tus Tswv hais rau nws tias, “Nej cov Falixais zoo li lub khob lub tais uas ntxuav sab nraud du lug tiam sis sab hauv khub khawv. Nej yog neeg siab hlob thiab lim hiam kawg li. 40 Cas nej tsis txawj xav li, tus uas tsim lub cev thiab lub siab yog tib tug xwb los sad? 41 Nej yuav tsum ua lub siab dawb paug pub rau cov txom nyem. Yog nej ua li ntawd, nej thiaj dawb huv. 42 Tiam sis cov Falixais’e, nej yuav raug txom nyem rau qhov nej pub ib feem kaum pum hub, lu,* thiab lwm yam txuj lom.* Tiam sis nej ho tsis quav ntsej kev ncaj ncees thiab Vajtswv txoj kev hlub! Yeej tsim nyog pub ib feem kaum, tiam sis tsis txhob muab qhov tseem ceeb dua ntais tso tseg. 43 Cov Falixais’e, nej yuav raug txom nyem rau qhov hauv tej tsev pe hawm nej nyiam zaum tom hauv ntej,* thiab tom tej tshav puam los nej xav kom tib neeg hawm nej! 44 Nej yuav raug txom nyem lauj! Nej zoo li tej ntxa uas tsis muaj cim dab tsi, neeg tsuj mus tsuj los tiam sis lawv tsis paub!”

45 Ib tug uas paub Mauxes Txoj Kev Cai zoo heev thiaj hais tias, “Xib Hwb, koj hais tej lus ko kuj siab peb lawm thiab.” 46 Yexus thiaj teb tias, “Nej cov uas paub Mauxes Txoj Kev Cai zoo heev yuav raug txom nyem thiab. Rau qhov nej muab lub nra hnyav nog rau luag ris, tiam sis nej twb tsis cev ib nyuag tus ntiv tes thiab li!

47 “Nej yuav raug txom nyem lauj! Rau qhov nej txhim cov cev Vajtswv lus tej ntxa tiam sis nej cov yawg koob twb yog cov uas tua lawv! 48 Tej no ua tim khawv tias nej yeej paub tej uas nej cov yawg koob tau ua los nej tseem pom zoo thiab. Lawv yog cov uas tua cov cev Vajtswv lus tiam sis nej yog cov uas txhim tej ntxa. 49 Twb yog li ntawd, Vajtswv tus uas muaj tswv yim thiaj hais tias, ‘Kuv yuav txib cov cev Vajtswv lus thiab cov tub txib mus qhia lawv. Tiam sis lawv yuav muab ib txhia tua thiab muab ib txhia tsim txom. 50 Tiam neeg no yuav tau ris lub txim tua cov cev Vajtswv lus txij thaum ntuj tsim teb raug los, 51 suav txij Anpees los txog Xekhaliyas tus uas raug tua ntawm lub tuam tsev thiab lub thaj kis nruab nrab.’ Kuv hais rau nej tias, tiam neeg no yeej yuav tau ris lawv tej ntshav tib si.

52 “Nej cov uas paub Mauxes Txoj Kev Cai zoo yuav raug txom nyem lauj! Rau qhov nej kaw kev tsis pub lwm tus paub Vajtswv. Nej twb tsis xav mus,* los nej tseem txwv cov uas xav mus thiab!”

53 Thaum Yexus tawm qhov ntawd mus, cov xib hwb* thiab cov Falixais txawm los vij nkaus Yexus thiab thom nws txog ntau yam. 54 Lawv tos nrhw seb Yexus puas hais ib lo yuam kev xwb.