Lukas Sau

10 Tom qab ntawd, tus Tswv xaiv dua 70 leej thiab txib lawv ib nkawg ib nkawg ua nws ntej mus rau txhua lub nroog, thiab txhua qhov chaw uas nws yuav mus. 2 Ces Yexus hais rau lawv tias, “Tej qoob twb siav zoo hlais lawm, tiam sis cov tub zog tsis muaj coob. Cia li thov tus Tswv teb txib neeg mus sau nws tej qoob loo. 3 Ceev faj, kuv txib nej tawm mus ib yam li cov me nyuam yaj mus rau hauv pab hma. 4 Tsis txhob nqa hnab nyiaj, tsis txhob ntim su, tsis txhob nqa khau, thiab tsis txhob nrog leej twg tham tom tej kev. 5 Thaum nej mus rau hauv ib lub tsev twg, cia li hais tias, ‘Thov kom nej tsev neeg nyob kaj siab lug.’* 6 Yog tsev neeg ntawd muaj tus uas xav nyob kaj siab lug ces nws yuav tau raws li nej thov. Tiam sis yog tsis muaj ces txoj kev kaj siab ntawd yuav rov los rau nej. 7 Cia li nyob hauv lub tsev ntawd. Lawv npaj tau li cas, cia li noj thiab haus li ntawd rau qhov yeej tsim nyog tus neeg ua hauj lwm tau noj tau haus. Tsis txhob mus so ib lub tsev dhau ib lub.

8 “Tsis tas li ntawd xwb, thaum nej mus rau hauv ib lub nroog twg es lawv tos txais nej, lawv npaj tau dab tsi ces cia li noj li ntawd. 9 Thiab kho cov neeg mob hauv lub nroog ntawd thiab hais rau lawv tias, ‘Vajtswv txoj kev kav* twb los ze lawm.’ 10 Tiam sis thaum nej mus rau hauv ib lub nroog twg es lawv tsis tos txais nej, cia li tawm mus rau tom tej kev loj thiab hais tias, 11 ‘Peb muab tej hmoov av hauv nej lub nroog uas lo peb ko taw so rov rau nej ua tim khawv rau nej tias Vajtswv txoj kev kav* twb los ze lawm.’ 12 Kuv qhia rau nej tias thaum txog Hnub Txiav Txim mas lub nroog no tseem yuav raug sab tshaj lub nroog Xaudoos.

13 “Cov neeg hauv Khaulaxis thiab Npexedas’e, nej yuav txom nyem lauj! Yog cov neeg hauv Thailab thiab Xaidoos pom tej txuj ci uas kuv ua hauv nej, ntshe lawv twb hnav ntaub tsaj tsau qhov tshauv thiab hloov dua siab tshiab ntxov lawm. 14 Thaum txog Hnub Txiav Txim nej tseem yuav raug sab tshaj Thailab thiab Xaidoos. 15 Nej cov uas nyob hauv Khapena-us’e, yuav muab nej tsa kom nto ntuj lod? Tsuas yuav muab nej txo mus rau hauv lub qhov tuag* xwb!

16 “Tus uas mloog nej lus kuj yog mloog kuv lus. Thiab tus uas tsis kam mloog nej lus kuj yog tsis kam mloog kuv lus thiab. Tsis tas li ntawd xwb, tus uas tsis kam mloog kuv lus kuj yog tsis kam mloog tus uas txib kuv los thiab.”

17 Thaum 70 leej rov los, lawv zoo siab kawg li, lawv thiaj hais tias, “Tus Tswv, thaum peb tuav koj lub npe ntiab dab, dab yeej mloog peb lus.” 18 Yexus thiaj hais rau lawv tias, “Kuv pom Xatas poob saum ntuj los cuag li xob laim. 19 Kuv twb pub hwj chim rau nej tsuj tau nab thiab raub ris teb lawm. Thiab nej yuav kov yeej nej tus yeeb ncuab lub hwj chim, thiab yuav tsis muaj ib yam dab tsi ua rau nej raug mob. 20 Txawm li ntawd los, tsis txhob zoo siab rau qhov uas dab mloog nej lus. Tiam sis cia li zoo siab rau qhov twb muab nej tej npe sau cia rau saum ntuj lawm.” 21 Lub sij hawm ntawd, lub hwj huam dawb huv txawm ua rau Yexus xyiv fab heev, nws thiaj hais tias, “Kuv Leej Txiv uas yog tus Tswv ntuj Tswv teb, kuv qhuas koj tab meeg sawv daws, rau qhov koj muab tej no zais zoo zoo ntawm cov neeg muaj tswv yim thiab txawj ntse, tiam sis koj muab qhia rau cov neeg uas txo hwj chim li tej me nyuam yaus. Kuv Leej Txiv, kuv qhuas koj rau qhov koj yeej pom zoo kom muaj li no.” 22 Ces Yexus txawm hais tias, “Kuv Leej Txiv twb muab ib puas tsav yam cob rau kuv lawm. Tsis muaj leej twg paub Leej Tub, tsuas yog Leej Txiv thiaj paub xwb. Thiab tsis muaj leej twg paub Leej Txiv, tsuas yog Leej Tub thiaj paub xwb. Leej Tub qhia Leej Txiv rau tus twg, tus ntawd thiaj paub xwb.”

23 Ces Yexus txawm tig mus hais twj ywm rau cov thwj tim tias, “Cov uas pom tej uas nej pom yuav zoo siab. 24 Kuv hais rau nej tias, cov cev Vajtswv lus thiab cov vaj ntxwv thaum ub xav pom tej uas nej pom, thiab xav hnov tej uas nej hnov, tiam sis lawv tsis tau pom thiab tsis tau hnov.”

25 Muaj ib tug txiv neej uas paub Mauxes Txoj Kev Cai zoo txawm sawv tsees los sim Yexus tias, “Xib Hwb, kuv yuav tsum ua li cas kuv thiaj tau txoj sia ib txhis tsis kawg?” 26 Yexus thiaj hais rau nws tias, “Mauxes Txoj Kev Cai qhia li cas? Koj ho to taub li cas?” 27 Nws teb tias, “‘Koj yuav tsum hlub Yehauvas* uas yog koj tus Vajtswv, kawg siab kawg ntsws, kawg koj txoj sia,* kawg dag kawg zog, kawg laj lim tswv yim,’ thiab ‘hlub kwv tij zej zog ib yam li koj tus kheej.’” 28 Yexus teb nws tias, “Yeej yog li koj hais, kav tsij ua li ntawd ces koj yuav tau txoj sia.”

29 Tiam sis tus txiv neej ntawd xav kom luag pom tias nws yog ib tug neeg ncaj ncees, nws thiaj nug Yexus tias, “Kuv tus kwv tij zej zog yog leej twg tiag?” 30 Yexus piav ib zaj kwv huam teb nws tias, “Muaj ib tug yawg mus ntawm Yeluxalees mus rau nram Yelikaus. Nws ntsib ib pab tub sab, lawv muab nws ntaus thiab muab nws tej ris tsho hle tas tseg nws tshuav siav xwb. 31 Muaj ib tug pov thawj tab tom los txog ntawd. Tiam sis thaum nws pom tus yawg ntawd, nws txawm lug kev ib sab mus lawm. 32 Tom qab ntawd kuj muaj ib tug Levis ua ib yam li ntawd thiab. Thaum nws los pom tus yawg ntawd, nws txawm lug ib sab kev mus lawm thiab. 33 Tiam sis muaj ib tug yawg Xamalis los txog ntawd, thaum nws pom dheev tus yawg ntawd mas nws hlub heev. 34 Nws thiaj txav zog mus saib. Nws muab roj thiab cawv txiv hmab hliv rau tus yawg ntawd tej qhov txhab thiab muab ntaub qhwv rau. Nws mam muab tsaws hlo rau saum tus nees luav coj mus tom ib lub tsev so thiab tu nws. 35 Hnub tom qab, tus yawg Xamalis muab tau ob lub nyiaj denalias* rau tus tswv tsev thiab hais tias, ‘Thov tu nws, koj siv tshaj li cas thaum kuv rov los kuv mam ntxiv rau koj.’ 36 Peb tug no, tus twg thiaj yog tus uas tub sab ntaus tus kwv tij zej zog?” 37 Tus uas paub Mauxes Txoj Kev Cai ntawd thiaj hais tias, “Yog tus uas hlub* tus yawg tub sab ntaus.” Yexus hais rau nws tias, “Koj cia li mus ua ib yam li ntawd.”

38 Ces lawv txawm sawv kev mus rau hauv ib lub zos. Muaj ib tug poj niam npe hu ua Mathas thiaj tos txais Yexus mus rau hauv nws tsev. 39 Mathas muaj ib tug niam hluas hu ua Maivliag. Maivliag los zaum ntawm tus Tswv ko taw mloog ntsoov nws qhia. 40 Tiam sis Mathas txhawj txog ntau yam hauj lwm, nws thiaj los hais rau Yexus tias, “Tus Tswv, koj tsis pom kuv tus niam hluas cia kuv tib leeg ua hauj lwm xwb lod, thov hais kom nws los pab kuv.” 41 Tus Tswv teb nws tias, “Mathas os, Mathas’e, koj txhawj txog ntau yam. 42 Tsis tas ua ntau yam, ua ib yam xwb los tau lawm. Maivliag twb xaiv yam zoo* lawm, tsis muaj leej twg yuav txeeb tau ntawm nws mus.”