Lukas Sau
14 Muaj ib hnub Xanpataus Yexus mus noj mov hauv cov Falixais ib tug thawj lub tsev mas lawv soj ntshis Yexus. 2 Thaum ntawd muaj ib tug yawg phob phob vog nyob ncaj ntawm Yexus. 3 Yexus thiaj nug cov uas paub Mauxes Txoj Kev Cai zoo thiab cov Falixais tias, “Kho mob rau hnub Xanpataus puas txhaum?” 4 Tiam sis lawv tsis teb ib los li. Yexus thiaj tuav nkaus tus yawg ntawd kho nws zoo hlo thiab kom nws mus tsev. 5 Ces Yexus hais rau lawv tias, “Hnub Xanpataus yog nej leej twg muaj ib tug tub los sis ib tug nyuj poob hauv qhov dej, nws yeej yuav mus rub tawm tam sid los sad?” 6 Tiam sis lawv tsis pom qab teb li.
7 Thaum Yexus pom cov qhua tuaj ntawd, lawv xaiv qhov chaw zoo tshaj zaum xwb. Yexus thiaj hais ib zaj lus piv txwv rau lawv tias, 8 “Thaum luag caw koj mus noj tshoob, txhob mus zaum qhov chaw zoo tshaj, nyob tsam luag caw ib tug tseem ceeb dua koj tuaj thiab. 9 Ces tus uas caw neb ob leeg yuav los hais rau koj tias, ‘Cia nws zaum koj qhov chaw.’ Thaum koj sawv mus zaum qhov chaw qis mas koj yuav txaj muag heev. 10 Yog li, thaum luag caw koj mus noj tshoob, kav tsij mus zaum qhov chaw qis. Thaum tus uas caw koj los ces nws yuav hais rau koj tias, ‘Npawg, mus zaum qhov chaw zoo.’ Ces koj yuav tau ntsej muag tab meeg cov qhua sawv daws. 11 Rau qhov txhua tus uas tsab hwj chim yuav muab txo kom qis. Thiab tus uas txo hwj chim yuav muab tsa kom siab.”
12 Tom qab ntawd, Yexus hais rau tus caw nws tuaj tias, “Thaum koj muaj noj muaj haus, tsis txhob caw koj cov phooj ywg kwv luag, cov kwv tij neej tsa, thiab cov neeg zej zos uas nplua nuj. Tsam lawv ho caw koj mus noj pauj qhov uas koj tau caw lawv. 13 Tiam sis thaum koj muaj noj muaj haus, mus caw cov txom nyem, cov qhuav tes qhuav taw, cov ceg tawv thiab cov dig muag tuaj noj. 14 Yog koj ua li ntawd mas koj yuav zoo siab vim lawv tsis muaj dab tsi pauj koj. Cia Vajtswv mam li pauj koj thaum nws tsa cov uas ncaj ncees sawv hauv qhov tuag rov qab los.”
15 Thaum ib tug qhua hnov tej no, nws txawm los hais rau Yexus tias, “Tus uas tau mus koom rooj mov hauv Vajtswv lub Nceeg Vaj* yog tus uas zoo siab.”
16 Yexus thiaj hais rau nws tias, “Muaj ib tug yawg ua ib rooj mov loj heev. Nws caw coob tus tuaj noj. 17 Thaum yuav txog caij noj hmo, nws txib ib tug tub qhe mus hu cov qhua tias, ‘Twb rau tau zaub mov tiav lawm, cia li tuaj noj.’ 18 Tiam sis lawv nyias yig nyias lawm ib yam. Muaj ib tug hais tias, ‘Ntshe kuv yuav tuaj tsis tau. Kuv yuav tau ib daim teb kuv tseem yuav mus saib.’ 19 Muaj dua ib tug ho hais tias, ‘Ntshe kuv yuav tuaj tsis tau. Kuv yuav tau tsib nkawg nyuj kuv tseem yuav coj mus sim laij teb.’ 20 Tseem muaj dua ib tug ho hais tias, ‘Ntshe kuv yuav tuaj tsis tau. Kuv nyuam qhuav yuav poj niam.’ 21 Ces tus tub qhe txawm rov los hais tej no rau tus tswv tsev. Tus tswv tsev thiaj npau taws heev thiab hais rau tus tub qhe tias, ‘Cia li mus tam sim no, mus rau tej kev loj kev me hauv nroog. Mus coj cov txom nyem, cov qhuav tes qhuav taw, cov dig muag, thiab cov ceg tawv tuaj noj.’ 22 Thaum tus tub qhe rov los, nws hais rau tus tswv tsev tias, ‘Yawg Hlob, kuv twb mus ua li koj hais lawm tiam sis tseem tshuav chaw thiab.’ 23 Tus tswv tsev thiaj hais rau tus tub qhe tias, ‘Cia li tawm hauv nroog mus rau txhua txoj ke, mus hu kom cov tib neeg tuaj xwb xwb li, thiaj puv nkaus kuv lub tsev. 24 Kuv hais rau nej tias, tsis muaj ib tug uas kuv xub caw yuav tau saj rooj mov no li.’”
25 Muaj ib pab neeg coob coob nrog Yexus mus. Nws thiaj tig mus hais rau lawv tias, 26 “Yog leej twg hlub* nws niam nws txiv, nws poj niam me nyuam, nws kwv tij nkauj muam, thiab nws txoj sia tshaj kuv lawm ces nws yuav ua tsis tau kuv ib tug thwj tim. 27 Yog leej twg tsis kam kwv nws tus ncej ntoo* nrog kuv mus, nws yuav ua tsis tau kuv ib tug thwj tim. 28 Yog nej leej twg xav ua ib lub tsev,* nej yeej zaum tsaws xam zoo zoo ua ntej seb puas muaj nyiaj txaus ua kom tiav los sad? 29 Yog nws tsis ua li ntawd ces thaum nws ua txog tog lawm, nws yuav ua tsis tiav. Tej neeg ob cag yuav thuam nws 30 tias, ‘Tus yawg no pom xeeb ua tsev tiam sis nws ho ua tsis tiav.’ 31 Los sis yog ib tug vaj ntxwv uas muaj 10,000 tus tub rog xwb, ua ntej nws yuav mus tawm tsam ib tug vaj ntxwv uas muaj 20,000 tus tub rog, nws yuav tsis zaum tsaws nrog luag sab laj ua ntej seb nws puas ntaus yeej tso lod? 32 Yog tus vaj ntxwv pom tias nws yuav kov tsis yeej ces nws yeej yuav txib ib pab neeg sawv cev ua nws ntej mus nrog tog tod hais kom sib haum, rau thaum lawv tseem nyob deb. 33 Ib yam li ntawd, yog nej leej twg tsis tso nws tej qhov txhia chaw tseg ces nws yeej yuav ua tsis tau kuv ib tug thwj tim li.
34 “Ntsev yeej zoo tiam sis yog ntsev tsuag lawd ces yuav ua li cas thiaj li rov qab? 35 Tsis zoo ua chiv, tsis zoo muab nphoo av, tsuas zoo muab pov tseg lawm xwb. Leej twg muaj pob ntseg, cia li mloog.”