SAU RAU FILEMOOS

1 Ntawm no yog Povlauj. Kuv raug kaw vim ua Yexus Khetos* tes hauj lwm. Kuv thiab peb tus kwv tij Timautes xa tsab ntawv no mus rau Filemoos tus uas peb hlub tshua. 2 Thiab hais rau tus muam Afias thiab tus kwv tij Akhipus uas nrog peb ua Khetos li tub rog thiab lub koom txoos uas tuaj ntsib hauv koj tsev.

3 Thov kom peb Leej Txiv thiab tus Tswv Yexus Khetos foom koob hmoov rau nej thiab pub nej nyob kaj siab lug.

4 Thaum kuv thov Vajtswv kuv yeej nco ntsoov thov txog koj, 5 rau qhov kuv hnov ntsoov tias koj muaj kev ntseeg thiab kev hlub rau tus Tswv Yexus thiab cov xaiv tseg.* 6 Kuv vam tias peb txoj kev ntseeg yuav pab tau koj ris txiaj ntsim rau txhua yam zoo uas Khetos pub rau peb. 7 Tus kwv, thaum kuv hnov tias koj muaj kev hlub thiab muaj lub siab kub lug txhawb cov xaiv tseg* mas ua rau kuv kaj siab kawg li.

8 Yog li ntawd, txawm kuv muaj cai tuav Khetos lub npe hais kom koj ua qhov yog los, 9 kuv tuaj yeem thov koj vim kuv paub tias koj muaj lub siab hlub. Thov xam pom tias kuv laus lawm thiab tseem raug kaw vim kuv ua Yexus Khetos* tes hauj lwm es tos txais Auneximas. 10 Thaum kuv raug kaw, kuv qhia txoj xov zoo rau Auneximas, nws thiaj zoo tam li kuv tus tub. Thov koj ua siab ntev rau nws. 11 Txawm yav nram ntej nws ua dog ua dig los, nim no nws tsim txiaj lawm. 12 Kuv xa nws rov los rau koj lawm los, nws tseem sawv nraim hauv kuv lub siab.

13 Tam sim no kuv tseem raug kaw vim kuv tshaj tawm txoj xov zoo. Kuv xav kom Auneximas nyob koj chaw tu kuv, yeej tsis xav tso nws rov los rau koj li. 14 Tiam sis kuv tsis xav hla koj xwb. Kuv xav kom koj ua lub siab dawb paug tos txais nws tsis yog yuam koj. 15 Tej zaum qhov uas nws ncaim koj ib nyuag ntu yog pab kom nws rov los nrog koj nyob mus li, 16 tsis yog rov los nyob li ib tug tub qhe tiam sis yog rov los nyob tam li ib tug kwv tij uas peb hlub tshua. Tsim nyog koj hlub nws tshaj kuv lawm thiab, vim nws yog koj tus tub qhe thiab koj tus kwv tij uas ntseeg Khetos lawm. 17 Yog koj xam pom kuv ua koj tus kwv luag ces thov koj tos txais nws ib yam li tos txais kuv. 18 Tsis tas li ntawd xwb, yog nws ua txhaum koj dab tsi los sis tshuav koj nqi li cas, kuv mam ua tus ris. 19 Kuv yog Povlauj, tsab ntawv no yog kuv sau ntag. Kuv mam li ua tus them koj, twb tsis xam qhov uas koj tshuav kuv nqi vim kuv pab koj los paub Khetos. 20 Tus kwv, wb twb koom tib tug Tswv ces thov koj ua raws li kuv tau hais no. Cia li xyaum Khetos es kuv thiaj kaj siab.

21 Kuv tso siab tias koj yuav mloog kuv hais, kuv thiaj sau tsab ntawv no tuaj rau koj. Kuv paub tias koj tseem yuav ua tshaj li kuv tau hais lawm thiab. 22 Tsis tas li ntawd xwb, kuv vam tias luag yuav tso kuv tawm raws li nej niaj hnub thov Vajtswv pab. Yog li ntawd, thov npaj ib qho chaw rau kuv tuaj so.

23 Epafas uas kuj raug kaw li kuv vim ua Yexus Khetos* tes hauj lwm,* xa xov tuaj rau koj. 24 Malakaus, Alithakhas, Demas, thiab Lukas uas nrog kuv ua Khetos tes hauj lwm kuj xa xov tuaj rau koj thiab.

25 Thov tus Tswv Yexus Khetos foom koob hmoov rau nej kom nej haj yam txawj sib hlub.