Muaj Kev Kawm Dabtsi Rau Cov Tho Kev?

Yehauvas Cov Timkhawv yeej ib txwm saib kev kawm Vajlugkub tseem ceeb kawg li. Lawv thiaj npaj tej kev kawm tshwj xeeb heev rau cov uas tshaj tawm puv ntoob, kom lawv ‘ua tau lawv tes haujlwm tiav huvsi.’​—2 Timaute 4:5.

Kev Kawm Rau Cov Tho Kev. Thaum ib tug Timkhawv tho kev tau 1 xyoos lawm, nws koom tau txojkev kawm rau cov tho kev uas ntev li 6 hnub. Tej zaum cov tho kev yuav kawm hauv ib lub Tsev Nceeg Vaj uas nyob ze lawv thaj tsam. Lub hom phiaj rau txojkev kawm no yog li cas? Txojkev kawm no yuav pab kom cov tho kev yimhuab paub Yehauvas, hajyam txawj qhia Vajlugkub rau txhua txoj ke, thiab muab siab rau ua haujlwm ntxiv.

Kev Kawm Rau Cov Qhia Lub Nceeg Vaj. Cov tho kev uas paub tab uas zoo siab hlo tso vaj tso tsev tseg, tawm mus tshaj tawm rau lwm thaj chaw kuj muaj ib txojkev kawm thiab. Txojkev kawm no ntev li 2 lub hlis. Cov tho kev no xav xyaum ib yam li tus qauv tshaj tawm uas Yexus tso tseg, lawv thiaj hais li no: “Kuv nyob ntawm no, thov txib kuv mus.” (Yaxayas 6:8; Yauhas 7:29) Thaum lawv mus nyob rau lwm thaj chaw tej zaum lawv yuav tau coj lub neej yoojyim dua qhov qub. Cov tibneeg hauv thaj chaw ntawd yuav coj txawv, noj txawv, thiab tej huab cua los txawv tas thiab. Ib txhia yuav tau kawm dua ib yam lus tshiab. Cov kwvtij nkauj muam uas tsis tau muaj txij nkawm, thiab cov muaj txij nkawm, uas hnub nyoog 23 xyoos mus txog 65 xyoos, puavleej rau tau npe mus kawm. Txojkev kawm no yuav pab kom cov tho kev paub coj tus cwj pwm uas Vajtswv pom zoo thaum lawv mus txog thaj chaw tshiab, thiab kom lawv txawj tuav haujlwm xwv Yehauvas thiab nws lub koom haum thiaj zoo txib lawv.

Kev Kawm Vajlugkub Kile-a (Watchtower Bible School of Gilead). Cov Henplais lo lus “Kile-a” txhais tias “Pawg Ua Timkhawv.” Txij thaum pib txojkev kawm no rau xyoo 1943, muaj tshaj li 8,000 tus tau kawm Kile-a tiav mus ua cov tubtxib tshaj tawm txawv tebchaws. Lawv ua timkhawv “mus txog qab ntuj kawg” lawm tiag, thiab pab tau coob leej los paub Yehauvas. (Tubtxib Tes Haujlwm 13:47) Thaum cov tubtxib pib qhia hauv tebchaws Peru, tsis tau muaj ib lub koom txoos li. Tamsim no muaj tshaj li 1,000 lub koom txoos lawm. Thaum peb cov tubtxib pib qhia hauv Nyiv Pooj Teb, twb tsis muaj 10 tus Timkhawv. Tiamsis tamsim no muaj tshaj li 200,000 tus lawm. Cov uas kawm Kile-a kawm ntev li 5 lub hlis, thiab lawv ua tib zoo tshawb nrhiav phau Vajlugkub thoob plaws. Leejtwg thiaj raug caw mus kawm Kile-a? Yog cov tho kev tshwj xeeb, cov tubtxib tshaj tawm txawv tebchaws, cov ua haujlwm hauv Npe-ee, thiab cov saib xyuas thaj tsam. Thaum kawm tiav lawd, lawv yuav paub txhawb Vajtswv tes haujlwm kom ruaj khov thoob plaws lub ntiajteb.

• Txoj Kev Kawm Rau Cov Tho Kev muaj lub hom phiaj dabtsi?

• Txoj Kev Kawm Rau Cov Qhia Lub Nceeg Vaj yog npaj rau leejtwg?